AKP សៀមរាប ថ្ងៃទី០៥ ខែមករា ឆ្នាំ២០២៥ -- ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញកាត់ខ្សែបូរសម្ពោធដាក់ឱ្យប្រើប្រាស់ជាផ្លូវការទីស្នាក់ការផ្តល់លិខិតឆ្លងដែនខេត្តសៀមរាប ដែលមានទីតាំងស្ថិតនៅអគារផ្សារទំនើប Heritage Walk ជាន់ទី២ តាមបណ្តោយផ្លូវជាតិលេខ៦ ភូមិមណ្ឌល២ សង្កាត់ស្វាយដង្គំ ក្រុងសៀមរាប កាលពីរសៀលថ្ងៃទី០៤ ខែមករា ឆ្នាំ២០២៥ ដោយមានធ្វើពិធីសាសនា ប្រោះព្រំសុំសេចក្តីសុខចម្រើនពេលដំណើរការផងដែរ។

ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយកនៃអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានឱ្យដឹងថា ការដាក់ឱ្យដំណើរការទីស្នាក់ការផ្តល់លិខិតឆ្លងដែន នៅខេត្តសៀមរាបនេះ គឺដើម្បីបង្កើនប្រសិទ្ធភាពនៃការផ្តល់សេវាឱ្យកាន់តែល្អជូនប្រជាពលរដ្ឋ ស្របតាមយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាលកម្ពុជា។ ដោយមានកិច្ចសហការយ៉ាងល្អរវាងអគ្គនាយកដ្ឋានអត្តសញ្ញាណកម្ម ជាមួយរដ្ឋបាលខេត្តសៀមរាប ទីស្នាក់ការផ្តល់លិខិតឆ្លងដែននៅខេត្តសៀមរាបនេះនឹងចាប់ផ្តើមធ្វើការចាប់ពីថ្ងៃទី០៨ ខែមករា ឆ្នាំ២០២៥ តទៅ។ សម្រាប់ពេលវេលាផ្តល់សេវា ពីម៉ោង៩៖០០ព្រឹក ដល់ម៉ោង ៤៖០០រសៀល ចាប់ពីថ្ងៃពុធ ដល់ថ្ងៃអាទិត្យ (ឈប់សម្រាកថ្ងៃចន្ទ និងថ្ងៃអង្គារ ព្រមទាំងថ្ងៃឈប់សម្រាកផ្លូវការ)។

ឯកឧត្តម ឧត្តមសេនីយ៍ឯកបានបន្តទៀតថា ទីស្នាក់ការផ្តល់លិខិតឆ្លងដែនខេត្តសៀមរាបនេះ គឺផ្តល់ជូនប្រជាពលរដ្ឋទូទៅ ហើយសម្រាប់ប្រជាពលរដ្ឋតាមបណ្តាខេត្តជុំវិញដូចជា ខេត្តឧត្តរមានជ័យ ព្រះវិហារ កំពង់ធំ ជាដើម ពេលធ្វើដំណើរមកកម្សាន្តនៅខេត្តសៀមរាប បន្ទាប់ពីទស្សនាប្រាសាទអង្គរវត្តហើយក៏អាចមកស្នើសុំធ្វើលិខិតឆ្លងបានផងដែរ។ នេះបង្កភាពងាយស្រួលជូនប្រជាពលរដ្ឋ ដែលមានតម្រូវការធ្វើលិខិតឆ្លងដែន ដោយមិនពិបាកចំណាយពេលច្រើនធ្វើដំណើរទៅរាជធានីភ្នំពេញ។

ទន្ទឹមនឹងនេះ ប្រជាពលរដ្ឋនៅខេត្តសៀមរាបបានបង្ហាញពីការសប្បាយចិត្ត នៅពេលដែលខេត្តទេសចរណ៍មួយនេះមានកន្លែងផ្តល់សេវាធ្វើលិខិតឆ្លងដែន ដោយមិនពិបាកចំណាយពេលច្រើន ក្នុងការធ្វើដំណើរទៅលិខិតឆ្លងដែននៅរាជធានីភ្នំពេញ៕

ដោយ ឃុត សៅ