AKP កំពង់ធំ ថ្ងៃទី២០ ខែកុម្ភៈ ឆ្នាំ២០២៥-- ព្រះទេពសត្ថា សៀង សុខ ព្រះរាជាគណៈថ្នាក់ចត្វា និងជាព្រះសត្ថាបារមី ព្រះមេគណខេត្តកំពង់ធំ លោក តាន់ តៃជ្រាន់ ប្រធានមន្ទីរធម្មការ និងសាសនាខេត្ត លោក ឡង គីសឹង អភិបាលនៃគណៈអភិបាលស្រុកសន្ទុក បាននិមន្ត និងអញ្ជើញជាអធិបតី ក្នុងពិធីផ្សព្វផ្សាយខ្លឹមសារសង្ឃប្រកាសអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី៣២ សម្រាប់សន្ទុកដែលជាស្រុកទី៨ ក្នុងចំណោមក្រុង-ស្រុកទាំង០៩ ក្នុងខេត្តកំពង់ធំ ក្រោមការរៀបចំដោយព្រះនិម្មលធម្មមុនី សោម ជាន ព្រះរាជាគណ:ថ្នាក់កិត្តិយស និងជាព្រះគ្រូនិម្មលធម្មល័ក្ខណ៍ ព្រះអនុគណស្រុកសន្ទុកនិងមន្ត្រីសង្ឃ សហការី ជំនួយការ ដែលមានសមភាពនិមន្ត-អញ្ជើញចូលរួមចំនួន៤៩៧អង្គ/នាក់ ស្ថិតក្នុងវត្តតាំងក្រសាំង ឃុំតាំងក្រសាំង ស្រុកសន្ទុក ខេត្តកំពង់ធំ កាលពីរសៀលថ្ងៃទី១៩ ខែកុម្ភៈ ឆ្នាំ២០២៥។

លោក ឡង គីសឹង  អភិបាលស្រុកសន្ទុក បានលើកទឹកចិត្តដល់គ្រប់វត្តអារាម ត្រូវរៀបចំកែលម្អបរិស្ថានវត្តឱ្យក្លាយជាកន្លែងទេសចរណ៍វប្បធម៌សាសនា ប្រកបដោយសោភ័ណភាព កសាងរចនាសម្ព័ន្ធ ជាវត្តដែលស្រស់បំព្រងដោយធម្មជាតិពណ៌បៃតង មានសួនច្បារ សួនបន្លែ និងជាថ្នាលអប់រំដល់សាមណេរ ហើយត្រូវពិនិត្យកាយសម្បទានិងបុគ្គលិកលក្ខណៈអ្នកបួសមុននឹងបំបួស ចៀសវាងរឿងហេតុ មិនប្រក្រតីកើតឡើង ឬនាំឱ្យអាប់ឱនដល់ព្រះពុទ្ធសាសនាព្រោះព្រះពុទ្ធសាសនា ជាសាសនារបស់រដ្ឋ។

ក្នុងឱកាសនោះ លោក តាន់ តៃជ្រាន់ ប្រធានមន្ទីរធម្មការនិងសាសនាខេត្តកំពង់ធំ បានជំរុញគ្រប់វត្តក្នុងស្រុកសន្ទុក ទាំងអស់ ត្រូវអនុវត្តអភិក្រម៣នៃក្រសួងធម្មការ និងសាសនាដើម្បីឱ្យពុទ្ធបរិស័ទចំណុះជើងវត្ត គោរពប្រតិបត្តិឱ្យបានល្អនៅព្រះពុទ្ធសាសនានិងតម្កល់វត្តអារាមឱ្យបរិស្ថានស្អាត ទីកន្លែងអប់រំ វប្បធម៌ សីលធម៌ ចរិយាធម៌ស្ងប់ដោយគ្មាន ទំនាស់ ឬអំពើហិង្សាផ្សេងៗ ហើយព្រះសង្ឃមិនត្រូវទៅកាន់ទីអគោចរដ្ឋាន ជាពិសេសបញ្ឈប់ការនិមន្តរៃអង្គាសបច្ច័យតាមទីសាធារណៈដែលនាំឱ្យបាត់បង់សណ្ដាប់ធ្នាប់ និងអាប់ឱនព្រះពុទ្ធសាសនាដើម្បីលើកស្ទួយព្រះពុទ្ធសាសនា ប្រកបដោយការទទួលខុសត្រូវខ្ពស់។

ព្រះទេពសត្ថា សៀង សុខ មានសង្ឃដីកាថា ព្រះគ្រូចៅអធិការ លោកអាចារ្យគណៈកម្មការ ត្រូវពង្រឹងគុណវុឌ្ឍិព្រះសង្ឃគ្រប់អង្គ ឱ្យសិក្សារៀនសូត្រ ការប្រតិបត្តិសាសនាឱ្យបានខ្ជាប់ខ្ជួន ការគ្រប់គ្រងវត្តមានការបញ្ជូនព្រះសង្ឃទៅសិក្សារៀនសូត្របន្ត នៅក្រៅវត្ត ការរក្សានូវសាមគ្គីភាពផ្ទៃក្នុងឱ្យបានល្អរវាង ព្រះសង្ឃ លោកអាចារ្យ គណកម្មការ និងពុទ្ធបរិស័ទចំណុះជើងវត្ត ដើម្បីវឌ្ឍនភាពវត្តអារាម និងព្រះពុទ្ធសាសនាឱ្យមានការរីកចម្រើនពីមួយឆ្នាំទៅមួយឆ្នាំនិងបានលើកទឹកចិត្តដល់ព្រះសង្ឃព្រះគ្រូចៅអធិការ លោកអាចារ្យ គណៈកម្មការ និង ពុទ្ធបរិស័ទចំណុះជើងវត្ត ព្រមទាំងអាជ្ញាធរពាក់ព័ន្ធ ត្រូវជ្រើសរើស ព្រះគ្រូចៅអធិការវត្ត ត្រូវមាននាយកធម៌៦យ៉ាង ដើម្បីគ្រប់គ្រងដឹកនាំវត្តឱ្យបានរីកចម្រើន និងជាសសរទ្រូងពុទ្ធសាសនាដ៏រឹងមាំបំផុត។ សូមឱ្យព្រះចៅអធិការ គណៈកម្មការអាចារ្យវត្ត និងពុទ្ធបរិស័ទទាំងអស់ ចូលរួមផ្សព្វផ្សាយព្រះធម៌ដល់ពុទ្ធបរិស័ទនៅក្នុងមូលដ្ឋានឱ្យគោរពប្រតិបត្តិនូវអំពើល្អក្នុងសង្គម៕

ដោយ ស៊ុម វណ្ណា