AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- សហរដ្ឋអាមេរិកបានបញ្ជាក់កាលពីថ្ងៃអាទិត្យថា អ៊ីស្រាអែល និងលីបង់បានព្រមព្រៀងទៅលើការពន្យាពេលកំណត់សម្រាប់ការដកកងទ័ពអ៊ីស្រាអែលចេញពីភាគខាងត្បូងលីបង់រហូតដល់ថ្ងៃទី១៨ ខែកុម្ភៈ។

កិច្ចព្រមព្រៀង​ដែល​ត្រូវ​សម្រេចបាន​បន្ទាប់​ពី​អ៊ីស្រាអែល​បាន​ស្នើ​សុំ​ពេល​វេលា​បន្ថែម​ទៀត​ដើម្បី​ដក​ខ្លួន​ចេញនោះបាន​លើស​ពី ៦០ថ្ងៃ​ដែល​បាន​កំណត់​ ក្នុង​គោលបំណង​ធានា​ស្ថិរភាព​ជា​បន្ត​រវាង​ប្រទេស​ទាំង​ពីរ។

សេតវិមានបាននិយាយនៅក្នុងសេចក្តីថ្លែងការណ៍មួយថា «រដ្ឋាភិបាលនៃប្រទេសលីបង់ រដ្ឋាភិបាលអ៊ីស្រាអែល និងរដ្ឋាភិបាលនៃសហរដ្ឋអាមេរិកក៏នឹងចាប់ផ្តើមកិច្ចចរចាសម្រាប់ការវិលត្រឡប់របស់អ្នកទោសលីបង់ដែលត្រូវបានចាប់ខ្លួនបន្ទាប់ពីថ្ងៃទី០៧ ខែតុលា ឆ្នាំ២០២៣ ផងដែរ»។

សហរដ្ឋអាមេរិកបានសន្យាផ្តល់ជំនួយផ្នែកសន្តិសុខចំនួន ១១៧លានដុល្លារអាម៉េរិកដល់ប្រទេសលីបង់ ដើម្បីគាំទ្រការអនុវត្តបទឈប់បាញ់ជាមួយអ៊ីស្រាអែល។

ទោះបីជាយ៉ាងណាក៏ដោយ កងទ័ពអ៊ីស្រាអែលបានប្រព្រឹត្តការរំលោភបទឈប់បាញ់គ្នាចំនួន ៨ដងនៅក្នុងប្រទេសលីបង់កាលពីសប្តាហ៍មុន ដែលនាំឱ្យមានការបំពានសរុបដល់ទៅ ៦២៩ដង ចាប់តាំងពីកិច្ចព្រមព្រៀងបទឈប់បាញ់អ៊ីស្រាអែល-លីបង់បានចូលជាធរមានកាលពីថ្ងៃទី២៧ ខែវិច្ឆិកា។

បទឈប់បាញ់គ្នាដ៏ផុយស្រួយមួយបានកើតឡើង ដោយបញ្ចប់រយៈពេលនៃការបាញ់ផ្លោងទៅវិញទៅមករវាងអ៊ីស្រាអែល និងក្រុមហេសបូឡា ដែលបានចាប់ផ្តើមនៅថ្ងៃទី០៨ ខែតុលា ឆ្នាំ២០២៣ ហើយបានកើនឡើងទៅជាជម្លោះទ្រង់ទ្រាយធំនៅថ្ងៃទី២៣ ខែកញ្ញា ឆ្នាំមុន៕

ដោយ៖ យា ចិន្ដាខន្ដី (ប្រភព៖ AA-AKP)