AKP សៀមរាប ថ្ងៃទី២០ ខែកុម្ភៈ ឆ្នាំ២០២៥-- លោក ឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប កាលពីថ្ងៃទី១៩ ខែកុម្ភៈ ឆ្នាំ២០២៥ បានជួបប្រជុំ Hotline Group Meeting លើកទី១៧ ជាមួយឯកឧត្តមអគ្គកុងស៊ុលសាធារណរដ្ឋកូរ៉េប្រចាំកម្ពុជា នៅសណ្ឋាគារសុខាអង្គរ ខេត្តសៀមរាប ដោយមានការចូលរួមពីលោក-លោកស្រីប្រធានកុងស៊ុលប្រចាំស្ថានទូត អង្គភាពនគរបាលទេសចរណ៍ អង្គភាពនគរបាលការពារបេតិកភណ្ឌ ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិសៀមរាបអង្គរ លោក-លោកស្រី ស្នងការរង លោកនាយការិយាល័យដែលពាក់ព័ន្ធ និងលោកអធិការនគរបាលក្រុងសៀមរាបផងដែរ។

ក្នុងកិច្ចប្រជុំនោះ បានបូកសរុបកិច្ចសហប្រតិបត្តិការអនុវត្តការងារកន្លងមក ដែលអាចធានាបាននូវការគ្រប់គ្រងព័ត៌មាន ពាក់ព័ន្ធនឹងជនបរទេសដែលសំដៅបាននូវសន្តិសុខ សុវត្ថិភាព ជូនពួកគាត់ និងទំនាក់ទំនងការងារល្អ ព្រមទាំងអាចចូលរួមចំណែកក្នុងការទប់ស្កាត់រាល់បទល្មើសផ្សេងៗដែលកើតមានឡើង។ តាមរយៈការខិតខំប្រឹងប្រែងនេះ យើងពិនិត្យឃើញថា ក្នុងរយៈពេលកន្លងមកនេះ មិនមានសកម្មភាពណាមួយកើតឡើង ដែលបណ្តាលឱ្យប៉ះពាល់ធ្ងន់ធ្ងរ ដល់សុវត្ថិភាពជនបរទេសដែលកំពុងស្នាក់នៅក្នុងខេត្តសៀមរាប៕

ដោយ ឃុត សៅ