AKP ភ្នំពេញ ថ្ងៃទី២ ខែមករា ឆ្នាំ២០២៥–នារសៀលថ្ងៃព្រហស្បតិ៍ ៤កើត ខែបុស្ស ឆ្នាំរោង ឆស័ក ព.ស.២៥៦៨ ត្រូវថ្ងៃទី២ ខែមករា ឆ្នាំ២០២៥ នៅទីស្ដីការក្រសួង ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំគណៈកម្មការដឹកនាំ គ្រប់គ្រង ត្រួតពិនិត្យ និងវាយតម្លៃការងារអភិវឌ្ឍន៍សហគមន៍ជនបទ និងចលនាភូមិគំរូ របស់ក្រសួងអភិវឌ្ឍន៍ជនបទ ដោយមានការអញ្ជើញចូលរួមពី ឯកឧត្ដម រដ្ឋលេខាធិការប្រចាំការ ឯកឧត្ដម រដ្ឋលេខាធិការ អនុរដ្ឋលេខាធិការ អគ្គនាយក  អគ្គនាយករង និងប្រធាននាយកដ្ឋាន ដែលជាសមាភាពនៃគណៈកម្មការនេះ។

យោងតាមបទអន្ដរាគមន៍របស់ ឯកឧត្តម ជ្រាយ ប៉ុម អគ្គនាយកបច្ចេកទេស និងលោក អឿន ធារិទ្ធ ប្រធាននាយកដ្ឋានអភិវឌ្ឍន៍ សហគមន៍ បានរំលេចនូវសមិទ្ធផលពាក់ព័ន្ធនឹងភូមិគំរូ និងសហគមន៍ជនជាតិដើមភាគតិច ដោយគិតត្រឹមឆ្នាំ២០២៤ ក្រសួងបានទទួលស្គាល់ និងប្រគល់វិញ្ញាបនបត្រភូមិគំរូចំនួន ៣០ភូមិ, បាននិងកំពុងអនុវត្តគម្រោងភូមិគំរូ “ភូមិសន្តិភាព” ចំនួន ៣៤ភូមិ, និងបានចេញលិខិតទទួលស្គាល់អត្តសញ្ញាណសហគមន៍ជនជាតិដើមភាគតិចចំនួន ២០៣សហគមន៍ លើសពីនេះទៀត ក្រសួងក៏បានជ្រើសរើសភូមិគន្លឹះចំនួន ៥០ភូមិ ផ្សេងទៀត នៅទូទាំង ២៥រាជធានី-ខេត្ត ដើម្បីអភិវឌ្ឍឱ្យក្លាយជាភូមិគំរូ។ បន្ទាប់ពីបានស្ដាប់នូវរបាយការណ៍លទ្ធផលការងារដែលសម្រេចបាននាពេលកន្លងមក ឯកឧត្ដមរដ្ឋមន្រ្ដី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ដ្រីជំនាញទាំងអស់ ដែលបានខិតខំបំពេញតួនាទី ភារកិច្ច ប្រកបដោយការទទួលខុសត្រូវ និងមានប្រសិទ្ធភាព រហូតសម្រេចបាននូវសមិទ្ធផលគួរជាទីមោទនៈ ដែលជាមូលដ្ឋានគ្រឹះដ៏ចាំបាច់សម្រាប់ឈានទៅសម្រេចនូវចក្ខុវិស័យក្នុងផែនការយុទ្ធសាស្រ្តអភិវឌ្ឍន៍ជនបទ ២០២៤-២០២៨ គឺ “កសាងតំបន់ជនបទកម្ពុជាប្រកបដោយវិបុលភាព បរិយាបន្ន នវានុវត្តន៍ ឌីជីថល និងភាពធន់ ទាំងផ្នែកសេដ្ឋកិច្ច សង្គម និងវប្បធម៌” សំដៅធានាបាននូវកំណើនប្រាក់ចំណូលគ្រួសារប្រកបដោយចីរភាព និងមានសុខុមមាលភាពកាន់តែប្រសើរឡើង។

