AKP ភ្នំពេញ ថ្ងៃទី០៦ ខែមករា ឆ្នាំ២០២៥--

ប្រភេទស្រូវធ្ងន់ ក្នុងនេះដូចជាពូជស្រូវនាងខុន គឺកសិករខ្មែរមួយចំនួនតែងចូលចិត្ដដាំដុះសម្រាប់ទុកបរិភោគ និងខ្លះទៀតសម្រាប់ទុកលក់។ តាមមរយៈឃ្លីបវីដេអូរបស់ក្រសួងកសិកម្ម រុក្ខាប្រមាញ់ និងនេសាទ លោក គង់ គា ប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ស្រូវនាងខុនជាប្រភេទស្រូវធ្ងន់ ប្រកាន់រដូវ ហើយកសិករត្រូវរង់ចាំរហូតដល់ខែធ្នូ ទើបអាចប្រមូលផលបាន បើទោះជាការដាំដុះនៅខែឧសភា ឬខែមិថុនាក្តី។

លោកបានបន្តថា កសិករដែលដាំដុះស្រូវនាងខុន គឺត្រូវដាំដុះក្នុងទឹកជ្រៅ ការដាំដុះស្រូវនាងខុនដែលជាស្រូវពូជធ្ងន់ ចំណាយថ្លៃដើមតិចចន្លោះពី១,៣លានរៀល ទៅ១,៥លានរៀល។ នៅតំបន់មិនសូវមានជីជាតិ គាត់ចំណាយថ្លៃជីបន្ថែមអាចការចំណាយអាចកើនដល់១,៨លានរៀល។ ទាក់ទិនក្នុងរឿងនេះ លោក វ៉ាត សារ៉ន កសិកររស់នៅភូមិសៀម ឃុំអំពិលប្រាំដើម ស្រុកបវេល ខេត្តបាត់ដំបង បានឱ្យដឹងថា ស្រូវនាងខុនផ្តល់ទិន្នផលទៅតាមលក្ខណៈដីដែលមានជីជាតិ និងតំបន់។

សម្រាប់ក្នុងតំបន់រស់នៅរបស់លោកតែងផ្តល់ទិន្នផលស្រូវប្រមាណ៤០ការ៉ុង ឬប្រមាណជាង៤តោនបន្តិចបន្តួច ឬ៤តោនកន្លះក្នុងមួយហិកតា។ សម្រាប់ទិន្នផលរបស់ស្រូវពូជនាងខុនពុំមានអ្វីខាតទេគឺក្នុងមួយហិកតាយើងទទួលបានផលចំណេញ២លានរៀល។ ដោយឡែក អ្នកស្រី អុំ រើន អ្នកលក់អង្ករនៅផ្សារសិរីសោភ័ណ នៅខេត្តបន្ទាយមានជ័យវិញបានឱ្យដឹងថា អង្ករនាងខុនសម្រាប់អ្នកមានកូនច្រើនគេចូលចិត្តទិញ ព្រោះថាពេលដាំបាយវាឡើងខ្លាំង ដែលពួកគាត់ចូលចិត្តអង្ករប្រភេទនេះ។

ជាមួយគ្នានេះដែរ អ្នកស្រី ឡុង សារី អ្នកលក់អង្ករនៅផ្សារថ្មគោល ខេត្តបាត់ដំបង បានឱ្យដឹងថា សម្រាប់តម្លៃអង្ករមួយគីឡូក្រាមថ្លៃ២៨០០ ឬ៣០០០រៀលជាប្រភេទស្រូវចាស់ តែបើជាស្រូវនាងខុនថ្មីតម្លៃ ២៥០០រៀលក្នុងមួយគីឡូក្រាម។ លោក គង់ គា ប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្មបានឱ្យដឹងបន្ថែមដែរថា ស្រូវនាងខុនផ្ដល់ទិន្នផលគិតជាមធ្យម ៣,៥តោនក្នុង១ហិកតា (ស្រូវសើម)។ បើលក់បានតម្លៃ៨៥០រៀលក្នុង១គីឡូ នោះកសិករអាចទទួលបានប្រាក់ចំណេញ ១លាន៦៧ម៉ឺនរៀលក្នុង១ហិកតា ហើយបើថែទាំបានល្អទិន្នផលអាចបាន៤តោន ក្នុង១ហិកតា ដែលអាចទទួលបានប្រាក់ចំណេញ២លានរៀន ក្នុង១ហិកតា៕

ដោយ៖ ដេប៉ូ