AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៥–

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី២០ ខែកុម្ភៈ ឆ្នាំ២០២៥នេះ អញ្ជើញជាអធិបតី ក្នុងពិធី «បើកសប្តាហ៍គាំពារសង្គមកម្ពុជា ឆ្នាំ២០២៥ និង ប្រកាសដាក់ឱ្យអនុវត្តជាផ្លូវការ នូវ ក្របខណ្ឌគោលនយោបាយជាតិ គាំពារសង្គម ឆ្នាំ ២០២៤-២០៣៥ » នៅសណ្ឋាគារសុខា ភ្នំពេញ។

ចាប់តាំងពីឆ្នាំ ​២០២២ មក, ក្រុមប្រឹក្សាជាតិគាំពារសង្គម បានរៀបចំ សប្តាហ៍គាំពារសង្គមកម្ពុជា ជារៀងរាល់ឆ្នាំ។ សប្តាហ៍គាំពារសង្គម គឺជាវេទិកាមួយដែលផ្ដល់ឱកាសដល់ភាគី ពាក់ព័ន្ធ ដើម្បីពិភាក្សា និង ផ្លាស់ប្តូរទស្សនវិស័យ, គោលនយោបាយ, ចែករំលែកចំណេះដឹង, បទពិសោធ, និង ឧត្តមានុវត្តន៍នៃគោលនយោបាយគាំពារសង្គម ពីប្រទេសផ្សេងៗ, ទាំងក្នុងតំបន់ និង លើសកលលោក, ជាពិសេស ដើម្បីផ្សព្វផ្សាយពីវឌ្ឍនភាពនៃប្រព័ន្ធគាំពារសង្គម កម្ពុជា ដល់អ្នកទទួលផល និង សាធារណជន ឲ្យបានជ្រាបកាន់តែច្បាស់ ។ 

សម្រាប់ ឆ្នាំ ២០២៥ នេះ យើងទាំងអស់គ្នា ពិតជាមានកិត្តិយស និង មោទកភាពបំផុត ដោយ សម្តេចមហាបវរធិបតី​ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ផ្ដល់កិត្តិយសអញ្ជើញជាអធិបតីដ៏ខ្ពង់ខ្ពស់ ក្នុងពិធី «បើកសប្តាហ៍គាំពារសង្គមកម្ពុជា ឆ្នាំ ២០២៥ និង ប្រកាសដាក់ឱ្យអនុវត្តជាផ្លូវការ នូវ ក្របខណ្ឌគោលនយោបាយជាតិគាំពារសង្គម ឆ្នាំ ២០២៤-២០៣៥» ដ៏មហោឡារិកនេះ ។ ក្របខណ្ឌគោលនយោបាយជាតិគាំពារសង្គម ដំណាក់កាលថ្មីនេះ បានផ្លាស់ប្តូរអភិក្រមនៃការអភិវឌ្ឍប្រព័ន្ធគាំពារសង្គម ពីប្រព័ន្ធដែលគាំពារតាមបែបសសរស្តម្ភ មកជាប្រព័ន្ធដែលគាំពារតាមហានិភ័យនៃវដ្តជីវិត (Life-cycle risk approach), ពោលគឺ ផ្តល់ការគាំពារជូនពលរដ្ឋ ចាប់តាំងពីពេលចាប់កំណើតដំបូងនៅក្នុងផ្ទៃម្តាយ រហូតដល់ដំណាក់កាលចុងក្រោយនៃវដ្តជីវិតរបស់គាត់ ។ 

សប្តាហ៍គាំពារសង្គមកម្ពុជា ឆ្នាំ ២០២៥ ដែលមានរយៈពេលពីរថ្ងៃនេះ ត្រូវបានរៀបចំឡើង ក្រោមមូលបទ អភិវឌ្ឍប្រព័ន្ធគាំពារសង្គមកម្ពុជា ដើម្បីការគ្របដណ្តប់កាន់តែប្រសើរ ទៅតាមហានិភ័យនៃវដ្ដជីវិត និង អមដោយការធ្វើបទបង្ហាញគន្លឹះ, កិច្ចពិភាក្សាពេញអង្គ, កិច្ចពិភាក្សាតាមក្រុម, និង ការប្រកួតតស៊ូមតិរបស់យុវជន លើប្រធានបទពាក់ព័ន្ធ ដោយមានការចូលរួមពីគណៈអធិបតី, ភ្ញៀវកិត្តិយស ជាថ្នាក់ដឹកនាំក្រសួង-ស្ថាប័នពាក់ព័ន្ធ, អភិបាលនៃគណៈអភិបាលរាជធានី-ខេត្ត, ឯកអគ្គរាជទូត-ឯកអគ្គរដ្ឋទូត, តំណាងដៃគូអភិវឌ្ឍន៍ពាក់ព័ន្ធ, តំណាងស្ថាប័នស្រាវជ្រាវ, សិស្ស-និស្សិត និង អ្នកទទួលផល, សរុបចំនួនប្រមាណ ១ ០០០ នាក់, ទាំងអ្នកចូលរួមដោយផ្ទាល់នៅទីនេះ និង អ្នកចូលរួមតាមរយៈប្រព័ន្ធប្រជុំអនឡាញ។ 

