AKP សៀមរាប ថ្ងៃទី២៥ ខែកុម្ភៈ ឆ្នាំ២០២៥–សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី២៥ ខែកុម្ភៈ ឆ្នាំ២០២៥នេះ អញ្ជើញជាអធិបតី ក្នុងពិធីប្រគល់សញ្ញាបត្រកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់​​​ដល់និស្សិតជ័យលាភី នៃសាកលវិទ្យាល័យ សៅស៍អ៊ីសថ៍អេយសៀ នៅសណ្ឋាគារ សុខាសៀមរាប ខេត្តសៀមរាប។

សាកលវិទ្យាល័យ សៅស៍អ៊ីសថ៍អេយសៀ គឺជា​គ្រឹះស្ថានឧត្តមសិក្សា​​ឯកជន ត្រូវបានបង្កើតឡើងតាមអនុក្រឹត្យ​លេខ៦៣ អនក្រ.បក ចុះ​ថ្ងៃទី៧ ខែកក្កដា ឆ្នាំ២០០៦ ។

ដើម្បីលើកកម្ពស់គុណភាពអប់រំឱ្យ​ឆ្លើយតបទៅនឹងផែនការយុទ្ធសាស្រ្តរបស់ក្រសួងអប់រំ យុវជន និងកីឡា និងយុទ្ធសាស្រ្តបញ្ចកោណដំណាក់កាលទី១របស់​​រាជរដ្ឋាភិបាលកម្ពុជា​​ សាកល​វិទ្យាល័យ សៅស៍អ៊ីសថ៍អេយសៀបានរៀបចំចក្ខុវិស័យ បេសកកម្ម​​ ផែនការយុទ្ធសាស្ត្រ ផែនការបណ្តុះបណ្តាល និងផែនការសកម្មភាពច្បាស់លាស់​ ដើម្បី​បណ្ដុះបណ្ដាល​កម្មវិធីអប់រំកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត​ប្រកបដោយ​គុណភាពមាន​ឥរិយាបថល្អ​ឆ្លើយតបទៅនឹងទីផ្សារការងារជាតិ និងអន្តរជាតិ សំដៅចូលរួមអភិវឌ្ឍ​ប្រទេសជាតិ។ ជាមួយគ្នានេះ សាកលវិទ្យាល័យ សៅស៍អ៊ីសថ៍អេយសៀមានក្រុមប្រឹក្សាភិបាល បុគ្គលិក        គ្រូបង្រៀនសរុបចំនួន ៣៥៩នាក់(នារី ៨៤នាក់) និងនិស្សិតកំពុងសិក្សាសរុបចំនួន ៥.៣២៧នាក់(នារី ៣.២៩៨នាក់)។

ដោយមាន​ការប្តេជ្ញាចិត្តខ្ពស់របស់គណៈគ្រប់គ្រង បុគ្គលិក និង​គ្រូបង្រៀនក្នុង​ការ​​អនុវត្តផែនការយុទ្ធសាស្ត្រ ផែនការបណ្តុះបណ្តាល និងផែនការសកម្មភាពរបស់សាកលវិទ្យាល័យ សៅស៍អ៊ីសថ៍អេយសៀនាំឱ្យ​សាកលវិទ្យាល័យមានកេរ្តិ៍ឈ្មោះល្បីល្បាញ​នៅក្នុងព្រះរាជាណា​ចក្រ​​កម្ពុជា ជាពិសេសនៅខេត្តសៀមរាប មានការគាំទ្រពីអ្នកសិក្សាគ្រប់មជ្ឈដ្ឋាន ព្រមទាំងមានការទទួលស្គាល់ពីស្ថាប័នជាតិ អន្តរជាតិ និងទទួលបានសមិទ្ធផលចម្បងៗដូ​ចខាង​ក្រោម៖

១. ទទួលបានការទទួលស្គាល់គុណភាពអប់រំពេញសិទ្ធិពីគណៈកម្មាធិការទទួលស្គាល់គុណភាពអប់រំ នៃ​កម្ពុជា(ACC)

