AKP ព្រះសីហនុ ថ្ងៃទី២៦ ខែកុម្ភៈ ឆ្នាំ២០២៥-- ឯកឧត្តម សុខ គាង រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញជាគណៈអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធ) ជូនបងប្អូនប្រជាពលរដ្ឋចំនួន៧ភូមិ ស្មើនឹង ៩,៧១០ក្បាលដី ក្នុងសង្កាត់ចំនួន៣ នៃក្រុងកំពង់សោម ខេត្តព្រះសីហនុ នាព្រឹកថ្ងៃពុធ ទី២៦ ខែកុម្ភៈ ឆ្នាំ២០២៥។

លោក ចេង ស្រុង ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ បានធ្វើរបាយការណ៍សង្ខេបស្តីពីការចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ ៧ភូមិ ក្នុងសង្កាត់ទាំង៣ នៃក្រុងកំពង់សោម ចំនួន ៩,៧១០ក្បាលដី ក្នុងនោះ ភូមិស្រែចាមលើ សង្កាត់អូរជ្រៅមានចំនួន ៧០៤ក្បាលដី ភូមិស្រែចាមក្រោម សង្កាត់អូរជ្រៅមានចំនួន ៣១៥ក្បាលដី ភូមិស្រែកោះខ្យង សង្កាត់អូរជ្រៅមានចំនួន ៧៥៣ក្បាលដី ភូមិស្រែក្នុង សង្កាត់អូរជ្រៅមានចំនួន ៨២២ក្បាលដី ភូមិអូរជ្រៅ សង្កាត់អូរជ្រៅមានចំនួន ១,០៩៩ក្បាលដី ភូមិបឹងតាស្រី សង្កាត់បឹងតាព្រហ្មមានចំនួន ២,៥៤១ក្បាលដី ភូមិបត់គគីរ សង្កាត់អូរឧកញ៉ាហេងមានចំនួន ៣,៤៧៦ក្បាលដី។

ឯកឧត្តម ម៉ាង ស៊ីណេត បានថ្លែងអំណរគុណចំពោះរាជរដ្ឋាភិបាល ក្រសួងរៀបចំដែនដី និងមន្ត្រីសុរិយោដីខេត្ត ដែលបានខិតខំប្រឹងប្រែងបំពេញការងារចុះបញ្ជីដីធ្លីជូនប្រជាពលរដ្ឋ ហើយថ្ងៃនេះ ពេលនេះយើងបានធ្វើការជួបជុំគ្នាក្នុងកម្មវិធីចែកប័ណ្ណកម្មសិទ្ធដីធ្លីជូនបងប្អូនប្រជាពលរដ្ឋមកពី ៧ភូមិ ក្នុងសង្កាត់ទាំង៣ នៃក្រុងកំពង់សោម ដែលមាន ៣ប្រភេទក្នុងនោះ ១. បណ្ណទទួលអំណោយពីរដ្ឋត្រូវបានចែកនៅទីនេះ ២. បណ្ណដែលទទួលអំណោយពីឪពុកម្តាយត្រូវយកទៅប្រថាប់ត្រានៅសាខាពន្ធដារខេត្ត គឺប្រថាប់ត្រាស្មើនឹងសូន្យ និង៣. បណ្ណទិញលក់បន្តគ្នា ត្រូវឱ្យម្ចាស់បណ្ណមកយកនៅមន្ទីររៀបចំដែនដីខេត្ត ដើម្បីយកទៅបង់ពន្ធប្រថាប់ត្រានៅសាខាពន្ធដារខេត្តជាមុនសិន រួចយកមកប្រើប្រាស់តាមផ្លូវច្បាប់។ រដ្ឋបាលខេត្តចង់ឃើញប្រជាពលរដ្ឋទទួលបានបណ្ណកម្មសិទ្ធស្របច្បាប់គ្រប់គ្នា ព្រោះបណ្ណនេះមានអត្ថប្រយោជន៍ក្នុងការកាន់កាប់ដីធ្លីស្របច្បាប់ និងសូមទុកដាក់ឱ្យបានត្រឹមត្រូវ ព្រោះរដ្ឋបាលដីធ្លីមិនអាចចេញជូនបងប្អូនជាថ្មីម្តងទៀតនោះទេ។ សូមកុំយកបណ្ណកម្មសិទ្ធនេះយកទៅលក់ដូរ ឬបញ្ចាំ ក៏ប៉ុន្តែការដោះដូរយកទៅប្រកបមុខរបរ ឬការពង្រីកអាជីវកម្មផ្សេងៗបង្កើនជីវភាពគ្រួសារឱ្យកាន់តែល្អប្រសើរក្នុងការបង្កើតអាជីវកម្មប្រកបដោយចីរភាព និងភាពរីករាយក្នុងក្រុមគ្រួសារ។ ស្របពេលប្រជាជនកម្ពុជាទទួលបាននូវសេចក្តីសោមនស្សរីករាយជាមួយនឹងដំណើរការនៃការអភិវឌ្ឍសេដ្ឋកិច្ចសង្គម និងការរស់នៅប្រកបដោយសុខដុមរមនាក្រោមម្លប់នៃសុខសន្តិភាព ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដោយសម្តេចបានយកចិត្តទុកដាក់ និងធ្វើការណែនាំដល់អាជ្ញាធររាជធានី ខេត្ត ជំរុញការចុះបញ្ជីដីធ្លីជូនប្រជាពលរដ្ឋឱ្យបានលឿន ឆាប់។ ហើយការចុះបញ្ជីដីធ្លីមានលក្ខណៈជាប្រព័ន្ធជាទីមោទកៈបានចូលរួមចំណែកយ៉ាងសំខាន់ជាមួយរាជរដ្ឋាភិបាល និងរដ្ឋបាលខេត្ត ក្នុងការលើកកម្ពស់សុវត្ថិភាពក្នុងការកាន់កាប់ដីធ្លី ដែលជាបច្ច័យជួយជំរុញនូវកំណើនសេដ្ឋកិច្ចសង្គមប្រកបដោយនិរន្តរភាព និងសុខដុមនីយកម្មស្របតាមគោលនយោបាយដីធ្លីរបស់រាជរដ្ឋាភិបាលកម្ពុជា សំដៅប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាប៉ូលអភិវឌ្ឍជាតិដ៏ទំនើបប្រកបដោយចីរភាព ជីវភាព សុខភាព និងសុភមង្គលនៅតំបន់ឆ្នេរ នៃភាគនិរតីប្រទេសកម្ពុជា។

