AKP កំពង់ធំ ថ្ងៃទី១២ ខែកុម្ភៈ ឆ្នាំ២០២៥--

ដោយអនុវត្តតាមបទបញ្ជារបស់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នាព្រឹកថ្ងៃទី១២ ខែកុម្ភៈ ឆ្នាំ២០២៥ លោកវរសេនីយ៍ទោ សេង សំអុល នាយសេនាធិការរង និងជាប្រធានក្រុមទីបញ្ជាការស្រាលប្រចាំការបង្រ្កាបបទល្មើសនេសាទនៅតំបន់ឃុំផាត់សណ្ដាយ បានបន្តដឹកនាំកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដោយសហការជាមួយកម្លាំងចម្រុះប្រចាំការនៅទីបញ្ជាការស្រាលឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ និងមានការណែនាំរបស់មន្ត្រីជំនាញជលផលសង្កាត់ប្រចាំការនៅទីបញ្ជាការស្រាល បន្តធ្វើសកម្មភាពកម្ទេចឧបករណ៍នេសាទល្មើសច្បាប់ ដែលកំពុងធ្វើសកម្មភាពនៅតំបន់ព្រែកតាសោម ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។

លោកវរសេនីយ៍ទោ សេង សំអុល បានបញ្ជាក់ថា នៅថ្ងៃនេះកងកម្លាំងនៃបញ្ជាការដ្ឋានតំបន់ប្រតិបត្តិការសឹករកកំពង់ធំ ដោយបានការសហការជាមួយកម្លាំងចម្រុះ និងដោយមានការណែនាំបង្ហាញពីមន្ត្រីជលផល សង្កាត់ផាត់សណ្ដាយ ស្រុកកំពង់ស្វាយ កងកម្លាំងចម្រុះបានធ្វើការរុះរើ និងបំផ្លាញចោលឧបករណ៍នេសាទល្មើសច្បាប់រួមមាន៖ សាច់អួនចំនួន១១ របាំងប្រវែង ៣៣០០ម៉ែត្រ ឡុកចំនួន២២ លប/លូចំនួន២២ និងបង្គោលចំនួន៤៥០០ដើម។

ឧត្តមសេនីយ៍ទោ សោម ស៊ុន បានកោតសរសើរចំពោះកងកម្លាំងចម្រុះទាំងអស់ ដែលបានខិតខំបំពេញភារកិច្ចដោយមិនខ្លាចនឿយហត់ និងបានណែនាំប្រគល់ភារកិច្ចបន្ថែមដល់កងកម្លាំងចម្រុះទាំងអស់ ពិសេសកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវសហប្រតិបត្តិការឱ្យបានល្អ ក្នុងការបន្តធ្វើសកម្មភាពបំផ្លាញឧបករណ៍នេសាទល្មើសច្បាប់ និងបង្ក្រាបបទល្មើសនេសាទខុសច្បាប់ឱ្យទទួលបានជោគជ័យតាមបទបញ្ជារបស់ប្រមុខរាជរដ្ឋាភិបាល និងបទបញ្ជារបស់ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងបទបញ្ជារបស់ឯកឧត្តមអភិបាលខេត្តប្រធានគណៈបញ្ជាការឯកភាពរដ្ឋបាលខេត្ត ដោយគ្មានការដកថយឡើយ និងបានប្តេជ្ញាចិត្តមិនឱ្យមានបទល្មើសនេសាទកើតឡើងដដែលៗទៀតបានឡើយ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)