AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥--ការប្រកួតកីឡាបាល់ទាត់ ពានរង្វាន់សម្តេចតេជោ ហ៊ុន សែន លើកទី១៨ រដូវកាល ២០២៤-២០២៥ បានរកឃើញ៤ក្រុម គឺវិសាខា ភ្នំពេញក្រោន ទ័ព និងបឹងកេត ដែលបានកក់កៅអីវគ្គ៨ក្រុមចុងក្រោយ បន្ទាប់ពីបានយកឈ្នះលើគូប្រជែងរៀងៗខ្លួនសរុបទាំងពីរជើង ក្នុងការវគ្គ១៦ក្រុមថ្នាក់ជាតិ។

សម្រាប់ការប្រកួតវគ្គ១៦ក្រុមថ្នាក់ជាតិ ដែលបានបញ្ចប់៤ប្រកួតជាបន្តបន្ទាប់ រួមមាន៖ ក្រុមវិសាខា បានយកឈ្នះក្រុម ឡាយអ៊ិនឃីង ដោយលទ្ធផលបច្ចេកទេស ៥-០ កាលពីយប់ថ្ងៃទី០៦ ខែកុម្ភៈ ឆ្នាំ២០២៥ សរុបលទ្ធផលទាំងពីរជើង ៨-០។ ភ្នំពេញក្រោនបានយកឈ្នះក្រុមឈើតុំខេត្តពោធិ៍សាត់ ដោយលទ្ធផលសរុបទាំងពីរជើង ៩-០ ខណៈជើងទី២ ភ្នំពេញក្រោនឈ្នះក្រុមឈើតុំ ៧-០។ ចំពោះ ក្រុមទ័ព បានយកឈ្នះក្រុមអង្គរថាយហ្គឺរ ទាំងពីរជើង ដោយលទ្ធផលបច្ចេកទេស ៦-៣ ខណៈក្នុងការប្រកួតជើងទី២ ក្រុមទាំងពីររក្សាបានលទ្ធផលស្មើគ្នា ៣-៣ ដោយ២ប្រកួតនេះ សម្រាប់ជើងទី២ បានធ្វើឡើង កាលពីថ្ងៃទី០៥ ខែកុម្ភៈ ឆ្នាំ២០២៥។

ចំពោះក្រុមបឹងកេត ក៏បានឡើងវគ្គ៨ក្រុមចុងក្រោយថ្នាក់ជាតិផងដែរ ក្រោយពីបានយកឈ្នះក្រុមមន្ទីរអប់រំ យុវជន និងកីឡាខេត្តកំពង់ចាម ក្នុងលទ្ធផល ១៦-១ ខណៈការប្រកួតជើងទី២ បឹងកេតបានយកឈ្នះមន្ទីរអប់រំខេត្តកំពត់ចាម ៦-០ កាលពីថ្ងៃទី២៩ ខែមករា ឆ្នាំ២០២៥។ ដូច្នេះពេលនេះ ពានរង្វាន់សម្តេចតេជោហ៊ុន សែន ថ្នាក់ជាតិ វគ្គ១៦ក្រុមបានរកឃើញ៤ក្រុមហើយ ក្នុងចំណោម៨ក្រុមឡើងទៅវគ្គ៨ក្រុមចុងក្រោយ។

គួរបញ្ជាក់ថា ការប្រកួតកីឡាបាល់ទាត់ ពានរង្វាន់សម្តេចតេជោ ហ៊ុន សែន រដូវកាល ២០២៤-២០២៥នេះត្រូវបានចែកចេញជាពីថ្នាក់ដូចរដូវកាលមុនៗដែរ ដោយការប្រកួតថ្នាក់ខេត្តមានក្រុមថ្នាក់ខេត្តនានាបានចូលរួមប្រកួតប្រជែងជ័យលាភី ហើយក្រុមជ័យលាភីថ្នាក់ខេត្តទាំងនេះបានឡើងមកប្រកួតថ្នាក់ជាតិជាមួយបណ្តាក្រុមនានា ដែលឈរជើងក្នុងក្របខណ្ឌជម្រើសជើងឯកខេមបូឌានព្រីមៀរលីគ ដែលជាកម្រិតលីគកំពូលកម្ពុជា ដែលហៅថា ការប្រកួតថ្នាក់ជាតិ ដែលមាន១៦ក្រុម៕

ដោយ ហេង ណាលីន (រូបភាព៖ HUN SEN CUP)