AKP កំពង់ស្ពឺ ថ្ងៃទី១៨ ខែកុម្ភៈ ឆ្នាំ២០២៥ -- ឯកឧត្តម យឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ  ព្រមទាំងសហការី បានអញ្ជើញចូលរួមរំលែកមរណទុក្ខ និងគោរពវិញ្ញាណក្ខន្ធសព លោក ស្វាយ ជឿង មេឃុំមហាឫស្សី ស្រុកគង់ពិសី ដែលបានទទួលមរណៈ នាថ្ងៃចន្ទ ៥រោច ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃ ទី១៧ ខែកុម្ភៈ ឆ្នាំ២០២៥ វេលាម៉ោង៤:៣០ នាទីរសៀល ក្នុងជន្មាយុ ៧១ឆ្នាំ ដោយជរាពាធ។

ក្នុងនាមថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ នៃរដ្ឋបាលខេត្តកំពង់ស្ពឺ សូមសម្តែងនូវសមានទុក្ខ សង្វេគតក់ស្លុតរន្ធត់ចិត្តជាពន់ពេក អំពីដំណឹងដ៏ក្រៀមក្រំ នៃមរណភាពរបស់ លោក ស្វាយ ជឿង ដែលត្រូវជា ស្វាមី របស់ លោកស្រី ម៉ែន សុខ ដែលបានទទួលអនិច្ចកម្មនាថ្ងៃ ទី១៧ ខែកុម្ភៈ ឆ្នាំ២០២៥ ម្សិលមិញនេះ។ ការទទួលមរណភាពរបស់ លោក ស្វាយ ជឿង គឺជាការបាត់បង់ ស្វាមី ឪពុកបង្កើត ឪពុកក្មេក ជីតា ឪពុកមារ និងបងប្រុស ប្រកបដោយព្រហ្មវិហារធម៌ ដែលបានបូជាយកអស់កម្លាំងកាយ កម្លាំងចិត្ត តស៊ូខិតខំចិញ្ចឹមបីបាច់ថែរក្សា និងអប់រំទូន្មានបុត្រធីតា ឱ្យក្លាយទៅជាពលរដ្ឋល្អ និងជាធនធានមនុស្ស ដ៏មានតម្លៃរបស់សង្គមជាតិ។

ស្ថិតក្នុងបរិយាកាសទុក្ខដ៏ក្រៀមក្រំនេះ យើងខ្ញុំ សូមឧទ្ទិសបុណ្យកុសលទាំងឡាយ ដល់វិញ្ញាណក្ខន្ធ លោក ស្វាយ ជឿង សូមបានទៅចាប់បដិសន្ធិក្នុង សុគតិភព កុំបី ឃ្លៀងឃ្លាតឡើយ។ សូមលោកស្រី ម៉ែន សុខ និងក្រុមគ្រួសារ ទទួលនូវការចូលរួមរំលែកមរណទុក្ខ ដ៏ក្រៀមក្រំនេះ អំពីយើងខ្ញុំ។

ក្នុងឱកាសដ៏សែនក្រៀមក្រំនោះ ឯកឧត្តម ប្រធានក្រុមប្រឹក្សាខេត្ត ឯកឧត្តម អភិបាលខេត្ត និងសហការី បានឧទ្ទិសកុសលផលបុណ្យជូនដួងវិញ្ញាណក្ខ័ន្ធរបស់លោក​  មេឃុំមហាប្ញស្សី  សូមបានយោនយកកំណើតទៅកើតនៅសុគតិភពកុំបីឃ្លៀងឃ្លាតឡើយ៕

ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