AKP ព្រះសីហនុ ថ្ងៃទី២៧ ខែកុម្ភៈ ឆ្នាំ២០២៥-- 

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា នាព្រឹកថ្ងៃទី២៧ ខែកុម្ភៈ ឆ្នាំ២០២៥ បានអញ្ជើញប្រកាសសមាសភាពសាខាមូលនិធិជាតិជំនួយសង្គមខេត្តព្រះសីហនុ និងជួបសំណេះសំណាលជាមួយថ្នាក់ដឹកនាំ និងមន្ត្រីរាជការ នៃមន្ទីរស.អ.យ. សាខាមូលនិធិជំនួយសង្គម និងសាខាជនពិការខេត្តព្រះសីហនុ ដោយមានការចូលរួមពីឯក ឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានមានប្រសាសន៍កោតសរសើរ និងវាយតម្លៃខ្ពស់ចំពោះថ្នាក់ដឹកនាំមន្ត្រីរាជ ការ បុគ្គលិក នៃមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្ត សាខាមូលនិធិជាតិជំនួយសង្គម និងសាខាមូលនិធិជនពិការ ដែលបានខិតខំយកអស់កម្លាំងកាយចិត្ត ប្រាជ្ញាស្មារតីក្នុងការបំពេញតួនាទីភារកិច្ចការផ្ដល់សេវាសង្គមកិច្ចនានាបានល្អប្រសើរជូនប្រជាពលរដ្ឋ ជាពិសេសការអនុវត្តកម្មវិធីជាតិជំនួយសង្គមដែលត្រូវបានដាក់ឱ្យអនុវត្ត ឆ្នាំ២០២៤កន្លង មកនេះ។

ជាមួយគ្នានេះដែរ ឯកឧត្តមអភិបាលខេត្តបានអបអរសាទរចំពោះលោក ស្រី សំម ឌីណា ត្រូវបានថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទាផ្ដល់សេចក្ដីទុកចិត្តតែងតាំងជា ប្រធានមូលនិធិជាតិជំនួយសង្គមខេត្តព្រះសីហនុ។ ក្រោមការដឹកនាំប្រកបដោយឧត្ដមគតិ និងការប្ដេជ្ញាចិត្តរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរា ជាណាចក្រកម្ពុជា បានបន្តពង្រឹងប្រព័ន្ធគាំពារសង្គម ឱ្យមានលក្ខណៈប្រមូលផ្ដុំ និងសង្គតិភាពទាំងក្នុងប្រព័ន្ធជំនួយសង្គម ប្រព័ន្ធសន្តិសុខ សង្គម រួមទាំងការអភិវឌ្ឍប្រព័ន្ធគាំពារសង្គមដោយឈរលើស្មារតី មិនបោះបង់ពលរដ្ឋខ្មែរណាម្នាក់ ដូចនេះហើយរដ្ឋបាលខេត្តព្រះសីហនុ បានចូលរួមតាមដានជំរុញការគាំទ្រអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដែលកំណត់យកអាទិភាពគន្លឹះទាំង៥ គឺ (មនុស្ស ផ្លូវ ទឹក ភ្លើង និងបច្ចេកវិទ្យា)និងផែនការរៀបចំដែនដីខេត្តព្រះសីហនុ ចក្ខុវិស័យឆ្នាំ២០៣៨) គឺរៀបចំ និងអភិវឌ្ឍខេត្តព្រះសីហនុជាទីក្រុងស្នូលនៃប៉ូលអភិវឌ្ឍជាតិ ប្រកបដោយចីរភាពនៃតំបន់ឆ្នេរសមុទ្រកម្ពុជា ក្នុងការជំរុញកំណើនសេដ្ឋកិច្ចអភិវឌ្ឍន៍ធុរកិច្ច ពាណិជ្ជកម្ម និងទេសចរណ៍ប្រកបដោយភាពរស់រវើក និងបរិយាបន្ន។

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានអបអរសាទរ លោក លោកស្រី ដែលទើបទទួលបានការតែងតាំងថ្មីជាប្រធាន អនុប្រធាន និងថ្នាក់ដឹកនាំ នៃមូលនិធិជាតិជំនួយសង្គមខេត្ដព្រះសីហនុ និងបានធ្វើពិធីប្រកាសចូលកាន់តំណែងជាផ្លូវការនាពេលនេះ ដើម្បីដឹកនាំការងារ និងបំពេញតួនាទីជាសេនាធិការឱ្យក្រសួងសង្គមកិច្ច អតីតយុទ្ធជន និងយុវនីតិសម្បទា និងមូលនិធិជាតិជំនួយសង្គម មូលនិធិជនពិការ ក្នុងការផ្ដល់សេវាជូនប្រជាពលរដ្ឋនៅក្នុងខេត្ដព្រះសីហនុឱ្យទទួលបានសុក្រឹត្យភាព តម្លាភាព។ ការទទួលភារកិច្ចថ្មីនេះ គឺជាការរែកពុននូវកិច្ចការសំខាន់ៗ ដែលក្រសួងសង្គមកិច្ចអតីតយុទ្ធជន និងយុវនីតិសម្បទា បាន នឹងកំពុងពុះពារសម្រេចឱ្យបានស្របតាមតួនាទីភារកិច្ចរបស់ក្រសួង។

ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងស្ថាប័នពាក់ព័ន្ធចូលរួមក្នុងគោលបំណងតម្រង់ទិស ធានាដល់ការសម្រេចបាននូវគោលដៅជាយុទ្ធសាស្ត្ររបស់រាជរដ្ឋាភិបាល ដែលបច្ចុប្បន្នក្រសួងកំពុងត្រួតពិនិត្យវឌ្ឍនភាពនៃការអនុវត្តអនុសាសន៍នេះ ជាមួយអគ្គនាយកដ្ឋាន និងអង្គភាពជំនាញក្រោមឱវាទ។ ក្រសួងបាន និងកំពុងរៀបចំការពិនិត្យឡើងវិញការវិភាគមុខងារ និងកែសម្រួលរចនាសម្ព័ន្ធនានា ដើម្បីឱ្យស្របនឹងតួនាទីភារកិច្ចសំខាន់របស់ខ្លួន ឆ្លើយតបបានទាន់ពេលវេលាចំពោះតម្រូវការរបស់ប្រជាពលរដ្ឋ សំដៅលើកកម្ពស់ប្រសិទ្ធភាពក្នុងការគ្រប់គ្រង ការផ្តល់សេវាសង្គមកិច្ច និងអភិបាលកិច្ចល្អលើវិស័យសង្គមកិច្ចនៅក្នុងព្រះរាជាណាចក្រកម្ពុជា៕

ដោយ ងូ សុមុនី