AKP ភ្នំពេញ ថ្ងៃទី១០ ខែមករា ឆ្នាំ២០២៥ -- រដ្ឋមន្ត្រីការបរទេសអង់គ្លេសលោក ដេវីដ លែមមី (David Lammy) ជឿជាក់ថា ការដោះស្រាយជម្លោះអ៊ុយក្រែនដែលសម្របសម្រួលដោយរដ្ឋបាលរបស់លោក ដូណាល់ ត្រាំ (Donald Trump) អាចនឹងសម្រេចបាននៅដើមចុងខែមេសា។

អ្នកការទូតកំពូលរបស់អង់គ្លេសបាននិយាយដោយលើកឡើងអំពីការប្តេជ្ញាមុនការបោះឆ្នោតរបស់លោក ត្រាំ ក្នុងការដោះស្រាយជម្លោះអ៊ុយក្រែនក្នុងរយៈពេលតែមួយថ្ងៃ ប្រសិនបើលោកត្រលប់ទៅកាន់សេតវិមានវិញថា «លោក ដូណាល់ ត្រាំ មិនទាន់ឡើងកាន់អំណាចនៅឡើយទេ។ ខ្ញុំគិតថា ការចង្អុលបង្ហាញគឺពីអ្វីដែលខ្ញុំបានឃើញក្នុងរយៈពេលប៉ុន្មានថ្ងៃចុងក្រោយនេះ ការរុញច្រានបន្តិចលើន័យនេះ គឺថាកិច្ចព្រមព្រៀងណាមួយនឹងត្រូវបានសម្រេចនៅថ្ងៃទី២១ ខែមករា ខ្ញុំគិតថាឥឡូវនេះមិនទំនងទេ»។ សារព័ត៌មាន The Guardian បាន​ដក​ស្រង់​សម្តីរបស់លោកដែលបាននិយាយ​ថា​ «​ហើយដែល​យើង​កំពុងតែ​ឮ​នេះ តែ​តាមការ​ពិតតារាង​ពេលវេលា​បាន​រំកិល​ចុះ​បន្តិច […] ឆ្ពោះទៅក្នុងអំឡុងពេលពិធីបុណ្យអ៊ីស្ទ័រ (Easter)»។

នៅក្នុងឆ្នាំ២០២៥ គ្រិស្តបរិស័ទ ប្រូតេស្តង់ និងគ្រិស្តអូស្សូដក់របស់រុស្ស៊ី នឹងប្រារព្ធពិធីបុណ្យអ៊ីស្ទ័រ នៅថ្ងៃតែមួយ គឺថ្ងៃទី២០ ខែមេសា។

នៅក្នុងការបោះឆ្នោតប្រធានាធិបតីសហរដ្ឋអាមេរិកកាលពីថ្ងៃទី០៥ខែវិច្ឆិកា​ ឆ្នាំ២០២៤ លោក ត្រាំ មកពីគណបក្សសាធារណរដ្ឋបានយកឈ្នះគូប្រជែងមកពីគណបក្សប្រជាធិបតេយ្យ គឺអនុប្រធានាធិបតីសហរដ្ឋអាមេរិកលោកស្រី កាម៉ាឡា ហារីស (Kamala Harris)។ លោកនឹងចូលកាន់តំណែងជាប្រធានាធិបតីទី៤៧ របស់សហរដ្ឋអាមេរិកនៅថ្ងៃទី២០ ខែមករាឆ្នាំ២០២៥។

ក្នុងអំឡុងពេលយុទ្ធនាការឃោសនាបោះឆ្នោតប្រធានាធិបតីអ្នកនយោបាយរូបនេះបានសង្កត់ធ្ងន់ម្តងហើយម្តងទៀតអំពីផែនការរបស់លោកក្នុងការដោះស្រាយជម្លោះអ៊ុយក្រែនក្នុងរយៈពេលតែប៉ុន្មានថ្ងៃប៉ុណ្ណោះ ក៏ដូចជាបញ្ឈប់រាល់សង្រ្គាមដែលកំពុងបន្តនៅក្នុងពិភពលោកជាទូទៅ។ លោក ត្រាំ មិន​បាន​បដិសេធ​ចំពោះ​ពាក្យ​សន្យា​បោះឆ្នោត​របស់​លោក​ទេ បន្ទាប់​ពី​លទ្ធផល​បោះឆ្នោត​ត្រូវ​បាន​ប្រកាស៕

ដោយ៖ យា ចិន្ដាខន្ដី (ប្រភព៖ តាសស៍)