AKP ភ្នំពេញ ថ្ងៃទី២២ ខែមករា ឆ្នាំ២០២៥ -- កង់ចំនួន ១.០០០គ្រឿងពីប្រទេសចិនត្រូវបានបរិច្ចាគទៅប្រទេសនេប៉ាល់ ដោយផ្តល់អត្ថប្រយោជន៍ដល់សិស្សានុសិស្សមកពីសហគមន៍ចំនួន ៩កន្លែងនៅក្នុងស្រុកចំនួន ២នៃខេត្តម៉ាដេស។

យោងតាមលោក ហ្សូ ហ្សីឈាង (​​Zou Zhiqiang) ប្រធានការិយាល័យមូលនិធិនេប៉ាល់បានឱ្យដឹងថា ប្រទេសនេប៉ាល់ក្លាយជាប្រទេសទីបីបន្ទាប់ពីប្រទេសកម្ពុជា និងឡាវ ដែលទទួលបានកង់ផ្តល់ដោយក្រុមហ៊ុន Hello Inc. ជាមួយនឹងមូលនិធិចិនសម្រាប់ការអភិវឌ្ឍជនបទជាអ្នកទទួលខុសត្រូវលើថ្លៃដឹកជញ្ជូន។

លោក ហ្សូ បាននិយាយនៅក្នុងពិធីសម្ពោធដែលធ្វើឡើងនៅសាលាមួយក្នុងទីក្រុង Birgunj ប្រទេសនេប៉ាល់ថា «យើងសង្ឃឹមថាការបរិច្ចាគនេះក្លាយជាជំហានដំបូងក្នុងការជួយដោះស្រាយបញ្ហាក្នុងការធ្វើដំណើរទៅសាលារៀនរបស់កុមារដែលរស់នៅតំបន់ដាច់ស្រយាលនៃប្រទេសនេប៉ាល់»។

លោក អ៊ីមតាហ្ស អាឡាម (Imtiaz Alam) អភិបាលរងក្រុង Birgunj បាននិយាយថា «ខ្ញុំកំពុងទន្ទឹងរង់ចាំការពង្រីកការគាំទ្រនាពេលអនាគត»។ ចាប់តាំងពីគម្រោងកង់អន្តរជាតិត្រូវបានផ្តួចផ្តើមនៅឆ្នាំ២០២១ ដោយមូលនិធិនេះបានសហការជាមួយក្រុមហ៊ុន Hello Inc. ហើយកង់ចំនួន ៦.០២៤គ្រឿងត្រូវបានបរិច្ចាគដល់ប្រទេសកម្ពុជា និងឡាវនៅចុងឆ្នាំ២០២៤។

លោក វ៉ាង ស៊ីន (Wang Xin) ទីប្រឹក្សា​ស្ថានទូត​ចិនប្រចាំប្រទេសនេប៉ាល់ ​បាន​កត់សម្គាល់ថា ភាគី​ចិន​បានចាប់ផ្តើម​គម្រោង​បាតុកម្ម​កាត់បន្ថយ​ភាពក្រីក្រ​ជា​បន្តបន្ទាប់​ក្នុង​ប្រទេស​នេ​ប៉ាល់ ​ដែល​រួមមាន​ភូមិ​រស់​រវើក​ សហគមន៍​រីករាយ​ ទឹក​ស្អាត​ និង​ការបំភ្លឺ​អនាគត​។ លោក វ៉ាង បាននិយាយនៅក្នុងពិធីសម្ពោធថា ស្ថានទូតចិននឹងបន្តលើកកម្ពស់គម្រោងនានានៅក្នុងប្រទេសនេប៉ាល់ និងនាំមកនូវអត្ថប្រយោជន៍បន្ថែមទៀតដល់ប្រជាជននេប៉ាល់៕

ដោយ៖ មូល មិនា (ប្រភព៖ ភីបផលដេលី)