AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- កាលពីព្រឹកថ្ងៃចន្ទ ប្រជាជនប៉ាឡេស្ទីនរាប់ពាន់នាក់ បានចាប់ផ្តើមវិលត្រឡប់ទៅតំបន់ហ្គាហ្សាស្រ្ទីបភាគខាងជើងវិញ ដែលជាផ្នែកមួយនៃបទឈប់បាញ់គ្នារវាងអ៊ីស្រាអែលនិងក្រុមហាម៉ាស់ប៉ាឡេស្ទីន ដែលបានចូលជាធរមាននៅថ្ងៃទី១៩ ខែមករា។

យោងតាមសាក្សី និងអ្នកឆ្លើយឆ្លងព័ត៌មានអាណាដូលូ (Anadolu)បានឱ្យដឹងថា មនុស្សរាប់ពាន់នាក់បានធ្វើដំណើរដោយថ្មើរជើងឆ្ពោះទៅភាគខាងជើងតំបន់ហ្គាហ្សា តាមរយៈផ្លូវឆ្នេរសមុទ្រអាល់-រ៉ាស៊ីដ នៅវេលាម៉ោង ៧:០០ព្រឹក (ម៉ោងក្នុងស្រុក)។

សកម្មជនប្រព័ន្ធផ្សព្វផ្សាយសង្គមប៉ាឡេស្ទីនបានបង្ហោះវីដេអូនៃក្រុមមនុស្សស្រែកច្រៀង និងអបអរសាទរ ខណៈដែលពួកគេវិលត្រឡប់ទៅតំបន់របស់ពួកគេវិញ។

ការិយាល័យប្រព័ន្ធផ្សព្វផ្សាយហ្គាហ្សា បាននិយាយនៅពេលមុននេះថា ប្រជាជនអាចធ្វើដំណើរទៅកាន់ភាគខាងជើងហ្គាហ្សាដោយថ្មើរជើងមិនមែនតាមរយៈយានជំនិះនោះទេ ដោយត្រូវឆ្លងកាត់តាមដងផ្លូវឆ្នេរសមុទ្រនៅវេលាម៉ោង ៧:០០ព្រឹក៕

ដោយ៖ យា ចិន្ដាខន្ដី (ប្រភព៖ AA-AKP)