AKP បន្ទាយមានជ័យ ថ្ងៃទី១៨ ខែកុម្ភៈ ឆ្នាំ២០២៥-- ប្រជាពលរដ្ឋរស់នៅភូមិទំនប់ក៥ សង្កាត់ប៉ោយប៉ែតក្រុងប៉ោយប៉ែត ខេត្តបន្ទាយមានជ័យ ជាង១៧០០គ្រួសារ បានគោរពថ្លែងអំណរគុណយ៉ាងជ្រាលជ្រៅចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានជួយដោះស្រាយបញ្ចប់វិវាទដីធ្លីរ៉ាំរ៉ៃជាង២០ឆ្នាំ តាមបែបឈ្នះឈ្នះ និងបានពិសានំបញ្ចុកសាមគ្គីដោយក្តីរំភើបសប្បាយយ៉ាងក្រៃលែង ដោយពិធីអបអរសាទរនេះបានធ្វើឡើងកាលពីរសៀលថ្ងៃទី១៧ ខែកុម្ភៈ ឆ្នាំ២០២៥ ក្រោមអធិបតីភាពឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត ខេត្តបន្ទាយមានជ័យ។

ក្នុងពិធីពិសានំបញ្ចុកសាមគ្គីសន្តិភាពជាមួយបងប្អូនប្រជាពលរដ្ឋជាង១៧០០គ្រួសារ ក្នុងបរិវេណវត្តទំនប់ក៥ ឯកឧត្តមបណ្ឌិត ប៉ាន់ខែម ប៊ុនថន បានថ្លែងបញ្ជាក់យ៉ាងច្បាស់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តែងតែគិតគូរយកចិត្តទុកដាក់ខ្ពស់ជានិច្ចចំពោះសុខទុក្ខរបស់បងប្អូនប្រជាពលរដ្ឋកម្ពុជាគ្រប់រូប និងគ្រប់ទីកន្លែង។ ជាក់ស្តែងបងប្អូនប្រជាពលរដ្ឋនៅភូមិទំនប់ក៥ សង្កាត់ប៉ោយប៉ែត បានទទួលលទ្ធផលជាទីពេញចិត្ត ដោយបានបញ្ចប់វិវាទដីធ្លីរ៉ាំរ៉ៃជាង២០ឆ្នាំកន្លងមកនេះទាំងស្រុង តាមការផ្តល់អនុសាសន៍ណែនាំដ៏ខ្ពង់ខ្ពស់របស់សម្តេចធិបតី ឱ្យឯកឧត្តមបណ្ឌិត ប៉ាន់ខែម ប៊ុនថន ដឹកនាំសម្របសម្រួលដោះស្រាយបញ្ចប់វិវាទរ៉ាំរ៉ៃជាង២០ឆ្នាំជូនបងប្អូនប្រជាពលរដ្ឋ តាមបែបឈ្នះឈ្នះ។

ក្នុងឱកាសនោះ សម្តេចធិបតី នាយករដ្ឋមន្ត្រី ក៏បានឆ្លៀតពេលដ៏មានតម្លៃយ៉ាងមមាញឹក បានហៅទូរសព្ទ Video  Call មកជួបសំណេះសំណាលផ្ទាល់ជាមួយលោកយាយលោកតា ពូមីង បងប្អូន ប្រជាពលរដ្ឋ ដែលទើបបញ្ចប់វិវាទរ៉ាំរ៉ៃប្រកបដោយភាពស្និទ្ធស្នាលបំផុត ដែលធ្វើឱ្យប្រជាពលរដ្ឋកាន់តែរំភើបសប្បាយបំផុត។ ឆ្លើយតបនឹងមនោសញ្ចេតនានៃទឹកចិត្តសប្បុរសដ៏ថ្លៃថ្លាបំផុតរបស់សម្តេចធិបតី បងប្អូនប្រជាពលរដ្ឋដែលទើបបញ្ចប់វិវាទរ៉ាំរ៉ៃនៅភូមិទំនប់ក៥ បានសម្តែងអារម្មណ៍រីករាយត្រេកអររហូតស្រក់ទឹកភ្នែករលីងរលោងលាយឡំនឹងស្នាមញញឹមប្រកបដោយក្តីរំភើបសប្បាយយ៉ាងក្រៃលែង។

សម្តេចធិបតីបានចូលរួមអបអរសាទរជាមួយប្រជាពលរដ្ឋ ដែលរស់នៅភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ចំនួន១៧១៧គ្រួសារ ចំពោះការដោះស្រាយបញ្ចប់វិវាទរ៉ាំរ៉ៃជិត២៥ឆ្នាំ តាមរូបភាពឈ្នះ-ឈ្នះក្រៅប្រពន្ធ័តុលាការ និងបានកោតសរសើរ និងអរគុណចំពោះក្រុមការងារដឹកនាំដោយឯកឧត្តម ប៉ាន់ ខែមប៊ុនថន រដ្ឋបាលខេត្តបន្ទាយមានជ័យ អាជ្ញាធរមូលដ្ឋាន និងគ្រប់បណ្តាភាគីពាក់ព័ន្ធទាំងអស់ដែលបានខិតខំស្វែងរកដំណោះស្រាយជូនប្រជាពលរដ្ឋដោយជោគជ័យនោះ។

ជាមួយគ្នានេះដែរ បងប្អូនប្រជាពលរដ្ឋបាននាំយកទាំងមាន់ទា បន្លែ ផ្លៃឈើ ដូង ចេក ល្ហុង ខ្នុរ   ជាដើម ដែលជាភោគផលពួកគាត់បាន ចិញ្ចឹម ដាំដុះ មើលថែតាមផ្ទះ មកគោរពផ្ញើជូនសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈឯកឧត្តម បណ្ឌិត ប៉ាន់ខែម ប៊ុនថន ទុកជាវត្ថុភ្ជាប់និស្ស័យកំដរដៃ បញ្ជាក់អំពីចំណងទឹកចិត្តគោរពស្រឡាញ់ដ៏ស្ម័គ្រស្មោះ និងការដឹងគុណចំពោះសម្តេចធិបតី។

មានប្រសាសន៍ក្នុងឱកាសនោះឯកឧត្តម ប៉ាន់ខែម ប៊ុនថន បានបញ្ជាក់ថា ក្រោមនយោបាយឈ្នះឈ្នះរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា បានធ្វើឱ្យប្រទេសជាតិទាំងមូលទទួលបាននូវសុខសន្តិភាពពេញលេញ ហើយបន្តដឹកនាំដោយសម្តេចធិបតីហ៊ុន ម៉ាណែត នាយករដ្ឋមន្ត្រី ថែរក្សាបាននូវសុខសន្តិភាពបន្តជំរុញការអភិវឌ្ឍប្រទេសជាតិមានការរីកចម្រើនលើគ្រប់វិស័យ។

ឯកឧត្តម ប៉ាន់ខែម ប៊ុនថន ក៏បានថ្លែងកោតសរសើរចំពោះអាជ្ញាធរខេត្តក្រុមការងាររដ្ឋបាលក្រុង ប៉ោយប៉ែត កម្លាំងសមត្ថកិច្ចទាំងអស់ព្រមទាំងក្រុងប៉ោយប៉ែត ដែលបានយកចិត្តទុកដាក់ សហការគ្នាបានល្អ ប្រកបដោយទំនួលខុសត្រូវខ្ពស់ចំពោះការអនុវត្តការងារភារកិច្ចជូនប្រជាពលរដ្ឋនាពេលកន្លងមកនេះ៕

ដោយ ឈុន សារ៉ាត