AKP ភ្នំពេញ ថ្ងៃទី២៧ ខែមករា ឆ្នាំ២០២៥ -- ក្រសួងសុខាភិបាលលីបង់បាននិយាយកាលពីថ្ងៃអាទិត្យថា ចំនួនអ្នកស្លាប់ដោយសារការបាញ់កាំភ្លើងរបស់អ៊ីស្រាអែលសំដៅទៅលើហ្វូងមនុស្សនៅភាគខាងត្បូងប្រទេសលីបង់បានកើនឡើងដល់ ១១នាក់ ដោយ ៨៣នាក់ផ្សេងទៀតបានរងរបួស។

ជនរងគ្រោះទាំង ១១នាក់គឺជាជនស៊ីវិលដែលព្យាយាមត្រឡប់ទៅស្រុកកំណើតរបស់ពួកគេនៅតាមបណ្តោយព្រំដែនភាគខាងត្បូងនៃប្រទេសលីបង់ជាមួយអ៊ីស្រាអែល ខណៈជនរងគ្រោះទី១១ គឺជាទាហានដែលត្រូវបានសម្លាប់នៅតំបន់ al-Dhahira នៅភាគខាងត្បូងប្រទេសលីបង់។

ប្រធានកងកម្លាំងបណ្តោះអាសន្នរបស់អង្គការសហប្រជាជាតិនៅប្រទេសលីបង់ (UNIFIL) លោក អារូលដូ ឡាហ្សារ៉ូ សាអេនហ្ស៍ (Aroldo Lazaro Saenz) និងអ្នកសម្របសម្រួលពិសេសអង្គការសហប្រជាជាតិសម្រាប់ប្រទេសលីបង់ លោកស្រី ចៀនីន ហេននីស ផ្លាសជឺត (Jeanine Hennis-Plasschaert) បាននិយាយកាលពីថ្ងៃអាទិត្យនៅក្នុងសេចក្តីថ្លែងការណ៍រួមមួយបន្ទាប់ពីឧប្បត្តិហេតុនេះថា «លក្ខខណ្ឌនេះ​មិនទាន់​មាន​នៅឡើយ​ទេ​សម្រាប់​ការ​វិល​ត្រឡប់​របស់​ពលរដ្ឋ​ទៅកាន់​ភូមិ​ដោយ​សុវត្ថិភាព​តាម​ខ្សែ​បន្ទាត់​ខៀវ»។

ទន្ទឹមនឹងនេះដែរ ប្រធានាធិបតីលីបង់ លោក ចូសេព អោន (Joseph Aoun) បានជំរុញឱ្យប្រជាជននៅភាគខាងត្បូងប្រទេសលីបង់ កាលពីថ្ងៃអាទិត្យ អនុវត្តន៍ការអត់ធ្មត់ និងជឿជាក់លើកងកម្លាំងប្រដាប់អាវុធលីបង់ដើម្បីការពារសន្តិសុខ និងអធិបតេយ្យភាព។

លោកបាននិយាយនៅក្នុងសេចក្តីថ្លែងការណ៍ដែលចេញផ្សាយដោយប្រធានាធិបតីលីបង់ថា «នេះគឺជាថ្ងៃនៃជ័យជំនះសម្រាប់យុត្តិធម៌ អធិបតេយ្យភាព និងឯកភាពជាតិ» ដោយលោកបានអំពាវនាវឱ្យប្រជាពលរដ្ឋរក្សាសមាសភាព និងពឹងផ្អែកលើយោធា ដើម្បីធានាបាននូវការវិលត្រឡប់ទៅកាន់ផ្ទះ និងទីក្រុងរបស់ពួកគេវិញដោយសុវត្ថិភាព។

ទោះបីជាមានកិច្ចព្រមព្រៀងឈប់បាញ់ក៏ដោយ ក៏កងទ័ពអ៊ីស្រាអែលបានបន្តធ្វើការវាយប្រហារទៅលើប្រទេសលីបង់ ដែលបានបណ្តាលឱ្យមានមនុស្សស្លាប់ និងរបួសនៅតាមតំបន់ព្រំដែន៕

ដោយ៖ មូល មិនា (ប្រភព៖ ភីបផលដេលី)