AKP ភ្នំពេញ ថ្ងៃទី២៣ ខែមករា ឆ្នាំ២០២៥ -- អ្នកនាំពាក្យក្រសួងការបរទេសចិន លោក ហ្គូវ ចៀគុន (Guo Jiakun) បាននិយាយថា ក្នុងនាមជាប្រទេសកំពុងអភិវឌ្ឍន៍ធំៗទាំងពីរ និងប្រទេសដែលមានសេដ្ឋកិច្ចកំពុងរីកចម្រើន ប្រទេសចិន និងឥណ្ឌា គួរតែផ្តោតលើការអភិវឌ្ឍ និងកិច្ចសហប្រតិបត្តិការ ហើយនាំទំនាក់ទំនងទ្វេភាគីត្រឡប់មកវិញនៅលើផ្លូវនៃការអភិវឌ្ឍប្រកបដោយស្ថិរភាព។

អ្នកនាំពាក្យរូបនេះបានធ្វើការកត់សម្គាល់នៅក្នុងសន្និសីទសារព័ត៌មានប្រចាំថ្ងៃ នៅពេលដែលត្រូវបានស្នើសុំឱ្យធ្វើអត្ថាធិប្បាយលើសុន្ទរកថានាពេលថ្មីៗនេះរបស់រដ្ឋមន្ត្រីការបរទេសឥណ្ឌា លោក ស៊ូប្រាហ៍ម៉ានយ៉ាម ចៃសានការ (Subrahmanyam Jaishankar) បាននិយាយថា ទំនាក់ទំនងឥណ្ឌា-ចិន មានទស្សនវិស័យកាន់តែធំរបស់ប្រទេសទាំងពីរ និងសណ្តាប់ធ្នាប់ពិភពលោក លោកបានបន្ដ​ថា ប្រទេសឥណ្ឌា​នឹង​ដោះស្រាយ​ទំនាក់ទំនង​របស់​ខ្លួន​ជាមួយប្រទេស​ចិន​តាម​ទស្សនៈ​រយៈពេល​វែង។

លោក ហ្គូវ បាននិយាយថា ក្នុងនាមជាប្រទេសដែលមានអរិយធម៌បុរាណ ប្រទេសកំពុងអភិវឌ្ឍន៍ និងសេដ្ឋកិច្ចកំពុងរីកចម្រើន ប្រទេសចិន និងឥណ្ឌាគួរតែផ្តោតលើការអភិវឌ្ឍ និងកិច្ចសហប្រតិបត្តិការ។

លោកបានកត់សម្គាល់ថា ភាគីទាំងពីរចាំបាច់ត្រូវបង្ហាញដោយស្មោះស្ម័គ្រលើការយោគយល់រួមសំខាន់ៗដែលសម្រេចបានរវាងមេដឹកនាំនៃប្រទេសទាំងពីរ រួមទាំងប្រទេសចិន និងឥណ្ឌា ជាឱកាសអភិវឌ្ឍន៍ទៅវិញទៅមក ជាជាងការគំរាមកំហែង និងជាដៃគូសហប្រតិបត្តិការជាជាងដៃគូប្រកួតប្រជែង។

លោក ហ្គូវ បាននិយាយថា «យើងត្រូវមើល និងដោះស្រាយទំនាក់ទំនងទ្វេភាគីជាយុទ្ធសាស្ត្រ និងទស្សនវិស័យរយៈពេលវែង នាំទំនាក់ទំនងត្រឡប់ទៅរកផ្លូវនៃការអភិវឌ្ឍប្រកបដោយស្ថិរភាព ហើយស្វែងរកផ្លូវត្រឹមត្រូវសម្រាប់ប្រទេសជិតខាងធំៗដើម្បីរស់នៅដោយសុខដុមរមនា និងអភិវឌ្ឍន៍៕

ដោយ៖ មូល មិនា (ប្រភព៖ ភីបផលដេលី)