AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- យោង​តាម​អ្នក​នាំ​ពាក្យ​ក្រសួង​ការ​បរទេស​កាតា ​កាល​ពី​ថ្ងៃ​ចន្ទ បានឱ្យដឹងថា អ៊ីស្រាអែល និងក្រុមហាម៉ាស់បានឈានដល់កិច្ចព្រមព្រៀងមួយស្តីពីការដោះលែងចំណាប់ខ្មាំងអ៊ីស្រាអែលចំនួន ៦នាក់ក្នុងសប្តាហ៍នេះ និងដើម្បីអនុញ្ញាតឱ្យអ្នករស់នៅក្នុងតំបន់ហ្គាហ្សាដែលផ្លាស់ទីលំនៅត្រឡប់ពីភាគខាងត្បូងទៅតំបន់ភាគខាងជើង។

អ្នកនាំពាក្យ លោក ម៉ាចេដ អាល់ អានសារី (Majed Al Ansari) បានបង្ហោះនៅលើប្រព័ន្ធផ្សព្វផ្សាយអ៊ិចថា «ជាផ្នែកមួយនៃកិច្ចខិតខំប្រឹងប្រែងដែលកំពុងបន្តដឹកនាំដោយអ្នកសម្របសម្រួល ការយោគយល់មួយត្រូវបានកំណត់រវាងភាគីទាំងពីរ» ដោយលោកបានកត់សម្គាល់ថា ចំណាប់ខ្មាំងជនជាតិអ៊ីស្រាអែល លោកស្រី អាប៊ែល យេហ៊ូដា (Arbel Yehuda)និង២នាក់ទៀតនឹងត្រូវដោះលែងមុនថ្ងៃសុក្រ ហើយចំណាប់ខ្មាំង ៣នាក់ទៀតនឹងត្រូវដោះលែងនៅថ្ងៃសៅរ៍ដោយក្រុមហាម៉ាស់ បន្ទាប់ពីកិច្ចព្រមព្រៀង។

លោក អាល់ អានសារី បាននិយាយថា «ជាការតបស្នង អាជ្ញាធរអ៊ីស្រាអែលបានចាប់ផ្តើម កាលពីថ្ងៃចន្ទដោយអនុញ្ញាតឱ្យពលរដ្ឋភៀសខ្លួននៅតំបន់ហ្គាហ្សាស្ទ្រីបត្រឡប់ពីភាគខាងត្បូងទៅកាន់តំបន់ភាគខាងជើង។ លើសពីនេះទៀត អ៊ីស្រាអែលនឹងផ្តល់បញ្ជីមនុស្សចំនួន ៤០០នាក់ដែលត្រូវបានឃុំខ្លួនចាប់តាំងពីថ្ងៃទី៧ ខែតុលា ឆ្នាំ២០២៣ ក្នុងដំណាក់កាលដំបូងនៃកិច្ចព្រមព្រៀង»៕

ដោយ៖ មូល មិនា (ប្រភព៖ ភីបផលដេលី)