AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៥--នៅទីបំផុត ក្រុមបាល់ទាត់នារីភ្នំពេញក្រោនបានឈ្នះជើងឯកលីគនារីកម្ពុជា រដូវកាល ២០២៤-២០២៥ បន្ទាប់ពីបានយកឈ្នះក្រុមវិសាខា នៅវគ្គផ្តាច់ព្រ័ត្រ ដោយលទ្ធផលបច្ចេកទេស ២-០ នៅទីលានមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) កាលពីល្ងាចថ្ងៃទី០៨ ខែកុម្ភៈ ឆ្នាំ២០២៥។

នេះជាការគ្រងជើងឯកលើកទី២របស់ក្រុនារីភ្នំពេញក្រោនជាលើកទី២ បន្ទាប់ពីធ្លាប់ឈ្នះជើងឯក លើកទី១ កាលពីរដូវកាល ២០២១-២០២២។ ក្រុមភ្នំពេញក្រោនបានបញ្ចប់ការប្រកួតវគ្គសន្សំពិន្ទុទាំងពីរជុំ ស្មើនឹង១៨ប្រកួត ដោយឈ្នះ១៦ប្រកួត ស្មើ១ និងចាញ់១ មាន៤៩ពិន្ទុ ហើយឈររង់ចាំនៅវគ្គផ្តាច់ព្រ័ត្រ ខណៈវិសាខា បញ្ចប់១៨ប្រកួត ឈ្នះ១៤ ស្មើ២ និងចាញ់២ មាន៤៤ពិន្ទុ ហើយឈររង់ចាំនៅវគ្គពាក់កណ្តាលផ្តាច់ព្រ័ត្រ ហើយវិសាខាបានយកឈ្នះណាហ្គាវើលដ៍ ៤-៣ នៅវគ្គពាក់កណ្តាលផ្តាច់ព្រ័ត្រ។ ក្រុមវិសាខាបានឡើងមកប្រកួតជាមួយភ្នំពេញក្រោន នៅវគ្គផ្តាច់ព្រ័ត្រ ហើយភ្នំពេញក្រោនបានយកឈ្នះ ២-០ ដើម្បីគ្រងម្ចាស់ជើងឯករដូវកាល ២០២៤-២០២៥ នេះតែម្តង។

ចំពោះក្រុមវិសាខា ទទួលបានចំណាត់ថ្នាក់ថ្នាក់លេខ២ ខណៈក្រុមណាហ្គាវើលដ៍ ទទួលបានចំណាត់ថ្នាក់លេខ៣ និងជាក្រុម Fair Play។ ចំពោះជ័យលាភីឯកត្តជន រួមមាន៖ អ្នកគ្រូ ម៉ៅ សាវិន គ្រូបង្វឹកក្រុមភ្នំពេញក្រោន ឈ្នះពានរង្វាន់គ្រូបង្វឹកល្អជាងគេ, កីឡាការិនី សឹម មៃសំ របស់វិសាខា ឈ្នះពានកីឡាការិនីល្អជាងគេ និងឈ្នះពានរង្វាន់ទាត់បញ្ជូលទីច្រើនជាងគេ, កីឡាការិនី ជា ហ្វារីយ៉ា របស់ភ្នំពេញក្រោន ឈ្នះពានអ្នកចាំទីល្អជាងគេ។ ពិធីបិទការប្រកួត និងបំពាក់មេដាយ ពានរង្វាន់ទទួលបានកិត្តិយសពីឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា តំណាងដ៏ខ្ពស់ខ្ពស់ឯកឧត្តម នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា (FFC)។

គួរបញ្ជាក់ថា ការប្រកួតកីឡាបាល់ទាត់លីគនារីកម្ពុជា (Cambodian Women League) រដូវកាល ២០២៤-២០២៥ មាន១០ចូលរួមប្រជែងជើងឯក ដោយដំណើរការប្រកួតពីថ្ងៃទី១៧ ខែសីហា ឆ្នាំ២០២៤ ដល់ថ្ងៃទី០៨ ខែកុម្ភៈ ឆ្នាំ២០២៥ ដែលប្រកួតលក្ខណៈក្នុងដី និងក្រៅដីចំនួន២ជើង ដោយមាន១៨សប្តាហ៍។ គួររម្លឹកថា ក្រោយបញ្ចប់២ជើង គឺ៤ក្រុមលើកំពូលតារាង ត្រូវប្រជែងគ្នាដើម្បីស្វែងរកជើងឯក ក្នុងនោះក្រុមចំណាត់ថ្នាក់លេខ៣ ត្រូវជួបក្រុមលេខ៤ ដែលមានក្រុមព្រះខ័នរាជស្វាយរៀង ប៉ះណាហ្គាវើលដ៍ ខណៈក្រុមលេខ២ (វិសាខា ឈររង់ចាំនៅវគ្គពាក់កណ្តាលផ្តាច់ព្រ័ត្រ និងក្រុមលេខ១ (ភ្នំពេញក្រោន) ឈរនៅវគ្គផ្តាច់ព្រ័ត្រ៕

ដោយ ហេង ណាលីន