AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៥-- អង្គការសត្វព្រៃ និងរុក្ខជាតិកម្ពុជា សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តកោះកុង តាមរយៈរដ្ឋបាលជលផល កាលពីថ្ងៃទី១៧ ខែកុម្ភៈ ឆ្នាំ ២០២៥ បានរៀបចំកិច្ចប្រជុំស្តីពីការផ្ទៀតផ្ទាត់ទិន្នន័យព័ត៌មាន និងទិន្នន័យពង្រាយផែនទីសេដ្ឋកិច្ចសង្គម និងធនធានធម្មជាតិនៅតំបន់គ្រប់គ្រងជលផលប្រជុំកោះស្តេច ដោយមានការចូលរួមពីតំណាងមកពីភូមិកោះស្តេច ឃុំកោះស្តេច ស្រុកគិរីសាគរ ខណ្ឌរដ្ឋបាលជលផលកោះកុង រដ្ឋបាលជលផលពាមក្រសោប និងសហគមន៍នេសាទសម្រស់កោះស្តេច។

គោលបំណងនៃកិច្ចប្រជុំនេះគឺផ្តល់ពេលវេលាសម្រាប់សមាជិកសហគមន៍ និងអាជ្ងាធរមូលដ្ឋាន ដើម្បីធ្វើការផ្ទៀងផ្ទាត់ព័ត៌មានគ្រួសារនីមួយៗ ការពិនិត្យ និងកែសម្រួលលើឯកសារផែនទីសេដ្ឋកិច្ចសង្គម និងធនធានធម្មជាតិនៅតំបន់គ្រប់គ្រងជលផលប្រជុំកោះស្តេចនេះ។ គម្រោងការរៀបចំផែនទីសេដ្ឋកិច្ចសង្គម និងធនធានធម្មជាតិត្រូវបានបង្កើតឡើងដើម្បីស្វែងយល់ពីការប្រើប្រាស់ និងការគ្រប់គ្រងដីធ្លី និងធនធានដែលមានស្រាប់ដោយភាគីពាក់ព័ន្ធ រួមមានជីវៈចម្រុះ និងទីជម្រក ការតាំងទីលំនៅ ទីតាំងសហគមន៍ ហេដ្ឋារចនាសម្ព័ន្ធ សេវាសាធារណៈ និងតំបន់សេដ្ឋកិច្ច។

ព័ត៌មានទាំងនេះនឹងត្រូវបានប្រើប្រាស់ក្នុងការបង្កើតជម្រើសហិរញ្ញប្បទានប្រកបដោយនិរន្តរភាព ក៏ដូចជាការរួមចំណែកក្នុងការលើកកម្ពស់ជីវភាពរស់នៅរបស់ប្រជាជន។ សកម្មភាពនេះត្រូវបានផ្តល់មូលនិធិដោយ Blue Action Fund៕

ដោយ ណយ នឿន (ប្រភព៖ Fauna & Flora)