AKP ភ្នំពេញ ថ្ងៃទី១៦ ខែមករា ឆ្នាំ២០២៥ -- ក្រុមអ្នករុករករ៉ែខុសច្បាប់សរុបចំនួន ១១៨នាក់ត្រូវបាននាំយកមកខាងលើក្នុងអំឡុងពេលប្រតិបត្តិការជួយសង្គ្រោះនៅឯអណ្តូងរ៉ែមាសដែលត្រូវបានគេបោះបង់ចោលនៅក្នុងទីក្រុង Stilfontein ក្នុងខេត្តភាគពាយ័ព្យនៃប្រទេសអាហ្វ្រិកខាងត្បូង ដោយមាន ៣៦នាក់ត្រូវបានបញ្ជាក់ថាបានស្លាប់។

អ្នកនាំពាក្យសេវាជាតិប៉ូលីសអាហ្វ្រិកខាងត្បូង លោកស្រី អាតលេនដា ម៉ាថេ (Athlenda Mathe) បាននិយាយថា ខណៈដែលប្រតិបត្តិការជួយសង្គ្រោះបានឈានចូលដល់ថ្ងៃទីពីរ «អ្នករុករករ៉ែខុសច្បាប់សរុបចំនួន ១១៨នាក់ត្រូវបាននាំយកចេញពីអណ្តូងរ៉ែមាសនៅម៉ោង ៤:០០នាទី ល្ងាច»។

លោកស្រី ម៉ាថេ បាននិយាយថា ថ្ងៃដំបូងនៃប្រតិបត្តិការបានឃើញអ្នកជីករ៉ែខុសច្បាប់ចំនួន ៣៥នាក់ត្រូវបានជួយសង្គ្រោះដោយ ៩នាក់បានស្លាប់។ ហើយនៅថ្ងៃទីពីរ «អ្នកជីករ៉ែខុសច្បាប់សរុបចំនួន ៨៣នាក់ត្រូវបាននាំយកចេញ ដោយ ៥៦នាក់នៅរស់និង ២៧នាក់បានស្លាប់។ លោក​ស្រី​បាន​និយាយ​ថា​ «​បុគ្គល​ទាំង ៨២នាក់​ដែល​ត្រូវ​បាន​ចាប់​ខ្លួន​កំពុង​ប្រឈម​នឹង​ការ​ចោទ​ប្រកាន់​ពី​បទ​ជីក​រ៉ែ​ខុស​ច្បាប់ រំលោភ​បំពាន និង​ការ​បំពាន​ច្បាប់​អន្តោប្រវេសន៍»។

រដ្ឋមន្ត្រីក្រសួងរ៉ែ និងធនធានប្រេងរបស់អាហ្វ្រិកខាងត្បូង លោក វីដេ ម៉ានតាសេ (Gwede Mantashe) និងរដ្ឋមន្ត្រីប៉ូលីស លោក សេនហ្សូ ជូនូ (Senzo Mchunu) បានទៅមើលអណ្តូងរ៉ែដើម្បីវាយតម្លៃវឌ្ឍនភាពនៃប្រតិបត្តិការជួយសង្គ្រោះ។

វិបត្តិនៅទីក្រុង Stilfontein បានបន្តអស់រយៈពេលជាច្រើនខែ ដោយមានអ្នកជីករ៉ែខុសច្បាប់ជាង ១.៥០០នាក់បានជួបប្រទះរហូតមកដល់ពេលនេះ។ នៅចុងឆ្នាំ២០២៤ យ៉ាងហោចណាស់សាកសពចំនួន ៨នាក់ត្រូវបានទាញយកចេញមកវិញ។ អ្នកជីករ៉ែខុសច្បាប់ជាច្រើននាក់ ត្រូវបានគេជឿថា មកពីប្រទេសជិតខាង៕

ដោយ៖ មូល មិនា (ប្រភព៖ ស៊ីនហួ)