ឯកឧត្តមអភិបាលខេត្តបានធ្វើការផ្តាំផ្ញើដល់អាជ្ញាធរគ្រប់លំដាប់ថ្នាក់ ជាពិសេសអាជ្ញាធរក្រុងកំពង់សោម មន្រ្តីបច្ចេកទេសសុរិយោដី និងអ្នកពាក់ព័ន្ធត្រូវផ្តល់កិច្ចសហការចូលរួមគាំទ្រសម្របសម្រួលឱ្យបានកាន់តែសកម្មថែមទៀតនៅក្នុងដំណើរការចុះបញ្ជីដីធ្លី និងជំរុញដំណើរការចែកប័ណ្ណកម្មសិទ្ធិជូនប្រជាពលរដ្ឋឱ្យបានឆាប់រហ័ស ព្រមទាំងខិតខំសម្រួល និងដោះស្រាយបញ្ហាប្រឈមនានាដែលកើតមានពាក់ព័ន្ធក្នុងការផ្តល់សេវានៃការចុះបញ្ជីដីធ្លីជាលក្ខណៈប្រព័ន្ធឱ្យបានលឿន ឆាប់ និងមានប្រសិទ្ធភាពខ្ពស់។

ទន្ទឹមនឹងនេះ ឯកឧត្តមអភិបាលខេត្តបានបញ្ជាក់ថា រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវយុទ្ធសាស្ត្របញ្ចកោណតំណាក់កាលទី១ ផ្តោតសំខាន់ទៅលើ មនុស្ស ផ្លូវ ទឹក ភ្លើង និងបច្ចេក វិទ្យា និងយុទ្ធសាស្ត្រផ្សេងទៀតក្នុងការបង្កើតការងារជូនប្រជាពលរដ្ឋ ដើម្បីបម្រើ និងការពារនូវឧត្តមប្រយោជន៍ជាតិ និងប្រជាជនក្នុងគ្រប់កាលៈទេសៈប្រកបដោយឧត្តមគតិ និងការបេ្តជ្ញាចិត្តយ៉ាងមោះមុត គឺជានិមិត្តរូបតម្រង់ទិសឆ្ពោះឈានទៅរកចក្ខុវិស័យកម្ពុជាឆ្នាំ២០៥០ ធ្វើឪ្យកម្ពុជាក្លាយជាប្រទេសដែលមានចំណូលខ្ពស់។ សម្តេចធិបតីបានយកចិត្តទុកដាក់ជំរុញលើកកម្ពស់វិស័យដីធ្លីនៅទូទាំងប្រទេស ដើម្បីចេញបណ្ណកម្មសិទ្ធជូនប្រជាពលរដ្ឋ ជាមូលដ្ឋានប្រភពសេដ្ឋកិច្ច និងសុវត្ថិភាពក្នុងការកាន់កាប់ដីធ្លីស្របតាមទិសស្លោក បញ្ចប់ការចុះបញ្ជីដីធ្លី (សេវាគប់ចិត្ត) បរិយាកាសគ្មានវិវាទ ម្យ៉ាងវិញទៀតការចុះបញ្ជីដីធ្លីជូនប្រជាពលរដ្ឋនៅតាមបណ្តាភូមិ ឃុំ សង្កាត់ ក្រុង ស្រុកទូទាំងខេត្តព្រះសីហនុ៕

ដោយ ងូ សុមុនី