AKP ភ្នំពេញ ថ្ងៃទី០៣ ខែមករា ឆ្នាំ២០២៥–នាថ្ងៃទី១៨ ខែមករា ឆ្នាំ២០២៥ ខាង​មុខ​នេះ​ នៅទីស្នាក់ការគណបក្សប្រជាជនកម្ពុជាស្រុកកំពង់ត្រឡាច ស្ថិតនៅស្រុកកំពង់ត្រឡាច ខេត្តកំពង់ឆ្នាំង​ នឹងរៀបចំសិក្ខាសាលាវង់ភ្លេងពិណពាទ្យ ក្រោមប្រធានបទ «តួនាទីរបស់វង់ភ្លេងពិណពាទ្យ» ។ 

សិក្ខាសាលា​នេះ​រៀបចំ​ឡើងក្រោមការ​ផ្តួចផ្តើម​ពី​ក្រុមការងារគណបក្សចុះ មូលដ្ឋានស្រុកកំពង់ត្រឡាច សហការជាមួយនាយកដ្ឋានសិល្បៈទស្សនីយភាព នៃក្រសួងវប្បធម៌ និង វិចិត្រសិល្បៈ និងមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង​ ក្នុងគោលបំណងថែរក្សា លើកស្ទួយ និងផ្សព្វផ្សាយ ក៏ដូចជាតម្រង់ទិសដល់បងប្អូនសិល្បករ ដែលបានចាប់យកអាជីពសម្តែងភ្លេងពិណពាទ្យ នៅក្នុងស្រុកកំពង់ត្រឡាច ខេត្តកំពង់ឆ្នាំង ឱ្យបានយល់ដឹងកាន់តែច្បាស់អំពីការសម្តែងភ្លេងពិណពាទ្យឱ្យបានត្រឹមត្រូវតាមទំនៀមទម្លាប់ និងក្បួនច្បាប់ពីបុរាណរបស់ខ្មែរយើង។

អត្ថប្រយោជន៍ ដែលទទួលបានពីការចូលរួមសិក្ខាសាលានេះរួមមាន៖
១. ទទួលបានជំនាញច្បាស់លាស់ត្រឹមត្រូវតាមទំនៀមទម្លាប់
២. វិញ្ញាបនបត្របញ្ជាក់ពីការចូលរួមសិក្ខាសាលា ដែលចេញដោយមន្ទីរវប្បធម៌ និងវិចិត្រសិល្បៈ ខេត្តកំពង់ឆ្នាំង។

ចំពោះ បងប្អូនសិល្បករក្រុមវង់ភ្លេងពិណពាទ្យ នៅស្រុកកំពង់ត្រឡាច ខេត្តកំពង់ឆ្នាំង ដែលមានចំណាប់អារម្មណ៍ចំពោះសិក្ខាសាលានេះ សូមធ្វើការទំនាក់ទំនងព័ត៌មានលម្អិតជាមួយ លោក កឹង ជុំ តាមរយៈ ទូរស័ព្ទលេខ ០៧៨ ២៤០ ៨០៨៕

ដោយ៖ គង់ សិរីរ័ត្ន