ក្នុងឱកាសនោះផងដែរ ឯកឧត្ដមរដ្ឋមន្រ្ដី ក៏បានផ្ដល់អនុសាសន៍គន្លឹះចំនួន ៧ចំណុច គឺ
ទី១. ត្រូវខិតខំអនុវត្តនូវទិសដៅការងារដែលបានដាក់ចេញឱ្យមានប្រសិទ្ធភាពខ្ពស់ ក្នុងឆ្នាំ២០២៥
ទី២.ត្រូវបន្តគាំទ្រការងារអភិវឌ្ឍន៍ភូមិគំរូមានស្រាប់ទាំង ៣០ភូមិ និងបន្តខិតខំអភិវឌ្ឍគម្រោងភូមិគំរូចំនួន ៣៤ផ្សេងទៀត ឱ្យក្លាយជាភូមិគំរូ
ទី៣. ត្រូវបន្តចុះពិនិត្យ និងផ្ទៀងផ្ទាត់លទ្ធផលនៃការវាយតម្លៃលក្ខណៈសម្បត្តិភូមិគំរូទាំង ៥០ភូមិ ដែលស្ថិតនៅក្នុងទីទាំងភូមិសាស្រ្តទាំង២៥រាជធានី-ខេត្ត ឱ្យមានសុក្រឹតភាព
ទី៤. ត្រូវបន្ដយកចិត្តទុកដាក់ពង្រឹង និងអភិវឌ្ឍសមត្ថភាព ជូនដល់គណៈកម្មាធិការអភិវឌ្ឍន៍ភូមិ (គ.អ.ភ.) និងការរៀបចំកម្មវិធីបណ្ដុះបណ្ដាលជំនាញមូលដ្ឋាន ដោយយកចិត្តទុកដាក់លើជំនាញបំណិនជីវិត, ចំណេះដឹងអំពីវិធីសាស្ដ្រការពារ, សង្គ្រោះបឋមទប់ទល់នឹងហានិភ័យផ្សេងៗ ជាពិសេសត្រូវបញ្ចូលមេរៀនអប់រំសីលធម៌នៃការរស់នៅក្នុងសង្គមប្រកបដោយសេចក្ដីថ្លៃថ្នូរ ឱ្យមានសន្ដិភាពក្នុងចិត្តគំនិត
ទី៥. បន្តជំរុញការចុះវាយតម្លៃដើម្បីចុះបញ្ជីកំណត់អត្តសញ្ញាណ និងចេញលិខិតទទួលស្គាល់អត្តសញ្ញាណជនជាតិដើមភាគតិច ដោយប្រកាន់យកនូវអភិក្រម អភិវឌ្ឍន៍ ដើរទន្ទឹមនឹងការអភិរក្ស
ទី៦. បន្តសហការជាមួយក្រុមការងារអន្ដរក្រសួង ត្រី -វិស័យ (កសិកម្ម, ធនធានទឹក, ជនបទ) ដើម្បីចុះកំណត់ទីតាំងសហគមន៍គោលដៅ ឱ្យមានភាពស្របគ្នារវាង សហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ និង
ទី៧. បន្ដបង្កើនកិច្ចសហប្រតិបត្តិការ និងកៀរគរថវិកា ជាមួយដៃគូអភិវឌ្ឍន៍, NGOs វិស័យឯកជន, សប្បុរសជន និងភាគីពាក់ព័ន្ធនានា ដើម្បីជំរុញការងារអភិវឌ្ឍន៍ភូមិគំរូ និងសហគមន៍ជនជាតិដើមភាគតិច ព្រមទាំងរៀបចំឱ្យមានការចងសម្ព័ន្ធភាពភូមិគំរូជាមួយភូមិគំរូនៃប្រទេសនានាផងដែរ ដើម្បីរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយគតិបណ្ឌិត និងភាពប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយ៖ពេជ្រ សំអឿន(ប្រភព៖ក្រសួងអភិវឌ្ឍន៍ជនបទ)