AKP កំពង់ធំ ថ្ងៃទី០៨ ខែមករា ឆ្នាំ២០២៥--

ឯកឧត្តម ហេង សំណាង អនុប្រធានក្រុមចុះមូលដ្ឋានតំណាងលោកអ្នកឧកញ៉ាបណ្ឌិត ទ្រី ភាព សមាជិកគណៈកម្មាធិការកណ្តាលនិងជាបេសកជនពិសេសសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមការងារចុះមូលដ្ឋានស្រុកប្រាសាទបល្ល័ង្ក បានអញ្ជើញជួបសំណេះសំណាលជាមួយប្រជាពលរដ្ឋក្នុងពិធីអបអរសាទរខួបអនុស្សាវរីយ៍លើកទី៤៦នៃទិវាជ័យជ័យជំនះ៧ មករា "៧ មករា ១៩៧៩ - ៧ មករា ២០២៥" នៅស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី០៨ ខែមករា ឆ្នាំ២០២៥។

ឯកឧត្តម ហេង សំណាង បានលើកឡើងថា ដោយមានស្មារតីរំដោះជាតិមាតុភូមិទើបឈានទៅដល់ការរំដោះជាតិមាតុភូមិពីរបបអាវខ្មៅយង់ឃ្នងប្រល័យពូជសាសន៍ប៉ុលពត នាថ្ងៃទី៧ មករា ១៩៧៩ ដែលនាំឱ្យប្រទេសជាតិមានសុខសន្តិភាព និងការអភិវឌ្ឍរហូតមកដល់បច្ចុប្បន្នក្រោមវីរភាពដ៏អង់អាចក្លាហានដែលបានយកសាច់ស្រស់ ឈាមស្រស់ របស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាបច្ចុប្បន្ន និងបានអំពាវនាវដល់ប្រជាពលរដ្ឋក្នុងមូលដ្ឋានសូមបន្តថែរក្សាការពារនូវសុខសន្តិភាពនេះឱ្យបានគង់វង្ស ដើម្បីសេចក្តីសុខការអភិវឌ្ឍ និងប្រឆាំងដាច់ខាតរាល់ទង្វើជនទាំងឡាយណាដែលប៉ុនប៉ងផ្ដួលរំលំរាជរដ្ឋាភិបាល ឬធ្វើបដិវត្តន៍ពណ៌ និងបង្កអសន្តិសុខទាំងឡាយដល់ជាតិមាតុភូមិ និងប្រជាពលរដ្ឋឱ្យខាងតែបាន។

ទន្ទឹមនឹងនេះ ឯកឧត្តមបានជំរុញ និងលើកទឹកចិត្តដល់សិស្សានុសិស្ស និងយុវជន ត្រូវខិតខំសិក្សារៀនសូត្រឱ្យបានពូកែឱ្យក្លាយជាសិស្សល្អ កូនល្អ មិត្តល្អ និង នៅឱ្យឆ្ងាយពីគ្រឿងញៀន ហើយត្រូវស្វែងយល់ឱ្យបានច្បាស់លាស់ពីទិវាជ័យជម្នះ៧មករា ដែលនាំឱ្យប្រទេសជាតិមានសុខសន្តិភាព និងការអភិវឌ្ឍហូតមកដល់បច្ចុប្បន្ន ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ជាមួយគ្នានេះដែរ លោកស្រី សួន សុខរីម តំណាងយុវជន និងប្រជាពលរដ្ឋនៅក្នុងស្រុកប្រសាទបល្ល័ង្កទាំងមូល បានប្ដេជ្ញាចិត្តខ្ពស់ក្នុងការថែរក្សាសុខសន្តិភាពជាពិសេសស្មារតី៧មករាជាអមតៈ៕

ដោយ ស៊ុម វណ្ណា