AKP ភ្នំពេញ ថ្ងៃទី២៤ ខែមករា ឆ្នាំ២០២៥ -- ក្រសួងការបរទេសកូរ៉េខាងត្បូងបាននិយាយថា រដ្ឋមន្ត្រីការបរទេសកូរ៉េខាងត្បូង លោក ចូ តេយ៉ុល (Cho Tae-yul) បានធ្វើការសន្ទនាតាមទូរស័ព្ទជាលើកដំបូងរបស់លោកកាលពីថ្ងៃព្រហស្បតិ៍ ជាមួយរដ្ឋមន្ត្រីការបរទេសសហរដ្ឋអាមេរិកថ្មី លោក ម៉ាកូ រូប៊ីអូ (Marco Rubio) ហើយពួកគេបានយល់ព្រមរក្សាកិច្ចសហប្រតិបត្តិការជិតស្និទ្ធលើបញ្ហានុយក្លេអ៊ែររបស់ប្រទេសកូរ៉េខាងជើង។

ក្រសួងការបរទេសបាននិយាយថា ការសន្ទនាតាមទូរស័ព្ទបានធ្វើឡើងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានស្បថចូលកាន់តំណែងកាលពីថ្ងៃចន្ទ (ម៉ោងនៅសហរដ្ឋអាមេរិក) ហើយអ្នកការទូតកំពូលនៃប្រទេសទាំងពីរបានពិភាក្សាអំពីទំនាក់ទំនងទ្វេភាគី បញ្ហានុយក្លេអ៊ែរកូរ៉េខាងជើង ក៏ដូចជាកិច្ចសហប្រតិបត្តិការត្រីភាគីដែលពាក់ព័ន្ធនឹងប្រទេសជប៉ុន។

ជាការស្វាគមន៍ការចូលកាន់តំណែងរបស់លោក រូប៊ីអូ លោក ចូ បានសម្តែងការរំពឹងទុករបស់លោកក្នុងការអភិវឌ្ឍបន្ថែមទៀតនូវសម្ព័ន្ធភាពប្រទេសកូរ៉េខាងត្បូង-សហរដ្ឋអាមេរិក ដ៏រឹងមាំរយៈពេល ៧០ឆ្នាំក្រោមការគ្រប់គ្រងរបស់លោក ត្រាំ។

លោក រូប៊ីអូ បាននិយាយថា សម្ព័ន្ធភាពរបស់ពួកគេ គឺជាសសរស្តម្ភដ៏សំខាន់នៃសន្តិភាព និងសន្តិសុខនៅលើឧបទ្វីបកូរ៉េ ក៏ដូចជាតំបន់ ដោយលោកបានសង្កត់ធ្ងន់លើសារៈសំខាន់ និងបញ្ជាក់ជាថ្មីអំពីការប្តេជ្ញាចិត្តការពារជាតិរបស់សហរដ្ឋអាមេរិកចំពោះកូរ៉េខាងត្បូង។

រដ្ឋមន្ត្រីទាំងពីរបានយល់ព្រមរក្សាកិច្ចសហប្រតិបត្តិការជិតស្និទ្ធលើបញ្ហានុយក្លេអ៊ែររបស់ប្រទេសកូរ៉េខាងជើង ហើយបានអភិវឌ្ឍបន្ថែមទៀតនូវកិច្ចសហប្រតិបត្តិការត្រីភាគីដែលពាក់ព័ន្ធនឹងប្រទេសជប៉ុន៕

ដោយ៖ មូល មិនា (ប្រភព៖ យ៉ុនហាប់)