AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៥ --ក្នុងខណៈដែលការធ្វើតេស្តនៅតែមានវិជ្ជមានកូវីដ១៩នោះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាមានប្រសាសន៍ថា មានអ្នកបន់ឱ្យខ្ញុំឆាប់ជាដែលមានចំនួនច្រើនលើសលប់  និងមានអ្នកបន់ឱ្យខ្ញុំឆាប់ស្លាប់ដែលមានចំនួនតិចតួច ដែលសុទ្ធសឹងតែពួកជ្រុលនិយម។

នៅលើបណ្ដាញទំនាក់ទំនងសង្គម នាថ្ងៃទី២៧ ខែកុម្ភៈ ឆ្នាំ២០២៥ សម្ដេចតេជោបានសរសេរថា៖ «អ្នកជំងឺកូវីដវាយកូនគោល។ មានអ្នកបន់ឱ្យខ្ញុំឆាប់ជាដែលមានចំនួនច្រើនលើសលប់ និងមានអ្នកបន់ឱ្យខ្ញុំឆាប់ស្លាប់ដែលមានចំនួនតិចតួច ដែលសុទ្ធសឹងតែពួកជ្រុលនិយម»។ សម្ដេចតេជោបន្តថា  ព្រឹកនេះខ្ញុំប្រើពេលជាង៣ម៉ោងវាយកូនគោល កម្លាំងប្រៀបដូចយុវជនអាយុជាង៣០ឆ្នាំពេលវាយ driver ចេញ។ គ្មានក្អកគ្មានហៀរសំបោរ។ ទាំងគ្រូពេទ្យ និងបងប្អូនផ្សេងទៀតបានលើកទឹកចិត្តឱ្យខ្ញុំហាត់ប្រាណទើបឆាប់ជាសះស្បើយ។  សម្ដេចតេជោថ្លែងបញ្ជាក់ថា៖ «ខ្ញុំយកការវាយកូនគោលដែលជាកីឡាដែលខ្ញុំចូលចិត្ត ដើម្បីហាត់ប្រាណ តែខ្ញុំនៅតែប្រុងប្រយ័ត្នមិនឱ្យជំងឺខ្ញុំឆ្លងទៅអ្នកផ្សេងទៀតពិសេសកូនៗដែលបម្រើការងារនៅតារាងកូនគោល»។

សម្ដេចតេជោបន្ថែមថា  ដរាបណាការធ្វើតេស្តនៅតែមានវិជ្ជមានកូវីដ១៩ ខ្ញុំតែមិនចូលរួមប្រជុំ ឬទទួលភ្ញៀវនោះទេ។ សម្ដេចតេជោប្រធានព្រឹទ្ធសភា សង្ឃឹមថា នឹងបានចូលរួមអាពាហ៍ពិពាហ៍ កូនអ្នកឧកញ្ញា លី ហួរ នៅថ្ងៃ០៧ ខែមីនា ឆ្នាំ២០២៥ខាងមុខ៕

ដោយ៖ ជឹម ណារី