AKP កណ្ដាល ថ្ងៃទី១៧ ខែកុម្ភៈ ឆ្នាំ២០២៥--

លោក ឌឹម បូរ៉ា អភិបាលរងខេត្តកណ្តាល នៅថ្ងៃទី១៧ ខែកុម្ភ: ឆ្នាំ២០២៥ បានដឹកនាំកិច្ចប្រជុំស្តីពីការពិនិត្យវឌ្ឍនភាពជំរុញការអនុវត្តសេចក្តីជូនដំណឹងលេខ ១៦៩៧ សជណ របស់រដ្ឋបាលខេត្តកណ្តាល។ លោកអភិបាលរងខេត្តបានលើកឡើងថា កន្លងមករដ្ឋបាលខេត្តបានពិនិត្យឃើញថា ក្នុងភូមិសាស្ត្រខេត្តកណ្តាលមានអាជីវកម្មអភិវឌ្ឍអចលនវត្ថុ និងបញ្ចាំមួយចំនួននៅមិនទាន់មានអាជ្ញាបណ្ណ ឬលិខិតអនុញ្ញាតអាជីវកម្មនៅឡើយ។

ដូចនេះដើម្បីទប់ស្កាត់នូវសកម្មភាពប្រកបអាជីវកម្មដោយគ្មានអាជ្ញាបណ្ណ ឬលិខិតអនុញ្ញាត ព្រមទាំងលើកទឹកចិត្តដល់ការធ្វើធុរកិច្ចប្រកបដោយសុច្ចរិត រដ្ឋបាលខេត្តកណ្តាល សូមក្រើនរំលឹកដល់ ម្ចាស់អាជីវកម្មអភិវឌ្ឍលំនៅឋាន អាជីវកម្មអភិវឌ្ឍអគារ សហកម្មសិទ្ធ អាជីវកម្មអភិវឌ្ឍដីឡូត៍ អាជីវកម្មបញ្ចាំ និងប្រាតិភោគដោយអនុប្បទានទាំងអស់ត្រូវរៀបចំបំពេញបែបបទ និងនីតិវិធីស្នើសុំអាជ្ញាបណ្ណ ឬលិខិតអនុញ្ញាតអាជីវកម្ម ចាប់ពីថ្ងៃជូនដំណឹងនេះ រហូតដល់ថ្ងៃទី២៨ ខែកុម្ភៈ ឆ្នាំ២០២៥ ក្នុងកិច្ចប្រជុំនេះមានការចូលរួមពីមន្ទីរអង្គភាពពាក់ព័ន្ធ អាជ្ញាធរក្រុង ស្រុកទាំង១៣ និងមន្ត្រីរាជការជាច្រើនរូបផងដែរ។

សូបបញ្ជាក់ថា កន្លងមករដ្ឋបាលខេត្តកណ្តាលបានជូនដំណឹងដល់សាធារណជនថា រាល់ការប្រកបអាជីវកម្ម អភិវឌ្ឍលំនៅឋាន អាជីវកម្មអភិវឌ្ឍអគារសហកម្មសិទ្ធ អាជីវកម្មអភិវឌ្ឍដីឡូត៍ អាជីវកម្មបញ្ចាំ និងប្រាតិភោគដោយអនុប្បទាន ត្រូវមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ ឬលិខិត អនុញ្ញាតពីមន្ទីរសេដ្ឋកិច្ច និងហិរញ្ញវត្ថុខេត្ត៕ 

ដោយ ណយ នឿន (ប្រភព៖ រដ្ឋបាលខេត្តកណ្តាល)