AKP ភ្នំពេញ ថ្ងៃទី២២ ខែមករា ឆ្នាំ២០២៥ -- ក្រសួងការពារជាតិរបស់ទីក្រុងសេអ៊ូលបាននិយាយថា មន្ត្រីការពារជាតិជាន់ខ្ពស់នៃប្រទេសកូរ៉េខាងត្បូង និងចក្រភពអង់គ្លេស បានជួបពិភាក្សាកាលពីថ្ងៃអង្គារ ដើម្បីពិភាក្សាអំពីវិធីជំរុញកិច្ចសហប្រតិបត្តិការសម្រាប់ការនាំចេញអាវុធ ចំពេលមានការបន្តកិច្ចខិតខំប្រឹងប្រែងដើម្បីជំរុញកិច្ចសហប្រតិបត្តិការសន្តិសុខទ្វេភាគីនៃប្រទេសទាំងពីរ។

ក្រសួងបាននិយាយថា នៅក្នុងកិច្ចប្រជុំដែលធ្វើឡើងនៅទីក្រុងសេអ៊ូល អគ្គនាយកនៃក្រសួងការពារជាតិ លោក វ៉ុន ជុងដេ (Won Chong-dae) និងលោក អូលីវឺ ហារី (Oliver Harry) នាយកផ្នែកការពារជាតិ និងសន្តិសុខរបស់ចក្រភពអង់គ្លេស បានចែករំលែកពីគោលនយោបាយរដ្ឋាភិបាលរបស់ពួកគេលើការនាំចេញអាវុធ និងពិភាក្សាអំពីគំនិតសម្រាប់ការអភិវឌ្ឍរួមគ្នា។

កិច្ចប្រជុំកាលពីថ្ងៃអង្គារ បានកត់សម្គាល់លើការប៉ុនប៉ងតាមដានដើម្បីពង្រឹងកិច្ចសហប្រតិបត្តិការការនាំចេញអាវុធ បន្ទាប់ពីភាគីទាំងពីរបានចុះហត្ថលេខាលើអនុស្សរណៈនៃការយោគយល់គ្នាស្តីពីការនាំចេញផ្នែកការពារជាតិរួមគ្នាក្នុងឆ្នាំ២០២៣៕

ដោយ៖ មូល មិនា (ប្រភព៖ យ៉ុនហាប់)