AKP ភ្នំពេញ ថ្ងៃទី០៦ ខែមករា ឆ្នាំ២០២៥--

នៅទីបញ្ជាការកងពលតូចអន្តរាគមន៍លេខ១បានប្រារព្ធពិធីបិទការប្រកួតកីឡា ក្រោយពីការប្រកួត អបអរសាទរខួបអនុស្សាវរីយ៍លើកទី៤៦ នៃទិវាជ័យជម្នះ ៧មករា (៧.១.១៩៧៩-៧.១.២០២៥) ស្ថិតក្រោមអធិបតីភាពឯកឧត្តម ឧត្តមសេនីយ៍ឯក បណ្ឌិត ព្រហ្ម ផេង មេបញ្ជាការរងកងទ័ពជើងគោក  មេបញ្ជាការកងពលតូចអន្តរាគមន៍លេខ១ កាលពីថ្ងៃទី០៥ ខែមករា ឆ្នាំ២០២៥។

ក្នុងពិធីបិទប្រកួតកីឡា ឧត្តមសេនីយ៍ឯក បណ្ឌិត ព្រហ្ម ផេង បានពាំនាំប្រសាសន៍ផ្ដាំផ្ញើសាកសួរសុខទុក្ខ និងជូនពរឆ្នាំថ្មី ឆ្នាំសកល២០២៥ របស់ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ  មេបញ្ជាការកងទ័ពជើងគោក ជូននាយទាហាន នាយទាហានរង និងពលទាហាន ព្រមទាំងក្រុមគ្រួសារទាំងអស់ និងបានមានប្រសាសន៍អំពីគុណតម្លៃនៃទិវាជ័យជម្នះ ៧មករា ដែលជាស្នាដៃនៃការតស៊ូ លះបង់សាច់ស្រស់ ឈាមស្រស់ និងការលះបង់អាយុជីវិត របស់ឥស្សរជនវីរយុទ្ធជន វីរយុទ្ធនារី  ពិសេសថ្នាក់ដឹកនាំគណបក្សប្រជាជនកម្ពុជា ដើម្បីរំដោះជាតិ និងប្រជាជនចេញពីគុកឥតជញ្ជាំង៣ឆ្នាំ ៨ខែ និង២០ថ្ងៃ ចេញពីរបបសាហាវឃោរឃៅ យង់ឃ្នង ប្រល័យពូជសាសន៍ ធ្វើឱ្យប្រជាពលរដ្ឋរស់រានមានជីវិត មានសិទ្ធិសេរីភាព ប្រទេសជាតិទទួលបាននូវសុខសន្តិភាព មានការអភិវឌ្ឍរីកចម្រើនជាបន្តបន្ទាប់។

ឧត្តមសេនីយ៍ឯក ព្រហ្ម ផេង បានគូសបញ្ជាក់ថា ចាប់តាំងពីរាជរដ្ឋាភិបាលថ្មី នីតិកាលទី៧ នៃរដ្ឋសភាបានបង្កើតឡើង នៅខែសីហា ឆ្នាំ២០២៣ ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ក្នុងនោះរាជរដ្ឋាភិបាលបានកំណត់យកបាវចនាទាំង៥ អាទិភាពគន្លឹះទាំង៥ និងបញ្ហាប្រឈមទាំង៦ ដើម្បីអនុវត្តប្រកបដោយប្រសិទ្ធភាព។

