AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- មន្ត្រីអនុវត្តច្បាប់អន្តោប្រវេសន៍និងគយរបស់សហរដ្ឋអាមេរិក (ICE) បានប្រកាសកាលពីថ្ងៃអាទិត្យថា ជនអន្តោប្រវេសន៍ខុសច្បាប់ចំនួន ៩៥៦នាក់ត្រូវបានចាប់ខ្លួននៅក្នុងទីក្រុងនានាទូទាំងប្រទេស ដោយស្របតាមការសន្យាយុទ្ធនាការរបស់លោកប្រធានាធិបតី ដូណាល់​ ត្រាំ (Donald Trump) ក្នុងការបន្តការនិរទេសទ្រង់ទ្រាយធំបន្ទាប់ពីចូលកាន់តំណែង។

លោក ថម ហូមេន (Tom Homan) ដែលជាឆ្មាំព្រំដែនដែលទើបតែងតាំងថ្មីរបស់លោក ត្រាំ បាននិយាយថា អ្នកជាប់ឃុំជាច្រើនត្រូវបានកាត់ទោសពីបទល្មើសធ្ងន់ធ្ងរ រួមទាំងបទល្មើសឃាតកម្ម និងឧក្រិដ្ឋកម្មផ្លូវភេទ។

លោក ហូមេន បាននិយាយថា ប្រតិបត្តិការកាលពីថ្ងៃអាទិត្យនៅទីក្រុងឈីកាហ្គោ នៃរដ្ឋអ៊ីលីណយ បណ្តាលឱ្យមានការចាប់ខ្លួនបុគ្គលចំនួន០៦នាក់ដែលត្រូវបានកាត់ទោសពីបទឧក្រិដ្ឋកម្មផ្លូវភេទធ្ងន់ធ្ងរ សមាជិកក្រុមក្មេងទំនើងជាច្រើននាក់ និងពីរនាក់ផ្សេងទៀតដែលត្រូវបានកាត់ទោសកាលពីមុនពីបទឃាតកម្ម និងអំពើហិង្សាផ្លូវភេទ។

លោក ហូមេន ដែល​មើល​ការ​ខុស​ត្រូវ​នៅ​ទីក្រុងឈីកាហ្គោ បាន​ប្រាប់សារព័ត៌មាន NBC News ថា «យើង​ត្រូវ​តែ​ដាក់​សុវត្ថិភាព​របស់​អាម៉េរិក​ជាអាទិភាព»។

នៅក្នុងសេចក្តីថ្លែងការណ៍មួយ បានឱ្យដឹងថា មន្ត្រី ICE បានពន្យល់ថា ប្រតិបត្តិការដែលបានធ្វើឱ្យប្រសើរឡើងរបស់ទីភ្នាក់ងារក្រោមការគ្រប់គ្រងរបស់លោក ត្រាំ មានគោលបំណងអនុវត្តច្បាប់អន្តោប្រវេសន៍របស់សហរដ្ឋអាមេរិក និងការពារសុវត្ថិភាពសាធារណៈ និងសន្តិសុខជាតិដោយនិរទេសជនបរទេសដែលមានគ្រោះថ្នាក់ជាឧក្រិដ្ឋជនចេញពីសហគមន៍របស់យើង។

ចាប់តាំងពីការឡើងកាន់អំណាចរបស់លោក ត្រាំ កាលពីថ្ងៃទី២០ខែមករា មក ICE បានធ្វើការចាប់ខ្លួនមនុស្សសរុបចំនួន ២.៦៨១នាក់ ដែលរួមទាំង ៩៥៦នាក់កាលពីថ្ងៃអាទិត្យ។ ទោះ​ជាយ៉ាង​ណា មន្ត្រីនោះ​មិន​បាន​បង្ហាញ​ថា ​មានអ្នក​ជាប់​ឃុំ​ប៉ុន្មាន​នាក់ដែល​មាន​ប្រវត្តិ​បទ​ឧក្រិដ្ឋ ឬ​ការ​ផ្ដន្ទាទោស​នោះ​ទេ។

យោងតាមប្រភពដែលដកស្រង់ដោយសារព័ត៌មានវ៉ាស៊ីនតោនប៉ុស្តិ៍ បានឱ្យដឹងថា មន្រ្តីរបស់លោក ត្រាំ បានដឹកនាំ ICE ដើម្បីកំណត់គោលដៅការចាប់ខ្លួនឱ្យបានពី ១.២០០នាក់ទៅ ១.៥០០នាកជារៀងរាល់ថ្ងៃ៕

ដោយ៖ យា ចិន្ដាខន្ដី (ប្រភព៖ AA-AKP)