AKP កំពង់ធំ ថ្ងៃទី១៧ ខែកុម្ភៈ ឆ្នាំ២០២៥-- 

ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក និងឧតុនិយម បានលើកឡើងថា ប្រឡាយទឹកថ្មីនៅឃុំទ្រានឹងជួយលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន និងបញ្ចៀសទឹកជំនន់ទីរួមស្រុកស្ទោង។ ការលើកឡើងបែបនេះបានធ្វើឡើងក្នុងឱកាសដែលឯកឧត្តម សហការី និងលោកសាយ គឹមឡម អភិបាលស្រុកស្ទោងអញ្ជើញ ចុះពិនិត្យមើលវឌ្ឍនភាពជីកប្រឡាយ១ខ្សែនៅនៅឃុំទ្រាស្រុកស្ទោង ខេត្តកំពង់ធំ កាលពីរសៀលថ្ងៃទី១៦ ខែកុម្ភៈ ឆ្នាំ២០២៥។ 

ឯកឧត្តម ឈា ប៊ុនរិទ្ធ បានបញ្ជាក់ថា ប្រឡាយថ្មីនេះមិនត្រឹមតែជាប្រព័ន្ធជារាស្រ្តស្រោចស្រពដ៏មានសក្តានុពលនោះទេ ប៉ុន្តែវាជាប្រព័ន្ធរំដោះទឹកដ៏មានប្រសិទ្ធភាព ដែលអាចបញ្ចៀសជំនន់ទឹកស្ទឹងស្ទោង ហើយក៏ជាផ្លូវគមនាគមន៍ដ៏មមាញឹកសម្រាប់ប្រជាកសិករនៅក្នុងមូលដ្ឋានក្នុងការដឹកជញ្ជូនកសិផល ដែលអាចរួមចំណែកលើកកម្ពស់ជីវភាពប្រជាពលរដ្ឋនៅក្នុងឃុំទ្រា ក៏ដូចជាស្រុកស្ទោងទាំងមូលឱ្យកាន់តែប្រសើរឡើងជាងមុនជាពិសេស ជាការយកចិត្តទុកដាក់ខ្ពស់ និងស្របតាមគោលនយោបាយយុទ្ធសាស្ត្ររបស់រាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃរបស់សម្ដេចធិបតី ហ៊ុន ម៉ាណែត រដ្ឋមន្ត្រីនៃព្រះរាជាណាចក្រកម្ពុជា។ 

ឯកឧត្តមបានមានប្រសាសន៍បន្ថែមថា ជាមួយនឹងគម្រោងអភិវឌ្ឍន៍ស្ទឹងស្ទោង និងអាងទឹក៣០កញ្ញា ព្រមទាំងប្រព័ន្ធធារាសាស្ត្រជាច្រើនទៀត ពិតជារួមចំណែកយ៉ាងធំធេងក្នុងការអភិវឌ្ឍស្រុកស្ទោង ជាពិសេសប្រឡាយថ្មីនេះមិនត្រឹមតែជាប្រព័ន្ធស្រោចស្រពវាលស្រែធំល្វឹងល្វើយនោះទេ ប៉ុន្តែវានឹងប្រែក្លាយទៅជាភូមិឋានដ៏ស្អេកស្កះខៀវស្រងាត់ ស្រស់បំព្រង នៅក្នុងរយៈពេលដ៏ខ្លីខាងមុខ។ សូមបញ្ជាក់ថា ប្រឡាយថ្មីនេះមានប្រវែង ៥៧២៧ម៉ែត្រ បាតក្រោម៣ម៉ែត្រ មាត់លើ១២ម៉ែត្រ ផ្លូវអមសងខាងប្រឡាយម្ខាង៤ម៉ែត្រ ដែលលាតសន្ធឹងគ្របដណ្ដប់លើ៤ភូមិនៃឃុំទ្រា ស្រុកស្ទោង ខេត្តកំពង់ធំ៕

ដោយ ស៊ុម វណ្ណា