ទន្ទឹមនឹងនេះ ឯកឧត្តមសេនីយ៍ឯក ព្រហ្ម ផេង បានថ្លែងអំណរគុណដល់ថ្នាក់ដឹកនាំ ឥស្សរជនអ្នកស្នេហាជាតិដែលបានប្រមូលផ្តុំកម្លាំងតស៊ូបង្កើតរណសិរ្សសាមគ្គីសង្គ្រោះជាតិ រំដោះជាតិនៅថ្ងៃទី០៧ មករា ឆ្នាំ១៩៧៩ និងបានមានប្រសាសន៍ផ្ដាំផ្ញើដល់យោធិន កីឡាករ និងគ្រួសារ ដូចជា៖ ១. ត្រូវលើកកម្ពស់ គុណភាពនយោបាយ អប់រំចិត្តសាស្រ្តឱ្យបានជាប់ជាប្រចាំដល់យោធិនគ្រប់រូប ធានាបាននូវមនសិការស្នេហាជាតិស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ  និងត្រូវប្រឆាំងនូវរាល់សង្គ្រាមចិត្តសាស្រ្ត ឧបាយកលញុះញុង បំបែកបំបាក់ផ្ទៃក្នុង បំផ្លិចបំផ្លាញសន្ដិភាព ការពារឱ្យបានដាច់ខាតនូវសន្ដិភាព និងរាជរដ្ឋាភិបាលស្របច្បាប់ដែលមានសម្ដេចធិបតី ហ៊ុន ម៉ាណែត ជានាយករដ្ឋមន្រ្តី។ ២.  ត្រូវគោរពឱ្យបានហ្មឹងម៉ាត់នូវច្បាប់នានារបស់រដ្ឋ ច្បាប់លក្ខន្តិកៈ និងបទវិន័យទូទៅ បទបញ្ជានៃកងយោធពលខេមរភូមិន្ទ និងបទបញ្ជាផ្ទៃក្នុង របបកំណត់ផ្សេងៗរបស់កងពល។ ៣. ត្រូវរក្សាការសម្ងាត់យោធាឱ្យបានដាច់ខាត ខ្ពស់បំផុត ចៀសវាងការបែកធ្លាយការសម្ងាត់កងទ័ពតាមរយៈ ការបង្ហោះរូបភាពកងទ័ពគ្រឿងសម្ភារសឹក តាមបណ្ដាញសង្គម និងហាមដាច់ខាតការផ្ដល់ពត៏មានផ្ទៃក្នុងអង្គភាព និងពត៏មានជាតិ ទៅមជ្ឈដ្ឋានខាងក្រៅ និងបរទេស។ ៤. ត្រូវយកអស់ប្រាជ្ញាស្មារតី កម្លាំងកាយ កម្លាំងចិត្ត តស៊ូ  ព្យាយាម អត់ធន់ ហាត់ពត់លត់ដំ ប្រឹងប្រែងហ្វឹកហាត់បន្តទៀត ដើម្បីដណ្តើមយកជ័យលាភីជូនកងពល។ ៥. ត្រូវយកចិត្តទុកដាក់ខិតខំហាត់ប្រាណ និងលេងកីឡាគ្រប់ប្រភេទឱ្យបានជាប់ជាប្រចាំ ដើម្បីថែទាំសុខភាពរបស់ខ្លួន។ ៦. យកចិត្តទុកដាក់ការកែច្នៃជីវភាពរស់នៅរបស់កងទ័ពឱ្យបានល្អ ក្នុងនោះត្រូវបំផុសចលនាដាំដុះ ចិញ្ចឹមសត្វ សម្រាប់ផ្គត់ផ្គង់ឱ្យផ្ទះបាយបន្ថែមពីលើគោលរបបរបស់ថ្នាក់លើ។ ទន្ទឹមនោះ ត្រូវបំផុសការថែទាំសុខភាពឱ្យបានល្អដូចជា ការបង្ការ ទប់ស្កាត់ការរីករាលនៃជំងឺកូវីដ- ១៩ និងជំងឺផ្សេងៗ ព្រមជាមួយនោះត្រូវចៀសឱ្យផុតពីគ្រឿងញៀន និងយកចិត្តទុកដាក់ពិនិត្យព្យាបាលជំងឺដល់កងទ័ព និងគ្រួសារកងទ័ពឱ្យបានទាន់ពេលវេលា។

 
ឧត្តមសេនីយ៍ឯក ព្រហ្ម ផេង បានថ្លែងអំណរគុណ និងធ្វើការដឹងគុណចំពោះម្តេចតេជោ ហ៊ុន សែន ប្រធានព្រឹទ្ធសភា ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្រ្តីនៃព្រះរាជាណាចក្រកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំពោះសម្ដេចធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ដែលតែងតែជួយឧបត្ថម្ភទាំងស្មារតី សម្ភារ និងថវិកា បង្កលក្ខណៈឱ្យកងពលអនុវត្តសម្រេចបានជោគជ័យរាល់ភារកិច្ច ចំពោះក្រសួងការពារជាតិ អគ្គមេបញ្ជាការនៃកងយោធពលខេរភូមិន្ទ មេបញ្ជាការកងទ័ពជើងគោក អង្គភាពសម្ព័ន្ធមេត្រីភាព និងសប្បុរសជននានា ដែលជានិច្ចកាលតែងតែជួយឧបត្ថម្ភទាំងស្មារតី សម្ភារ ថវិកា និងគ្រឿងឧបភោគ បរិភោគដល់កងពល និងបានប្រគល់ពានរង្វាន់ និងថវិកាអមដល់កីឡាករទទួលបានជ័យលាភីតាមចំណាត់ថ្នាក់នៃវិញ្ញាសានីមួយៗផងដែរ៕

ដោយ សំ សាម៉ន