AKP ភ្នំពេញ ថ្ងៃទី២៨ ខែមករា ឆ្នាំ២០២៥ -- សេតវិមានបាននិយាយកាលពីថ្ងៃអាទិត្យថា ប្រទេសកូឡុំប៊ីបានព្រមព្រៀងទៅលើលក្ខខណ្ឌទាំងអស់ដែលកំណត់ដោយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ស្តីពីការវិលត្រឡប់នៃជនចំណាកស្រុកកូឡុំប៊ីខុសច្បាប់ពីសហរដ្ឋអាមេរិក បន្ទាប់ពីមានជម្លោះនៅពេលមុននេះ។

សេចក្តីថ្លែងការណ៍មួយបាននិយាយថា «រដ្ឋាភិបាលនៃប្រទេសកូឡុំប៊ីបានព្រមព្រៀងតាមលក្ខខណ្ឌទាំងអស់របស់លោកប្រធានាធិបតី ត្រាំ រួមទាំងការទទួលយកដោយមិនមានការរឹតត្បិតចំពោះជនបរទេសខុសច្បាប់ទាំងអស់ពីប្រទេសកូឡុំប៊ីដែលត្រឡប់មកពីសហរដ្ឋអាមេរិកវិញ រួមទាំងនៅលើយន្តហោះយោធារបស់សហរដ្ឋអាមេរិកដោយមិនកំណត់ ឬពន្យារពេល»។

សេចក្តីថ្លែងការណ៍នោះក៏បាននិយាយផងដែរថា ទណ្ឌកម្មទិដ្ឋាការដែលចេញដោយក្រសួងការបរទេស និងការត្រួតពិនិត្យដែលប្រសើរឡើងពីគយ និងកិច្ចការពារតាមព្រំដែន នឹងនៅតែជាធរមានរហូតដល់ការបញ្ជូនតាមយន្តហោះជាលើកដំបូងរបស់ជននិរទេសកូឡុំប៊ីត្រឡប់ទៅវិញដោយជោគជ័យ។

សេចក្តីថ្លែងការណ៍នោះបាននិយាយថា «ព្រឹត្តិការណ៍ថ្ងៃនេះបង្ហាញយ៉ាងច្បាស់ដល់ពិភពលោកថា សហរដ្ឋអាមេរិកត្រូវបានគោរពសារជាថ្មីម្តងទៀត។ លោកប្រធានាធិបតី ត្រាំ នឹងបន្តការពារយ៉ាងខ្លាំងក្លានូវអធិបតេយ្យភាពរបស់ប្រទេស ហើយលោករំពឹងថា ប្រជាជាតិដទៃទៀតនៃពិភពលោកនឹងសហការយ៉ាងពេញលេញក្នុងការទទួលយកការនិរទេសពលរដ្ឋរបស់ពួកគេដែលមានវត្តមានខុសច្បាប់នៅក្នុងសហរដ្ឋអាមេរិក»។

នៅពេលមុននេះ ប្រធានាធិបតីកូឡុំប៊ី លោក ហ្គូសស្តេវ៉ូ ផេត្រូ (Gustavo Petro) បានប្តេជ្ញាថានឹងឆ្លើយតបបន្ទាប់ពីលោក ត្រាំ បានប្រកាសនូវវិធានការសងសឹកជាបន្ទាន់ និងសេចក្តីសម្រេចប្រឆាំងនឹងប្រទេសរបស់លោក។

វិបត្តិការទូតបានផ្ទុះឡើងដោយសារតែការបដិសេធរបស់លោក ផេត្រូក្នុងការទទួលយកយន្តហោះយោធាអាម៉េរិកដែលដឹកនិរទេសជនចំណាកស្រុក ដែលជាផ្នែកមួយនៃការបង្ក្រាបផ្នែកអន្តោប្រវេសន៍របស់រដ្ឋបាលលោក ត្រាំ៕

ដោយ៖ យា ចិន្ដាខន្ដី (ប្រភព៖ AA-AKP)