AKP កំពង់ឆ្នាំង ថ្ងៃទី០៦ ខែមករា ឆ្នាំ២០២៥-- ព្រះសីលាភិរ័ត ហែម ឡូត ព្រះវិន័យធរគណខេត្តកំពង់ឆ្នាំង អញ្ជើញយាងនិមន្តជាអធិបតីបើកវិញ្ញាសារប្រឡងយកវិញ្ញាបនបត្រធម្មវិន័យ ថ្នាក់ត្រី ទោ ឯក ឆ្នាំសិក្សា២០២៤-២០២៥ នៅមណ្ឌលប្រឡងវត្តត្រពាំងស្នោ ស្រុករលាប្អៀរ ខេត្តកំពង់ឆ្នាំង កាលពីថ្ងៃទី០៥ ខែមករា ឆ្នាំ២០២៥។

គោលបំណងនៃការប្រឡងឆ្នាំនេះ ក្រសួងអប់រំ យុវជន និងកីឡា បានអនុវត្តយ៉ាងម៉ឺងម៉ាត់ចំពោះការប្រឡងនេះ ដែលធ្វើយ៉ាងណាឱ្យវិស័យអប់រំ និងសាសនានៅកម្ពុជា កាន់តែមានគុណភាព មានន័យថា អ្នកចេះ គឺជាប់ ដូចនេះសមណសិស្សត្រូវយកអស់បញ្ញាស្មារតី បញ្ចេញអស់សមត្ថភាព ក្នុងការប្រឡងយកសញ្ញាបត្រថ្នាក់ ត្រី ទោ ឯក នេះ ដោយមានការអញ្ជើញចូលរួមពីលោក សរ លាង ប្រធានមន្ទីរធម្មការ និង សាសនាខេត្ត និងលោកស្រី អឿន សម្បត្តិ ប្រធានប្រតិភូនៃក្រសួងធម្មការ និងសាសនា ព្រះធម្មវិន័យធរគណខេត្ត ព្រះលេខាធិការគណខេត្ត ព្រះអនុគណស្រុក ព្រះជំនួយសាលាគណខេត្ត លោកអភិបាលរងស្រុករលាប្អៀរ  ប្រតិភូក្រសួង មន្រ្តីសង្ឃស្រុក និងសមណសិស្សជាច្រើនាក់ផងដែរ។

ក្នុងឱកាសនោះ ព្រះវិន័យធរគណខេត្តកំពង់ឆ្នាំងបានមានសង្ឃដីកាថា ការបង្ហាញហិបវិញ្ញាសាជូនដល់បេក្ខជនប្រឡង ពិនិត្យភាពបិទជិត មានបិទស្កុត និងត្រាស្រោមប្រធានវិញ្ញាសា នៅចំពោះមុខបេក្ខជន ដើម្បីធានាបានថា ការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។ ក្មួយៗសមណសិស្សទាំងអស់ត្រូវថែរក្សាសុខភាពឱ្យបានល្អ ជាពិសេសនៅថ្ងៃប្រឡង និងខិតខំធ្វើវិញ្ញាសាប្រឡងឱ្យអស់ពីសមត្ថភាពព្រមទាំងគោរពតាមបទបញ្ជាផ្ទៃក្នុង នៅពេលប្រឡងឱ្យបានល្អ ដើម្បីថែរក្សាសន្តិសុខ សុវត្ថិភាព និងរក្សាសណ្ដាប់ធ្នាប់ របៀបរៀបរយពេលប្រឡង ពិសេសជោគជ័យក្នុងការប្រឡង ស័ក្ដិសមជាទំពាំងស្នងឫស្សី ជាសសរទ្រូងប្រទេសជាតិ ។

ទន្ទឹមនឹងនេះ ព្រះវិន័យធរគណខេត្តបានបន្តថា ដោយមានការយកចិត្តទុកដាក់ពីរាជរដ្ឋាភិបាលក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា បានដាក់ចេញនូវគោលនយោបាយអភិវឌ្ឍន៍ធនធានមនុស្ស បានក្លាយជាអាទិភាពទីមួយនៅក្នុងគោលដៅយុទ្ធសាស្ត្រ អប់រំរបស់រាជរដ្ឋាភិបាល គឺការពង្រឹងគុណភាពវិស័យអប់រំ ពោលគឺលើកកម្ពស់នូវចំណេះដឹងសមត្ថភាព សីលធម៌ សីលធម៌មនសិការ ស្នេហាជាតិ និងស្មារតីទទួលខុសត្រូវជាដើម។

ជាមួយគ្នានេះដែរ ព្រះវិន័យធរ ហែម ឡូត បានបញ្ជាក់ទៀតថា ជាការពិតណាស់ដំណើរការប្រឡងនេះជាដំណាក់កាលមួយដ៏សំខាន់ដែលមានរយៈពេលពេញមួយថ្ងៃ សម្រាប់បេក្ខជនគ្រប់រូប គ្រប់ព្រះអង្គ ដែលបានខិតខំរៀនសូត្រអស់រយៈពេលពេញមួយឆ្នាំ។ ដើម្បីធ្វើការវាស់ស្ទង់ និងបង្ហាញអំពីសមត្ថភាពចំណេះដឹង និងការប្រឡងប្រកបដោយគុណភាព ព្រោះតែកើតចេញពីឆន្ទៈនិងការព្យាយាមសម្រាប់សិក្សារៀនសូត្រ។ ក្មួយៗសិស្សានុសិស្ស និងសមណសិស្ស បេក្ខជនប្រឡងទាំងអស់ ខិតខំយកចិត្តទុកដាក់ពង្រឹងស្មារតី យកអស់កម្លាំងកាយចិត្តបញ្ចេញបញ្ញាវាងវៃ ដើម្បីដណ្ដើមយកជោគជ័យឱ្យទាល់តែបាន ។ សូមកុំបរិភោគនូវអាហារ ដែលមានផលប៉ះពាល់ ធ្វើឱ្យមានការរំខាននៅពេលប្រឡងរក្សាសុខភាព និងអានាម័យឱ្យបានល្អ ៕

ដោយ បៃ ស៊ីថុន