AKP បន្ទាយមានជ័យ ថ្ងៃទី១៤ ខែមករា ឆ្នាំ២០២៥ -- គ្រូបង្វឹក ចៅក្រម អាជ្ញាកណ្តាល កីឡាគុនបញ្ចស៊ីឡាត់កម្ពុជាចំនួន៤០នាក់ ត្រូវបានធ្វើការបណ្តុះបណ្តាលកម្រិតមូលដ្ឋានឆ្នាំ២០២៥ ដើម្បីជួយពង្រឹងសមត្ថភាពជំនាញបន្ថែមទៀតសម្រាប់យកទៅបំពេញការងារឱ្យកាន់តែមានភាពប្រសើរឡើងថែមទៀតនោះ។

មានប្រសាសន៍ក្នុងពិធីបើកវគ្គបណ្តុះបណ្តាលនាព្រឹកថ្ងៃអង្គារ ទី១៤ ខែមករា ឆ្នាំ២០២៥នេះនៅទីបញ្ជាការកងរាជអាវុធហត្ថខេត្តបន្ទាយមានជ័យ លោក អ៊ួ តារា អគ្គលេខាធិការសហព័ន្ធកីឡាគុនបញ្ចស៊ីឡាត់កម្ពុជា បានឱ្យដឹងថា ក្បាច់គុនបញ្ចស៊ីឡាត់គឺជាក្បាច់គុនបញ្ជាក់ពីប្រពៃណី វប្បធម៌ អត្តសញ្ញាណជាតិ ឥណ្ឌូណេស៊ី ដែលត្រូវបានបង្កើតសហព័ន្ធឡើងនៅឆ្នាំ១៩៤៨ បានបង្ហាញខ្លួនជាលើកដំបូងនៅក្នុងការប្រកួតកីឡាអាស៊ីអាគ្នេយ៍ ឆ្នាំ១៩៨៧ និងកីឡាអាស៊ីឆ្នាំ២០១៨ ដែលទាំងពីរលើកបានធ្វើឡើងនៅប្រទេសឥណ្ឌូណេស៊ី និងត្រូវបានចុះបញ្ជីជាសម្បត្តិបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ នៅថ្ងៃទី១២ ខែធ្នូ ឆ្នាំ២០១៩ នៅក្នុងកិច្ចប្រជុំលើកទី១៤ នៃកិច្ចប្រជុំគណៈកម្មាធិការអន្តររដ្ឋាភិបាលដើម្បីការពារបេតិកភណ្ឌវប្បធម៌របស់អង្គការយូណេស្កូ ដែលប្រារព្ធឡើងនៅទីក្រុងបូហ្គូតានៃប្រទេសកូឡុំប៊ី។

លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងជាអនុប្រធានសហព័ន្ធកីឡាគុនបញ្ចស៊ីឡាត់កម្ពុជា តំណាងលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការយោធភូមិភាគទី៥ និងជាប្រធានសហព័ន្ធកីឡាគុនបញ្ចស៊ីឡាត់កម្ពុជា  ក៏បានថ្លែងអំណរគុណ និងស្វាគមន៍ចំពោះការរៀបចំពិធីបើកវគ្គបណ្តុះបណ្តាលគ្រូបង្វឹក ចៅក្រម អាជ្ញាកណ្តាល កីឡាគុនបញ្ចស៊ីឡាត់កម្រិតមូលដ្ឋានឆ្នាំ២០២៥ ជាថ្ងៃប្រវត្តិសាស្ត្រលើកទី១ ដែលសហព័ន្ធកីឡាគុនបញ្ចស៊ីឡាត់កម្ពុជា បានអញ្ជើញមន្ត្រីបច្ចេកទេសមកពីសហព័ន្ធកីឡាគុនបញ្ចស៊ីឡាត់អន្តរជាតិ មកធ្វើការបណ្តុះបណ្តាលដល់សិក្ខាកាមកម្ពុជា។

លោកក៏បានបញ្ជាក់ថា ដោយមានការយកចិត្តទុកដាក់ពីរាជរដ្ឋាភិបាល អនុស្សរណៈនៃការយោគយល់គ្នា (MOU) ស្តីពីការផ្លាស់ប្តូរការហ្វឹកហាត់រវាងក្បាច់គុនល្បុក្កតោកម្ពុជា និងក្បាច់គុនបញ្ចស៊ីឡាត់របស់ប្រទេសឥណ្ឌូណេស៊ី កាលពីថ្ងៃទី២២ ខែមិថុនា ឆ្នាំ២០២២ ក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងឯកឧត្តម ប្រាបូប៉ូ ស៊ូប៊ីអានតូ ប្រធានាធិបតីនៃសាធារណរដ្ឋឥណ្ឌូណេស៊ី និងជាប្រធានសហព័ន្ធគុនបញ្ចស៊ីឡាត់អន្តរជាតិ នៅវិមានសន្តិភាព និងក្រោមការដឹកនាំរបស់លោកប្រធានសហព័ន្ធកីឡាបាន ធ្វើឱ្យកីឡាគុនបញ្ចស៊ីឡាត់ ទទួលបានការចាប់អារម្មណ៍ខ្លាំងពីសំណាក់មហាជននៅព្រះរាជាណាចក្រកម្ពុជា និងសម្រេចបាននូវកិច្ចការងារ និងសមិទ្ធិផលល្អៗជាច្រើនជូនជាតិកម្ពុជាយើង។

ជាមួយគ្នានោះដែរ លោកក៏សង្ឃឹម និងជឿជាក់ថា បន្ទាប់ពីឆ្លងកាត់វគ្គបណ្តុះបណ្តាលនេះ សិក្ខាកាមទាំងអស់នឹងក្លាយទៅជាគ្រូបង្វឹកដែលមានទេពកោសល្យក្នុងការបណ្តុះបណ្តាលធនធានកីឡាករ កីឡាការិនីឱ្យទទួលបានគុណផលល្អ និងជាចៅក្រម អាជ្ញាកណ្តាល ដែលមានជំនាញច្បាស់លាស់ក្នុងការវិនិច្ឆ័យ ដើម្បីឆ្ពោះទៅរៀបចំព្រឹត្តិការណ៍ការប្រកួតនានាទាំងក្នុងប្រទេស និងអន្តរជាតិ។

ក្នុងនាមសហព័ន្ធកីឡាគុនបញ្ចស៊ីឡាត់កម្ពុជា លោកឧត្តមសេនីយ៍ត្រី បោន ប៊ិន ក៏បានឧបត្ថម្ភការធ្វើដំណើរ ស្នាក់នៅ ក្នុងពេលបណ្តុះបណ្តាលគ្រូបង្វឹក ចៅក្រម អាជ្ញាកណ្តាល កីឡាគុនបញ្ចស៊ីឡាត់កម្រិតមូលដ្ឋាន ឆ្នាំ២០២៥ ដែលមានរយៈពេល០៣ថ្ងៃនូវថវិកាចំនួន៣០០០ដុល្លារផងដែរ៕

ដោយ ឈុន សារ៉ាត