AKP ភ្នំពេញ ថ្ងៃទី២២ ខែមករា ឆ្នាំ២០២៥ --ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC) នៃប្រទេសថៃ បានផ្តល់អនុសាសន៍ថា ប្រទេសថៃសហការជាមួយប្រទេសអាស៊ានផ្សេងទៀតក្នុងការចរចាកិច្ចព្រមព្រៀងពាណិជ្ជកម្មជាមួយសហរដ្ឋអាមេរិក ដើម្បីជៀសវាងការយកពន្ធនាំចូល និងការពិន័យខ្ពស់។

អគ្គលេខាធិការក្រុមប្រឹក្សា NESDC លោក ដានូចា ពីចាយ៉ាណាន់ (Danucha Pichayanan) បានព្រមានថា សហរដ្ឋអាមេរិកទំនងជានឹងដំឡើងពន្ធនាំចូលប្រឆាំងនឹងប្រទេសដែលទទួលបានអតិរេកពាណិជ្ជកម្ម មុនពេលចាប់ផ្តើមកិច្ចចរចាពាណិជ្ជកម្មជាមួយពួកគេ។

យោងតាមគេហទំព័រព័ត៌មាន The Nation  បានឱ្យដឹងថា ប្រទេសថៃតែមួយនឹងមិនមានអំណាចគ្រប់គ្រាន់ដើម្បីចរចាប្រកបដោយប្រសិទ្ធភាពចំពោះពន្ធទាបជាមួយរដ្ឋបាលថ្មីរបស់សហរដ្ឋអាមេរិក ក្រោមការដឹកនាំរបស់លោក ដូណាល់ ត្រាំ (Donald Trump)។

លោក ដានូចា បានគូសបញ្ជាក់ពីការព្រួយបារម្ភកាន់តែខ្លាំងឡើងចំពោះក្រុមហ៊ុនចិនដែលផ្លាស់ប្តូរទីតាំងផលិតកម្មរបស់ពួកគេទៅកាន់ប្រទេសថៃដើម្បីគេចពីពន្ធ។ លោក​បាន​ស្នើ​ឲ្យ​ក្រុមប្រឹក្សា​វិនិយោគ (BOI) លើកទឹកចិត្ត​ក្រុមហ៊ុន​ចិន​ក្នុង​ឧស្សាហកម្ម​គោលដៅ​ដើម្បី​បង្កើត​ភាពជា​ដៃគូ​ក្នុង​ប្រទេស​ថៃ​។

លោក ដានូចា បាននិយាយថា បច្ចុប្បន្នក្រុមហ៊ុនចិនជាច្រើនបានចុះឈ្មោះជាអង្គភាពថ្មីនៅក្នុងប្រទេសសិង្ហបុរី បន្ទាប់មកវិនិយោគនៅក្នុងប្រទេសថៃ។ លោក​បាន​បន្ថែម​ថា ក្រុមប្រឹក្សា BOI ក៏​គួរ​ពិចារណា​ផ្តល់​សិទ្ធិ​វិនិយោគ​ដល់​ក្រុមហ៊ុន​ចិន​ផង​ដែរ ប្រសិន​បើ​ពួកគេ​មាន​ដៃគូ​ជា​ជនជាតិ​ថៃ៕

ដោយ៖ មូល មិនា (ប្រភព៖ VNA)