AKP ភ្នំពេញ ថ្ងៃទី២៤ ខែមករា ឆ្នាំ២០២៥ -- អនុប្រធានាធិបតីប៊ុលហ្គារី លោកស្រី អ៊ីលីអាណា ឡូតូវ៉ា (Iliana Iotova) និងឯកអគ្គរដ្ឋទូតចិនប្រចាំប្រទេសប៊ុលហ្គារី លោកស្រី ដៃ គីងលី (Dai Qingli) បានអះអាងជាថ្មីនូវការប្តេជ្ញាចិត្ដក្នុងការពង្រឹងទំនាក់ទំនងយូរអង្វែងរវាងប្រជាជាតិទាំងពីរ ក្នុងអំឡុងពេលទទួលស្វាគមន៍ពិធីបុណ្យនិទាឃរដូវ។

លោកស្រី ឡូតូវ៉ា បានលើកឡើងពីសារៈសំខាន់នៃព្រឹត្តិការណ៍នេះថា ជាការអបអរសាទរនៃទំនាក់ទំនងប្រទេសប៊ុលហ្គារី-ចិនដ៏រឹងមាំ និងយូរអង្វែង ក៏ដូចជាវេទិកាដើម្បីពិភាក្សាអំពីផែនការអនាគតសម្រាប់កិច្ចសហប្រតិបត្តិការលើវិស័យផ្សេងៗ។

លោកស្រីបានមានប្រសាសន៍ថា «យើងមានបំណងប្រាថ្នា មហិច្ឆតា និងរូបមន្តដែលបង្ហាញឱ្យឃើញសម្រាប់កិច្ចសហប្រតិបត្តិការប្រកបដោយជោគជ័យ ការជឿទុកចិត្ត ការគោរព   ឆន្ទៈសម្រាប់ការសន្ទនា និងការប្តេជ្ញាចិត្តរួមគ្នាចំពោះការអភិវឌ្ឍ»។

លោកស្រី ដៃ គីងលី បានសង្កត់ធ្ងន់លើសារៈសំខាន់នៃឆ្នាំកន្លងទៅក្នុងអំឡុងពេលខួបលើកទី៧៥ នៃទំនាក់ទំនងការទូតរវាងប្រទេសចិន និងប៊ុលហ្គារី។ លោកស្រីបានកត់សម្គាល់ថា ស្ថានទូតបានសហការរៀបចំព្រឹត្តិការណ៍ជាង ២០ព្រឹត្តិការណ៍ជាផ្នែកនៃសកម្មភាពដែលបានពង្រឹងចំណងមិត្តភាពជាប្រពៃណីរវាងប្រជាជាតិទាំងពីរឱ្យកាន់តែរឹងមាំថែមទៀត។

លោកស្រី ដៃ បាននិយាយថា «ភាពជោគជ័យនៃសកម្មភាពទាំងនេះបានធ្វើឱ្យទំនាក់ទំនងជាប្រពៃណីរបស់យើងកាន់តែស៊ីជម្រៅ សម្របសម្រួលកិច្ចសហប្រតិបត្តិការលើវិស័យផ្សេងៗ និងពង្រឹងការយល់ដឹង និងមិត្តភាពរវាងប្រជាជនចិន និងប៊ុលហ្គារី»៕

ដោយ៖ មូល មិនា (ប្រភព៖ ភីបផលដេលី)