AKP ភ្នំពេញ ថ្ងៃទី២២ ខែមករា ឆ្នាំ២០២៥ -- រដ្ឋមន្ត្រីមហាផ្ទៃតួកគី លោក អាលី យឺលីកាយ៉ា (Ali Yerlikaya) បាននិយាយថា មនុស្សចំនួន ៦៦នាក់បានស្លាប់នៅក្នុងអគ្គីភ័យដែលបានឆាបឆេះនៅសណ្ឋាគារ Grand Kartal ក្នុងរមណីយដ្ឋានជិះស្គី Kartalkaya ក្នុងខេត្តបូលូ ប្រទេសតួកគី។

លោករដ្ឋមន្ត្រីបានប្រាប់អ្នកយកព័ត៌មាននៅកន្លែងកើតហេតុថា «គួរឱ្យសោកស្ដាយ មនុស្សចំនួន ៦៦នាក់បានស្លាប់ និង៥១នាក់បានរងរបួសនៅក្នុងអគ្គីភ័យ។ សរុបមក ភ្ញៀវទេសចរចំនួន ២៣៨នាក់កំពុងស្នាក់នៅក្នុងសណ្ឋាគារនៅពេលដែលអគ្គីភ័យបានផ្ទុះឡើង»។

របាយការណ៍ពីមុន​​បាន​និយាយ​ថា មនុស្ស ​១០​នាក់​បាន​ស្លាប់ និង​៣២​នាក់​របួស ។ យោងតាមរដ្ឋមន្ត្រីក្រសួងសុខាភិបាល លោក កេម៉ាល់ មេមីសូហ្គ្លូ (Kemal Memisoglu) បានឱ្យដឹងថា  មនុស្សមួយចំនួនបានចេញពីមន្ទីរពេទ្យរួចហើយ។

លោករដ្ឋមន្ត្រីបាននិយាយថា «ក្នុងចំណោមអ្នករងរបួសចំនួន ៥១នាក់ មានមនុស្សម្នាក់ស្ថិតក្នុងស្ថានភាពធ្ងន់ធ្ងរកំពុងសម្រាកព្យាបាលយ៉ាងយកចិត្តទុកដាក់។ អ្នកជំងឺ ១៧នាក់បានចេញពីមន្ទីរពេទ្យរួចហើយ។ លោកបានបន្ត​ថា ក្រុម​ពន្លត់​អគ្គិភ័យ​បាន​ឆ្លើយ​តប​ភ្លាមៗ​ចំពោះ​ការ​ប្រកាស​អាសន្ន ហើយ​បាន​ចាប់​ផ្តើម​ពន្លត់​ភ្លើង​នៅ​ម៉ោង ៤:១៥នាទី​ព្រឹក (ម៉ោង​ក្នុង​តំបន់)៕

រដ្ឋមន្ត្រីក្រសួងទេសចរណ៍ លោក មេហ៍មេត នូរី អឺសូយ (Mehmet Nuri Ersoy) បាននិយាយថា «សណ្ឋាគារបានទទួលវិញ្ញាបនបត្រសុវត្ថិភាពអគ្គីភ័យទាំងអស់» ហើយ «មិនមានការរំលោភលើសុវត្ថិភាពអគ្គីភ័យណាមួយត្រូវបានគេរកឃើញទេរហូតមកដល់ពេលនេះ»៕

ដោយ៖ មូល មិនា (ប្រភព៖ តាសស៍)