AKP ភ្នំពេញ ថ្ងៃទី២៥ ខែមករា ឆ្នាំ២០២៥-- ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប លោក លៀម សុដា អភិបាលរងខេត្តបន្ទាយមានជ័យ កាលពីថ្ងៃទី២៤ ខែមករា ឆ្នាំ២០២៥ បានអញ្ជើញជាអធិបតីដឹកនាំកិច្ចប្រជុំផ្សព្វផ្សាយអំពីវិធានការនៃការចូលរួមការពារ ទប់ស្កាត់ និងគ្រប់គ្រងតំបន់បឹងទន្លេសាប ដល់មន្ទីរអង្គភាពជំនាញ កងកម្លាំងសមត្ថកិច្ច អាជ្ញាធរដែនដី និងអ្នកពាក់ព័ន្ធផ្ទាល់ជាមួយតំបន់បឹងទន្លេសាបទាំងក្នុងកម្រិតថ្នាក់ខេត្ត និងថ្នាក់មូលដ្ឋាននៃខេត្តបន្ទាយមានជ័យ។

កិច្ចប្រជុំផ្សព្វផ្សាយនេះ ដើម្បីឱ្យមន្រ្តីទាំងអស់យកទៅផ្សព្វផ្សាយបន្តទៅដល់ប្រជាពលរដ្ឋ និងសហគមន៍មូលដ្ឋាន ក្នុងការធានាបាននូវប្រសិទ្ធភាពការចូលរួមអនុវត្តដល់ការគ្រប់គ្រង និងការប្រើប្រាស់ដីធ្លី និងធនធានធម្មជាតិក្នុងតំបន់បឹងទន្លេសាប ប្រកបដោយចីរភាព និងនិរន្តរភាព ស្របតាមអនុសាសន៍ណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ជាពិសេសគោរពប្រតិបត្តិឱ្យបានគ្រប់ជ្រុងជ្រោយរាល់ខ្លឹមសារសំខាន់ៗបានកំណត់នៅក្នុងច្បាប់ និងបទដ្ឋានគតិយុត្តពាក់ព័ន្ធ ក្នុងស្មារតីសហការទទួលខុសត្រូវ ដើម្បីចូលរួមលើកកម្ពស់ប្រសិទ្ធភាពការអនុវត្តគោលនយោបាយយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ក្នុងនីតិកាលទី៧នៃរដ្ឋសភា។

សូមជម្រាបថា កិច្ចប្រជុំផ្សព្វផ្សាយនេះបានសហការរៀបចំឡើងដោយសាលាខេត្តបន្ទាយមានជ័យ ដោយមានការអញ្ជើញចូលរួមពីឯកឧត្តម លោក លោកស្រីតំណាងមកពីក្រសួងរៀបចំដែនដី នគរូបនីយកម្ម និងសំណង់, ក្រសួងកសិកម្ម រុក្ខាប្រមាញ់ និងនេសាទ ក្រសួងមហាផ្ទៃ ក្រសួងបរិស្ថាន រដ្ឋបាលជលផល សមាជិកក្រុមប្រឹក្សាខេត្ត ក្រុមប្រឹក្សាស្រុក នាយករដ្ឋបាលសាលាខេត្ត ក្រុង/ស្រុក ឃុំ សង្កាត់ ប៉ុស្តិ៍នគរបាលរដ្ឋបាលគ្រប់ឃុំ សង្កាត់ដែលពាក់ព័ន្ធ មន្ទីរធនធានទឹក និងឧតុនិយម មន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរបរិស្ថាន បញ្ជាការតំបន់ប្រតិបត្តិការសឹករងខេត្ត បញ្ជាការកងរាជអាវុធហត្ថខេត្ត ស្នងការដ្ឋាននគរបាលខេត្តបន្ទាយមានជ័យ ព្រមទាំងថ្នាក់ដឹកនាំ និងមន្រ្តីបច្ចេកទេសនៃអគ្គលេខាធិការ អាជ្ញាធរទន្លេសាប៕

ដោយ ណយ នឿន (ប្រភព៖ អាជ្ញាធរទន្លេសាប)