ដើម្បីកសាងប្រព័ន្ធគាំពារសង្គមដែលមានលក្ខណៈរឹងមាំ, មានភាពធន់ និង មានប្រសិទ្ធភាព, រាជរដ្ឋាភិបាល បានរៀបចំ និង ដាក់ចេញនូវលិខិតបទដ្ឋានគតិយុត្ត, ឯកសារក្របខណ្ឌ, ផែនទីបង្ហាញផ្លូវ, យុទ្ធសាស្ត្រ, និង គោលការណ៍ណែនាំសំខាន់ៗ សម្រាប់ធ្វើ-ស្ថាប័នូបនីយកម្ម, ក៏ដូចជា សម្រាប់ការជំរុញការអនុវត្តកម្មវិធីជាតិជំនួយសង្គម និង របបសន្តិសុខសង្គមនានា ជាបន្តបន្ទាប់ ។ ជាមួយគ្នានេះ, យន្តការស្ថាប័នក្នុងប្រព័ន្ធគាំពារសង្គម ក៏ត្រូវបានកែទម្រង់, ពង្រឹង និង ពង្រីកមុខងារ ដើម្បីធានាដល់ការចាត់ចែង និង ការគ្រប់គ្រងកម្មវិធីជាតិជំនួយសង្គម និង របបសន្តិសុខសង្គម, ជាពិសេស ការផ្តល់អត្ថប្រយោជន៍ដល់ពលរដ្ឋគោលដៅ ប្រកបដោយប្រសិទ្ធភាព, តម្លាភាព និង គណនេយ្យភាព ។ 

បន្ថែមលើនេះ, រាជរដ្ឋាភិបាល​​ក៏បានរៀបចំបង្កើត និង ដាក់ឲ្យដំណើរការប្រព័ន្ធគាំពារសង្គមឌីជីថល ដើម្បីបង្កើនប្រសិទ្ធភាព, ស័ក្តិសិទ្ធភាព និង សម្រួលដល់ប្រតិបត្តិការកម្មវិធី និង របបនានា ក្នុងប្រព័ន្ធគាំពារសង្គម ក៏ដូចជា រៀបចំ និង អនុវត្តយន្តការតាមដាន និង វាយតម្លៃ ដើម្បីត្រួតពិនិត្យវឌ្ឍនភាពនៃការអនុវត្ត និង ធ្វើការកែសម្រួលឲ្យបានទាន់ពេល, ដែលកិច្ចការនេះ ត្រូវបានរាជរដ្ឋាភិបាល សម្រាប់នីតិកាលទី ៧ នៃរដ្ឋសភា ចាត់ទុកជាការងារដ៏សំខាន់ ក្នុងការវាស់វែងប្រសិទ្ធភាព និង លទ្ធផល នៃគោលនយោបាយដែលត្រូវបានដាក់ចេញ ។ ការកសាងប្រព័ន្ធនេះ បានផ្តល់មូលដ្ឋានគ្រឹះរឹងមាំ និង បានដើរតួជាកាតាលិករ ដ៏សំខាន់ ក្នុងការដាក់ចេញ និង ការពង្រីកវិសាលភាពប្រព័ន្ធគាំពារសង្គមជាបន្តបន្ទាប់ ដែលទទួល​បានការសាទរពី​សាធារណជន,​ ​នាពេលកន្លងទៅ, ដោយឈរលើអភិក្រម «ពង្រឹងប្រព័ន្ធ ដើម្បីពង្រីកការគ្របដណ្តប់» ៕ 

ដោយ៖ គង់ សិរីរ័ត្ន