AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- យោងតាមសេវាសារព័ត៌មានប្រធានាធិបតី បានឱ្យដឹងថា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បានជួបជាមួយរដ្ឋមន្ត្រីការពារជាតិអាល្លឺម៉ង់ លោក បូរីស ពីស្តូរីស (Boris Pistorius) ដើម្បីពិភាក្សាអំពីជំនួយយោធា។

ប្រធានបទសំខាន់ៗនៃកិច្ចប្រជុំរួមមានការពង្រឹងការការពារដែនអាកាសរបស់អ៊ុយក្រែន ការផ្គត់ផ្គង់គ្រាប់រំសេវ និងការទិញអាវុធ និងឧបករណ៍របស់អ៊ុយក្រែនតាមគំរូប្រទេសដាណឺម៉ាក ដែលគិតគូរពីការផ្តល់ហិរញ្ញប្បទានផ្ទាល់ពីក្រុមហ៊ុនផលិតអាវុធអ៊ុយក្រែន។

ភាគីនានាក៏បានស្វែងយល់ពីសក្តានុពលនៃការពង្រីកគម្រោងរួមគ្នាលើការផលិត និងជួសជុលសព្វាវុធ និងឧបករណ៍នៅអ៊ុយក្រែន។ ក្នុង​អំឡុង​កិច្ច​ពិភាក្សា លោក ហ្សេលេនស្គី បាន​កត់​សម្គាល់​ថា ប្រទេស​អាល្លឺម៉ង់​បាន​រួម​ចំណែក​ប្រហែល ១៦% ​នៃ​ជំនួយ​ទាំង​អស់​ដែល​អ៊ុយក្រែន​បាន​ទទួល​ពី​ដៃគូ​របស់​ខ្លួន។

ចំណែកឯលោក ពីស្តូរីស បានប្រកាសថា ប្រទេសអាឡឺម៉ង់ថ្មីៗនេះបានបញ្ជាទិញរថក្រោះ RCH 155​ ចំនួន ៥៤គ្រឿងដោយខ្លួនឯងសម្រាប់អ៊ុយក្រែន។ លោក ពីស្តូរីស បានមកដល់ប្រទេសអ៊ុយក្រែនសម្រាប់ដំណើរទស្សនកិច្ចលើកទី៤ របស់លោក៕

ដោយ៖ មូល មិនា (ប្រភព៖ ស៊ីនហួ)