២.ជាសមាជិក នៃស្ថាប័នធានាគុណភាព នៃបណ្ដាញសាកលវិទ្យាល័យអាស៊ាន(AUN-QA)

៣.មានកិច្ចសហប្រតិបត្តិការជាមួយធនាគារពិភពលោក ធនាគារអភិវឌ្ឍន៍អាស៊ី អង្គការ UNICEF អង្គការមូលនិធិអាស៊ី ដើម្បីបង្កើតមណ្ឌលព័ត៌មានសាធារណៈ

៤.មានកិច្ចសហប្រតិបត្តិការជាមួយស្ថានទូតសហរដ្ឋអាមេរិកនៅកម្ពុជា ដើម្បីបង្កើតបណ្ណាល័យអាមេរិក  

៥.មានកិច្ចសហប្រតិបត្តិការជាមួយសាកលវិទ្យាល័យល្បីៗនៅក្រៅប្រទេស ដូចជាប្រទេសអង់គ្លេស​ អាល្លឺម៉ង់ អេស្ប៉ាញ ស៊ុយអែត ជប៉ុន កូរ៉េ ចិន ថៃ ហ្វីលីពីន ម៉ាឡេស៊ី វៀតណាម និងឥណ្ឌូនេស៊ី ដើម្បី​ផ្លាស់ប្តូរនិស្សិតសិក្សា ចុះកម្មសិក្សា ផ្លាស់ប្តូរវប្បធម៌ អភិវឌ្ឍ​កម្មវិធីអប់រំបណ្តុះបណ្តាលកម្មវិធីឆ្លងដែន(Cross-Border Programs) និងស្រាវជ្រាវរួមគ្នាជាដើម

៦.មានការទទួលស្គាល់ និងគាំទ្រពីអ្នកសិក្សាគ្រប់មជ្ឈដ្ឋាន នៃព្រះរាជាណាចក្រកម្ពុជា ដែល​មាន​និស្សិតចុះឈ្មោះចូលរៀនប្រមាណ ២០០០នាក់ នៃឆ្នាំសិក្សានីមួយៗ

៧. មានការទទួលស្គាល់ និងគាំទ្រពីទីផ្សារការងាររួមមាន៖ ស្ថាប័នរដ្ឋ ឯកជន អង្គការជាតិ និងអន្តរជាតិ តាមរយៈនិស្សិតកំពុងសិក្សា និងបញ្ចប់ការ​សិក្សា​ទទួលបាន​ការងារ​ធ្វើជាអតិបរមា

៨. មានគម្រោងពង្រីកហេដ្ឋារចនាសម្ព័ន្ធរបស់សាកលវិទ្យាល័យ សៅស៍អ៊ីសថ៍អេយសៀកម្រិត​ស្តង់ដាអន្តរជាតិ ដែលសាកលវិទ្យាល័យ​មានផ្ទៃដីប្រមាណ ៤០ហិកតាស្ថិតនៅក្រុងរុនតាឯកតេជោសែន ខេត្តសៀមរាប សម្រាប់ពង្រីកហេដ្ឋារចនាសម្ព័ន្ធរបស់សាកលវិទ្យាល័យ សៅស៍អ៊ីសថ៍អេយសៀ រួចរាល់ហើយ ។

ទន្ទឹមនឹងសមិទ្ធផលចម្បងៗខាងលើនេះ សាកលវិទ្យាល័យ បានរៀបចំពិធីប្រគល់សញ្ញាបត្រ​ជូន​​និស្សិត​ជ័យលាភីកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ក្រោមអធិបតីភាព  ដ៏ខ្ពង់ខ្ពស់បំផុតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលមានអ្នកចូលរួមប្រមាណ ៥០០០នាក់ ។

ជាមួយនឹងសមិទ្ធផលដ៏ធំធេងខាងលើនេះ ឯកឧត្ដមបណ្ឌិត សៀន សុវណ្ណា ស្ថាបនិក និងជាប្រធានក្រុមប្រឹក្សាភិបាលនៃសាកលវិទ្យាល័យ សៅស៍អ៊ីសថ៍អេយសៀ បានអបអរសាទរ​ចំពោះនិស្សិតជ័យលាភី​ទាំងអស់​ ដែលបានខិតខំរៀនសូត្ររហូតទទួលបានជោគជ័យ ហើយនឹងត្រូវទទួលសញ្ញាបត្រនាពេលនេះ ។

