AKP ភ្នំពេញ ថ្ងៃទី០២ ខែមករា ឆ្នាំ២០២៥ -- ក្រសួងព័ត៌មាន និងសាកលវិទ្យាល័យភ្នំពេញអន្តរជាតិ (PPIU) បានប្រជុំពិភាក្សាស្ដីពីកិច្ចសហប្រតិបត្តិការលើកម្មវិធីបណ្ដុះបណ្ដាលជំនាញ ក្របខ័ណ្ឌវិស័យព័ត៌មាន និងសោតទស្សន៍នៅកម្ពុជា ដើម្បីពង្រឹងសមត្ថភាព គុណភាព និងវិជ្ជាជីវៈដល់អ្នកសារព័ត៌មានឱ្យបានកាន់តែរឹងមាំបន្ថែមទៀត។ កិច្ចប្រជុំពិភាក្សានេះបានធ្វើឡើង រវាង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទេព កូលាប ប្រធានក្រុមប្រឹក្សាភិបាល និងជាសាកលវិទ្យាធិការនៃសាកលវិទ្យាល័យភ្នំពេញអន្តរជាតិ (PPIU) នារសៀលថ្ងៃទី០២ ខែមករា ឆ្នាំ២០២៥ នៅទីស្តីការក្រសួងព័ត៌មាន ដោយភាគីទាំងពីរបានលើកយកនូវចំណុចសំខាន់ៗមួយចំនួនដើម្បីរួមគ្នាឈានទៅធ្វើការបណ្តុះបណ្តាលធនធានមនុស្សលើវិស័យសារព័ត៌មាន និងសោតទស្សន៍នៅកម្ពុជាបានកាន់តែរឹងមាំ មានគុណភាព និងសមត្ថភាពល្អប្រសើរបន្ថែមទៀត។

ក្នុងឱកាសនោះ ឯកឧត្តម នេត្រ ភក្រ្តា បានគូសបញ្ជាក់ថា កិច្ចសហការរវាងក្រសួងព័ត៌មាន និងសាកលវិទ្យាល័យភ្នំពេញអន្តរជាតិ គឺដើម្បីបណ្តុះបណ្តាលជំនាញសារព័ត៌មាន ដោយមិនត្រឹមតែការសរសេរអត្ថបទកាសែតតែមួយមុខនោះទេ គឺទាក់ទងកិច្ចការងារវិទ្យុ ទូរទស្សន៍ ប្រព័ន្ធ Digital ការគ្រប់គ្រងផ្នែកប្រព័ន្ធផ្សព្វផ្សាយ និងសារព័ត៌មាន ផ្នែកទំនាក់ទំនងសាធារណៈ អ្នកនាំពាក្យ មន្ត្រីព័ត៌មាន រួមទាំងផ្នែកបច្ចេកទេសសម្រាប់បំពេញការងារក្នុងវិស័យព័ត៌មាន និងសោតទស្សន៍នៅកម្ពុជា។

សូមជម្រាបជូនថា កិច្ចប្រជុំស្ដីពីកិច្ចសហប្រតិបត្តិការលើកម្មវិធីបណ្ដុះបណ្ដាលជំនាញ ក្របខ័ណ្ឌវិស័យព័ត៌មាន និងសោតទស្សន៍ រវាងក្រសួងព័ត៌មាន និងសាកលវិទ្យាធិការនៃសាកលវិទ្យាល័យភ្នំពេញអន្តរជាតិ(PPIU) គឺធ្វើឡើងបន្ទាប់ពី ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទេព កូលាប សាកលវិទ្យាធិការ នៃសាកលវិទ្យាល័យភ្នំពេញអន្តរជាតិ (PPIU) បានធ្វើការចុះហត្ថលេខាលើអនុស្សរណៈនៃការយោគយល់គ្នា រវាងក្រសួងព័ត៌មាន និងសាកលវិទ្យាល័យភ្នំពេញអន្តរជាតិ ស្តីពីកិច្ចសហប្រតិបត្តិការលើកម្មវិធីបណ្តុះបណ្តាលជំនាញក្របខ័ណ្ឌវិស័យព័ត៌មាន និងសោតទស្សន៍ កាលពីថ្ងៃទី០៤ ខែធ្នូ ឆ្នាំ២០២៤ កន្លងទៅនេះ។ អនុស្ស រណៈ នៃការយោគយល់នេះ ត្រូវបានធ្វើឡើងក្នុងគោលបំណងបង្កើនកិច្ចសហប្រតិបត្តិការ ក្នុងភាពជាដៃគូ រវាងស្ថាប័នរដ្ឋ និងឯកជន សំដៅលើការរួមចំណែកលើកកម្ពស់វិស័យព័ត៌មាន តាមរយៈការបណ្តុះបណ្តាលធនធានមនុស្សក្នុងវិស័យព័ត៌មាន ប្រកបដោយគុណវុឌ្ឍិ កម្រិតបរិញ្ញាបត្រ បរិញ្ញាបត្ររង និងកម្រិតវិជ្ជាជីវៈក្នុងព្រះរាជាណាចក្រកម្ពុជា៕

ដោយ៖ រិទ្ធី, រូបថត៖ ខឹម សុវណ្ណារ៉ា