AKP ព្រះសីហនុ ថ្ងៃទី២២ ខែកុម្ភៈ ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ អញ្ជើញកាត់ខ្សែបូសម្ពោធដាក់ឱ្យប្រើប្រាស់ជាផ្លូវការអគារសម្ភព និងរោគស្ត្រី នៅមណ្ឌលសុខភាព ស្ទឹងហាវ ស្ថិតនៅភូមិ២ ឃុំអូរត្រេះ ស្រុកស្ទឹងហាវ ខេត្តព្រះសីហនុ ព្រឹកថ្ងៃសៅរ ទី២២ ខែកុម្ភៈ ឆ្នាំ២០២៥។

ឯកឧត្តម ម៉ាង ស៊ីណេត បានថ្លែងអំណរគុណចំពោះលោក JAMES LAMAR THOMPSON JR នាយកក្រុមហ៊ុន CAFFCO INTERNATIONAL DEVELOPMENT (CAMBODIA) COMPANY LIMITED ដែលបានឧបត្ថម្ភថវិកាចំនួន ៣២.០១៩ (បីម៉ឺនពីរពាន់ដប់ប្រាំបួន) ដុល្លារអាមេរិក ដល់រដ្ឋបាលខេត្តព្រះសីហនុ សម្រាប់សាងសង់អគារសម្ភព និងរោគស្ត្រីចំនួន ១ខ្នង មាន ៥បន្ទប់ និងបំពាក់សម្ភារបម្រើឱ្យការងារនៅមណ្ឌលសុខភាពស្រុកស្ទឹងហាវ ស្ថិតក្នុងឃុំអូរត្រេះ ស្រុកស្ទឹងហាវ ខេត្តព្រះសីហនុ។

ក្នុងឱកាសនោះ ឯកឧត្តមអភិបាលខេត្តក៏បានបញ្ជាក់ថា  ថ្ងៃនេះយើងទទួលបានអគារសម្ពព និងរោគស្ត្រី ដែលជាអំណោយរបស់លោក JAMES LAMAR THOMPSON JR ជូនដល់មណ្ឌលសុខភាព ក្នុងការបម្រើសេវាសុខាភិបាល ឱ្យមានលក្ខណៈទំនើប ស្របតាមការអភិវឌ្ឍរីកចម្រើនរបស់ប្រទេសជាតិ ទន្ទឹមនោះយើងក៏ត្រូវគិតគូរពីអនាម័យ បរិស្ថានឱ្យមានសោភ័ណភាពកាន់តែល្អថែមទៀត។ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានយកចិត្តុដាក់លើវិសយចំនួន៣ ក្នុងនោះមានដូចជា វិស័យអប់រំ សុខាភិបាល និងកំណែទម្រង់មុខងារសាធារណៈ ហើយថ្ងៃនេះក្នុងចំណោមវិស័យទាំង៣ យើងទទួលបានសមិទ្ធផលថ្មីមួយ គឺសមិទ្ធផលលើវិស័យសុខាភិបាល ដូច្នេះយើងត្រូវរួមគ្នាថែរក្សា និងបម្រើសេវាសាធារណៈតាមស្តង់ដាគំរូរបស់ក្រសួងសុខាភិបាល ឈានទៅធ្វើការប្រកួតប្រជែង និងប្រឡងប្រណាំងអង្គភាពផ្តល់សេវាគំរូដែលដឹកនាំដោយក្រសួងមុខងារសាធារណៈ ហើយនៅទីនេះ ឆ្នាំនេះយើងត្រូវត្រៀមខ្លួនចូលរួមប្រឡងមណ្ឌលសុខភាពបម្រើសេវាល្អមានដូចជា៖  ១. យើងនៅទីនេះខិតខំផ្តល់សេវាឪ្យបានល្អជូនប្រជាពលរដ្ឋ ទី២. ជួយថែរក្សាសមិទ្ធិផលអគារសម្ពព និងរោគស្រ្តីក្នុងការប្រើប្រាស់បានយូរ ហើយអ្វីជាកត្តាសំខាន់់ គឺឥរិយាបទរបស់បុគ្គលិកសុខាភិបាលរបស់យើងត្រូវមានស្មាមញញឹម ដែលជាចំណុចគន្លឹះមួយសំខាន់ក្នុងការទាក់ទាញប្រជាពលរដ្ឋឱ្យមកទទួលសេវាសុខាភិបាលនៅទីនេះ ដោយសង្ឃឹមថា មណ្ឌលសុខភាពរបស់យើងនឹងខិតខំបម្រើសេវាប្រកបដោយភាពទាក់ទាញ ក្នុងការចូលរួមប្រឡងប្រណាំងសេវាសាធារណល្អលើវិស័យសុខាភិបាលសម្រាប់ឆ្នាំ២០២៥ ទទួលបានជោគជ័យ។

សូមបញ្ជាក់ថា មណ្ឌលសុខភាពស្រុកស្ទឹងហាវមានបុគ្គលិកសរុបចំនួន១០នាក់ ក្នុងនោះស្រី៦នាក់៕

ដោយ ងូ សុមុនី