AKP កំពង់ធំ ថ្ងៃទី០៥ ខែមករា ឆ្នាំ២០២៥ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ អមដំណើរដោយលោក ពេញ កែម អភិបាលក្រុង និងជាប្រធានគណៈបញ្ជាការឯកភាពរដ្ឋបាលក្រុងស្ឋឹងសែន កាលពីថ្ងៃទី០៤ ខែមករា ឆ្នាំ២០២៥ បានដឹកនាំសហការី រួមជាមួយក្រុមទីបញ្ជាការស្រាលប្រចាំការពារទប់ស្កាត់បង្ក្រាបបទល្មើសធនធានធម្មជាតិនៅតំបន់គោកព្រះ ចុះពិនិត្យស្ថានភាពព្រំប្រទល់តំបន់ពីរ និងតំបន់បីពិសេសផ្ទៃដីដែលបានដកហូតពីជនល្មើសដែលបានលួចកាប់ទន្ទ្រាននាពេលកន្លងមកជាង១២០០ហិកតាទុកជាសម្បត្តិរដ្ឋស្ថិតនៅក្នុងតំបន់ខ្ទុម១ដើម និងតំបន់ស្នងមែន ក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។

លោក ពេញ កែម បានបញ្ជាក់ថា ក្នុងរដូវប្រាំងកន្លងទៅនេះ រដ្ឋបាលខេត្តកំពង់ធំបានចេញដីកាដកហូតផ្ទៃដីចំនួនជាង៦៣៥ហិកតា នៅក្នុងតំបន់ខ្ទុម១ដើម ជាប់ព្រំប្រទល់ខេត្តកំពង់ឆ្នាំងនិងផ្ទៃដីចំនួនជាង៦០០ហិកតាទៀត ស្ថិតនៅក្នុងតំបន់ស្នងមែន ក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ដើម្បីគ្រប់គ្រងជាសម្បត្តិរដ្ឋ ហើយកងកម្លាំងចម្រុះបានធ្វើការល្បាតជាប្រចាំមិនអនុញ្ញាតដាច់ខាតឱ្យមានជនណាចូលទន្ទ្រានកាន់កាប់ ឬធ្វើស្រែជាថ្មីទៀតបានឡើយ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះការខិតខំប្រឹងប្រែងរបស់គណៈបញ្ជាការឯកភាពរដ្ឋបាលក្រុងស្ទឹងសែន រួមជាមួយកងកម្លាំងចម្រុះទាំងអស់ដែលប្រចាំការនៅទីបញ្ជាការស្រាលតំបន់គោកព្រះ ដោយកន្លងមកបានខិតខំប្រឹងប្រែងយ៉ាងសកម្មក្នុងការការពារទប់ស្កាត់មិនឱ្យកើតឡើងជាថ្មីនូវការកាប់ទន្ទ្រានក្នុងតំបន់ព្រៃលិចទឹកដែលជាតំបន់ហាមឃាត់ហើយគ្រប់គ្រងបានល្អនៅផ្ទៃដីដែលបានដកហូតពីជនល្មើសដែលលួចកាប់ទន្ទ្រានកន្លងទៅទុកជាសម្បត្តិរដ្ឋដើម្បីរក្សាឱ្យបានព្រៃធម្មជាតិដុះឡើងវិញជាជម្រកសម្រាប់ត្រីពងកូនក្នុងរដូវវស្សា។

ឧត្តមសេនីយ៍ទោ សោម ស៊ុន បានណែនាំដល់កងកម្លាំងចម្រុះទាំងអស់ត្រូវបន្តសកម្មភាពឱ្យដូចភ្លៀងរលឹមដើម្បីការពារទប់ស្កាត់មិនឱ្យមានការកាត់ទន្ទ្រានព្រៃលិចទឹកជាថ្មីបានទៀតជាដាច់ខាតក្នុងករណីជនណានៅតែបំពានក្នុងការប្រព្រឹត្តបទល្មើសជាក់ស្ដែងត្រូវចាប់ឃាត់ខ្លួនរួមជាមួយវត្ថុតាងដើម្បីបញ្ជូនទៅស្ថាប័នជំនាញកសាងសំណុំរឿងបញ្ជូនទៅកាន់តុលាការ ផ្ដន្ទាទោសតាមផ្លូវច្បាប់ដោយគ្មានការលើកលែងឡើយ។

ក្នុងឱកាសនោះ ឧត្តមសេនីយ៍ទោ សោម ស៊ុន បាននាំយកនូវស្បៀងអាហារគ្រឿងឧបភោគបរិភោគ និងប្រេងឥន្ធនៈដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងឯកឧត្តម នួន ផារ័ត្នអភិបាលខេត្តកំពង់ធំប្រគល់ជូនទីបញ្ជាការស្រាលប្រចាំការការពារទប់ស្កាត់ និងបង្ក្រាបបទល្មើសធនធានធម្មជាតិនៅតំបន់គោកព្រះក្នុងភូមិសាស្ត្រក្រុងស្ទឹងសែនផងដែរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)