AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- រដ្ឋមន្ត្រីការបរទេសចិន លោកវ៉ាង យី (Wang Yi) បាននិយាយកាលពីថ្ងៃចន្ទថា ប្រទេសចិន និងឥណ្ឌាគួរតែខិតខំស្វែងរកការយោគយល់គ្នា ការគាំទ្រ និងកិច្ចសហការគ្នា ជាជាងការជំរុញឱ្យមានការសង្ស័យ ការផ្តាច់ខ្លួន និងការប្រើប្រាស់គ្នាទៅវិញទៅមក។

លោក វ៉ាង ជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានធ្វើការកត់សម្គាល់នេះក្នុងអំឡុងពេលកិច្ចប្រជុំជាមួយរដ្ឋមន្ត្រីការបរទេសឥណ្ឌាលោក វីក្រាម មីស្រ៊ី (Vikram Misri) នៅទីក្រុងប៉េកាំង។

លោក វ៉ាង បាននិយាយថា ការធ្វើឱ្យប្រសើរឡើង និងការអភិវឌ្ឍនៃទំនាក់ទំនងចិន-ឥណ្ឌា គឺស្របតាមផលប្រយោជន៍ជាមូលដ្ឋានរបស់ប្រទេសនិងប្រជាជនទាំងពីរ ហើយមានអំណោយផលដល់ការការពារសិទ្ធិ និងផលប្រយោជន៍ស្របច្បាប់ និងរួមចំណែកដល់សន្តិភាព ស្ថិរភាព ការអភិវឌ្ឍនិងវិបុលភាពនៃទ្វីបអាស៊ី និងពិភពលោក។

លោក មីស្រ៊ី បាននិយាយថា ប្រទេសឥណ្ឌា និងចិនបានអនុវត្តន៍កិច្ចសន្ទនា និងការប្រាស្រ័យទាក់ទងដ៏មានសារៈប្រយោជន៍ជាបន្តបន្ទាប់ស្របតាមការឯកភាពគ្នារបស់មេដឹកនាំនៃប្រទេសទាំងពីរនៅទីក្រុងកាហ្សាន ដោយបានគ្រប់គ្រង និងដោះស្រាយភាពខ្វែងគំនិតគ្នា ព្រមទាំងជំរុញការបន្តកិច្ចសហប្រតិបត្តិការប្រកបដោយប្រសិទ្ធភាពក្នុងវិស័យផ្សេងៗ។

លោក មីស្រ៊ី បានបន្ថែមថា ប្រទេសឥណ្ឌាមានឆន្ទៈក្នុងការប្រារព្ធខួបលើកទី៧៥ នៃការបង្កើតទំនាក់ទំនងការទូតជាមួយប្រទេសចិន ហើយនឹងគាំទ្រយ៉ាងពេញទំហឹងចំពោះការងាររបស់ប្រទេសចិនក្នុងនាមជាប្រធាននៃអង្គការសហប្រតិបត្តិការសៀងហៃ៕

ដោយ៖ មូល មិនា (ប្រភព៖ ភីបផលដេលី)