AKP កំពង់ឆ្នាំង ថ្ងៃទី១១ ខែកុម្ភៈ ឆ្នាំ២០២៥-- ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីក្នុងពិធីបើកកិច្ចប្រជុំអន្តរក្រសួងពិភាក្សាបញ្ចប់ការដោះស្រាយវិវាទដីធ្លី និងពិភាក្សាការងារគ្រប់គ្រងដីនៅតំបន់បឹងទន្លេសាបនៃខេត្តកំពង់ឆ្នាំង ដោយមានការអញ្ជើញចូលរួមពីឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង ឯកឧត្តម ស៊ីវ រុន ប្រធានក្រុមប្រឹក្សាខេត្តកំពង់ឆ្នាំង លោក លោកស្រី អភិបាលរងខេត្ត ប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ប្រភេទ ក្រុមការងារ អាជ្ញាធរបឹងទន្លេសាប អភិបាលក្រុង-ស្រុក នឹងមេឃុំ ចៅសង្កាត់ ផងដែរ។

ក្នុងឱកាសនោះ ឯកឧត្តម សាយ សំអាល់ បានលើកឡើងស្ដីពីការផ្សព្វផ្សាយឱ្យបានទូលំទូលាយ ដល់ប្រជាពលរដ្ឋនៅមូលដ្ឋានអំពីកន្លែងការពារ និងអភិរក្សជលផល និងបញ្ញត្តិពាក់ព័ន្ធនៃច្បាប់ជលផល  ពង្រឹងការអនុវត្តច្បាប់ជលផលឱ្យបានម៉ឺងម៉ាត់ប្រកបដោយស្មារតីទទួលខុសត្រូវ និងប្រើប្រាស់កម្លាំង និងធនធានមនុស្សឱ្យអស់លទ្ធភាពក្នុងការអនុវត្តន៍ការងារឱ្យបានជោគជ័យថែមទៀត។

ទន្ទឹមនឹងនេះ ឯកឧត្តមបានបន្តថា ក្រោយពីការវាស់វែងកាត់ឆ្វៀលតំបន់១ តំបន់២ និងតំបន់៣ របស់ក្រុមការងារបច្ចេកទេស អាជ្ញាធរបឹងទន្លេសាប ស្ថាប័នមន្ទីរជំនាញពាក់ពន្ធ័ ថ្នាក់ដឹកនាំខេត្ត អាជ្ញាធរមូលដ្ឋានពាក់ព័ន្ធ ក្នុងការចូលរួមការពារ ថែរក្សាធនធានធម្មជាតិ និងបរិស្ថាននៃតំបន់បឹងទន្លេសាប។ ការងារអចិន្ដ្រៃយ៍ត្រូវថែរក្សាគ្រប់គ្រងឱ្យបានល្អ ដោយអាជ្ញាធរទន្លេសាប ត្រូវពង្រឹងយន្ដការគ្រប់គ្រង ដើម្បីធានាដល់ការដឹកនាំសម្របសម្រួលគ្រប់គ្រង ដែលមានស្ថាប័ន អាជ្ញាធរពាក់ព័ន្ធ និងរដ្ឋបាលខេត្តចំនួន៦ ដែលជាប់បឹងទន្លេសាបតែម្ដង។

ឯកឧត្តមឧបនាយករដ្ឋមន្រ្តីបានជម្រាបជូនពីគោលនយោបាយ អនុសាសន៍ណែនាំរបស់រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការការពារ ថែរក្សាដែនព្រៃលិចទឹក និងព្រៃលិចទឹកតំបន់៣ ព្រមទាំងបានណែនាំដល់អាជ្ញាធរដែនដីចូលរួមទប់ស្កាត់ការបន្តចូលអាស្រ័យផលដីតំបន់៣ ការរុករានទន្ទ្រានព្រៃលិចទឹក និងពង្រឹងការអនុវត្តច្បាប់ បទដ្ឋានគតិយុត្ត ធ្វើការផ្សព្វផ្សាយដល់ប្រជាពលរដ្ឋនៅក្នុងមូលដ្ឋានជាក់ស្តែង ឱ្យជួយថែរក្សា និងទប់ស្កាត់បទល្មើសនេសាទជាប្រចាំឱ្យបានប្រសិទ្ធភាព និងប្រសិទ្ធផលខ្ពស់នៅឆ្នាំ២០២៥ និងឆ្នាំខាងមុខបន្ថែមទៀត៕

ដោយ បៃ ស៊ីថុន