AKP ភ្នំពេញ ថ្ងៃទី២៧ ខែមករា ឆ្នាំ២០២៥ -- ប្រធានាធិបតីថ្មីរបស់សហរដ្ឋអាមេរិក លោក ដូណាល់ ត្រាំ (Donald Trump) បានបញ្ជាក់កាលពីថ្ងៃសៅរ៍សប្តាហ៍មុនថា លោកបានផ្អាកជំនួយរបស់ទីក្រុងវ៉ាស៊ីនតោនដល់បរទេសហើយ។

លោក​បាន​និយាយ​នៅក្នុង​អំឡុង​ពេល​ជួប​ជុំ​គ្នាមួយ​នៅ​ទីក្រុងឡាស់វេហ្គាស់ រដ្ឋណេវ៉ាដា ថា «នៅថ្ងៃទីមួយ ខ្ញុំបានបញ្ជាឱ្យសមាជិកគណៈរដ្ឋមន្ត្រីរបស់ខ្ញុំទាំងអស់ប្រើប្រាស់អំណាចទាំងអស់ដើម្បីលុបបំបាត់អតិផរណា និងការដែលធ្វើឱ្យតម្លៃជីវិតរស់នៅប្រចាំថ្ងៃធ្លាក់ចុះ។ យើងចង់ធ្វើឱ្យតម្លៃទំនិញធ្លាក់ចុះ។ ខ្ញុំបានដាក់ការបង្កកការជួលសហព័ន្ធ ការបង្កកបទប្បញ្ញត្តិសហព័ន្ធហើយ​ជំនួយ​បរទេស​ត្រូវ​បាន​បង្កក»។

ក្នុង​ចំណោម​វិធានការ​ផ្សេងៗ​ទៀត​ដែល​មាន​គោល​បំណង​ដោះស្រាយ​អតិផរណា លោក ត្រាំ ក៏​បាន​ចុះ​បញ្ជី​ការ​បង្កើត​ទីភ្នាក់ងារ​ថ្មី​របស់​សហរដ្ឋ​អាមេរិក DOGE (នាយកដ្ឋាន​ប្រសិទ្ធភាព​រដ្ឋាភិបាល) ដែលមានភារកិច្ច​បង្កើន​ប្រសិទ្ធភាព​របស់​រដ្ឋាភិបាល​អាម៉េរិក។

នៅពេលមុននេះ សារព័ត៌មាន Politico បានសរសេរថា រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីយ៉ូ (Marco Rubio) បានបញ្ឈប់ការចំណាយទៅលើជំនួយបរទេសដែលមានស្រាប់សម្រាប់រយៈពេល ៩០ថ្ងៃ។ កម្មវិធីផ្តល់មូលនិធិផ្នែកយោធាសម្រាប់អ៊ីស្រាអែល និងអេហ្ស៊ីបនឹងនៅតែបន្ត ប៉ុន្តែជំនួយដល់អ៊ុយក្រែន ហ្ស៊កដានី និងតៃវ៉ាន់ទំនងជានឹងត្រូវផ្អាក។ សេចក្តីសម្រេចណាមួយដើម្បីបន្ត ផ្លាស់ប្តូរ ឬបញ្ឈប់កម្មវិធីផ្តល់មូលនិធិជំនួយបរទេស នឹងត្រូវធ្វើឡើងតាមរយៈការត្រួតពិនិត្យដោយរដ្ឋមន្រ្តីការបរទេស។ ក្រោយមក សារព័ត៌មានរ៉យទ័រស៍ បានរាយការណ៍ថា ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID) បានដាក់គម្រោងទាក់ទងនឹងការផ្តល់ជំនួយដល់ប្រទេសអ៊ុយក្រែន៕

ដោយ៖ យា ចិន្ដាខន្ដី (ប្រភព៖ តាសស៍)