AKP កំពង់ធំ ថ្ងៃទី២៣ ខែកុម្ភៈ ឆ្នាំ២០២៥-- ក្នុងឱកាសអញ្ជើញចុះពិនិត្យមើលវឌ្ឍនភាពសាងសង់ទំនប់ស្ទាក់ទឹកស្ទឹងស្ទោង (ពាម) ស្ថិតនៅភូមិប្រកៀប ឃុំម្សាក្រង ស្រុកស្ទោង ខេត្តកំពង់ធំ កាលពីរសៀលថ្ងៃទី២២ ខែកុម្ភៈ ឆ្នាំ២០២៥ លោក សាយ គឹមឡម អភិបាលស្រុកស្ទោង បានលើកឡើងថា ទំនប់ស្ទាក់ទឹកស្ទឹងស្ទោង (ពាម) នឹងជួយស្រោចស្រពដីស្រែរបស់ប្រជាកសិករបានជាង១ម៉ឺនហិកតា បាន២ដងក្នុង១ឆ្នាំ ដោយសុវត្ថិភាព។

ក្នុងឱកាសនោះ លោក សាយ គឹមឡម បានណែនាំដល់បងប្អូនប្រជាពលរដ្ឋក្នុងមូលដ្ឋានជាពិសេសអាជ្ញាធរឃុំម្សាក្រងត្រូវនាំគ្នាជួយថែរក្សាប្រព័ន្ធធារាសាស្ត្រ និងសំណង់សិល្បការដែលសម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា បានចងដៃតាមរយៈឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង ដើម្បីទុកជាអាងស្តុកទឹកជាប្រព័ន្ធធារាសាស្ត្រដ៏មានសក្តានុពលហើយក៏ជាផ្លូវគមនាគមន៍ដ៏មមាញឹក ដែលនឹងជួយលើកកម្ពស់សេដ្ឋកិច្ចជីវភាពប្រជាកសិករនៅក្នុងឃុំម្សាក្រង និងស្រុកស្ទោងឱ្យកាន់តែប្រសើរឡើងស្របតាមយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧ នឹងជួយធ្វើឱ្យស្រុកស្ទោងមានទេសភាពខៀវស្រងាត់ស្រស់បំព្រងគ្រប់រដូវកាលដោយស្រែស្រូវ និងច្បារដំណាំ។

លោក សាយ គឹមឡម និងពុកម៉ែបងប្អូនប្រជាពលរដ្ឋនៅក្នុងភូមិប្រកៀបឃុំម្សាក្រង បានថ្លែងអំណរគុណយ៉ាងជ្រៀលជ្រៅដល់ឯកឧត្តមរដ្ឋមន្ត្រី និងក្រុមការងារដែលតែងតែគិតគូរយកចិត្តទុកដាក់ដល់សុខទុក្ខសុខុមាលភាព ជីវភាព ពុកម៉ែបងប្អូនប្រជាពលរដ្ឋនៅក្នុងស្រុកស្ទោង ហើយបានចូលរួមអភិវឌ្ឍ និងកសាងនូវហេដ្ឋារចនាសម្ព័ន្ធផ្សេងៗជាពិសេសប្រព័ន្ធធារាសាស្ត្រស្អេកស្កះ រួមមានស្ពានថ្មឆ្លងកាត់អូរចកភ្ជាប់ទៅភូមិប្រកៀបដែលជួយឱ្យពុកម៉ែបងប្អូន និងសិស្សានុសិស្សធ្វើដំណើរ ដឹកជញ្ជូនកសិផល និងទៅសាលារៀនបានងាយស្រួល និងឆាប់រហ័សជាងមុន។

ទន្ទឹមនឹងនេះ លោកអភិបាលស្រុកស្ទោងបានណែនាំដល់អាជ្ញាធរឃុំម្សាក្រង ត្រូវគ្រប់គ្រង និងថែរក្សាដីចំណីផ្លូវ និងប្រព័ន្ធធារាសាស្ត្រនេះដើម្បីធានាបាននូវគុណភាពផ្លូវ និងសំណង់ប្រើប្រាស់បានយូរអង្វែងនឹងអាចជាកន្លែងទេសចរណ៍ដ៏មានសក្តានុពលដែលអាចភ្ជាប់ពីភូមិសាស្ត្រស្រុកស្ទោងទៅស្រុកជីក្រែង ខេត្តសៀមរាបផងដែរ។

សូមបញ្ជាក់ថា ទំនប់ស្ទាក់ទឹកពាមមានប្រវែង៥៥ម៉ែត្រ សំណង់សិល្បការ៤កន្លែង សំណង់ភ្ជាប់មុខដាច់១កន្លែង ទ្វារទឹក៣ប្រវែង១៩ម៉ែត្រ ផ្លូវក្រាលគ្រួសក្រហមប្រវែង៨គីឡូម៉ែត្រ ភ្ជាប់ពីភូមិប្រកៀបរហូតដល់ព្រំប្រទល់ខេត្តសៀមរាប និងស្ពានបេតុងអូរចកប្រវែង៣៦ម៉ែត្រ៕

ដោយ ស៊ុម វណ្ណា