ឯកឧត្ដមបណ្ឌិត ស្ថាបនិក និងជាប្រធានក្រុមប្រឹក្សាភិបាល សូមសំដែងនូវការ​កោតសរសើរដ៏ស្មោះ និងវាយតម្លៃខ្ពស់​ចំពោះគណៈគ្រប់គ្រង បុគ្គលិក និងគ្រូបង្រៀន នៃសាកលវិទ្យាល័យ សៅស៍អ៊ីសថ៍អេយសៀ ដែលបានខិតខំប្រឹងប្រែងអស់ពីកម្លាំងកាយ ចិត្ត និងប្រាជ្ញា ដោយមានឆន្ទៈមោះមុត មាន​គំនិត​ច្នៃប្រឌិត ​និងមានការប្តេជ្ញាចិត្ត​​ខ្ពស់​​ក្នុងការដឹកនាំគ្រប់គ្រងបង្ហាត់បង្រៀន និងអប់រំណែនាំនិស្សិត ស្របតាមផែនការយុទ្ធសាស្ត្រ ផែនការ​បណ្ដុះបណ្តាល និងបទដ្ឋានគតិយុត្ត​របស់សាកលវិទ្យាល័យ សៅស៍អ៊ីសថ៍អេយសៀនាំ​ឱ្យសាកលវិទ្យាល័យ​ទទួលបានកេរ្តិ៍ឈ្មោះល្បីល្បាញ និងសមិទ្ធផលចម្បងៗ​​ជាទីមោទនៈ​នាពេលនេះ ។

រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយ​គតិបណ្ឌិត​របស់សម្តេច​មហាបរវរធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រកម្ពុជា នីតិកាលទី៧ នៃរដ្ឋសភា បាន​យកចិត្តទុកដាក់ខ្ពស់ បន្តការពារ និងថែរក្សាសន្តិភាពនៅព្រះរាជាណាចក្រកម្ពុជាឱ្យស្ថិតស្ថេរជានិរន្តរ៍ ដើម្បីអភិវឌ្ឍន៍ប្រទេសកម្ពុជា​​​លើគ្រប់វិស័យ ជាមួយគ្នានេះរាជរដ្ឋាភិបាលកម្ពុជាបានយកចិត្តទុកខ្ពស់លើវិស័យទេសចរណ៍ ដែលនាំឱ្យភ្ញៀវទេសចរណ៍បរទេសមានចំនួនកើនឡើងជាង២៨%នៅឆ្នាំ២០២៤ ធៀបនឹងឆ្នាំ២០២៣ និងបានលើកកម្ពស់គុណភាពអប់រំ ដើម្បីអភិវឌ្ឍធនធាន​មនុស្សឱ្យក្លាយជាទំពាំងស្នងឫស្សីសម្រាប់ចូលរួមអភិវឌ្ឍ​ប្រទេសកម្ពុជានាពេលអនាគត ។

ដូច្នេះសូមប្អូនៗនិស្សិត នៃសាកលវិទ្យាល័យ សៅស៍អ៊ីសថ៍អេយសៀទាំងអស់ត្រូវ​ស្រឡាញ់ការសិក្សាស្រាវជ្រាវពេញមួយជីវិត និងយកចិត្ត​ទុកដាក់​ខ្ពស់​លើការសិក្សាបន្ថែមទៀត ដើម្បីទទួលបានចំណេះដឹង ចំណេះធ្វើ ជំនាញ និងឥរិយាបថល្អសម្រាប់អភិវឌ្ឍ​ជីវិតខ្លួនឯង សេដ្ឋកិច្ចគ្រួសារ​ និង​ចូលរួមអភិវឌ្ឍ​ប្រទេស​ជាតិ៕

ដោយ៖ គង់ សិរីរ័ត្ន