AKP កំពង់ធំ ថ្ងៃទី០២ ខែមករា ឆ្នាំ២០២៥ -- លោកស្រី លំ គន្ធារី អភិបាលរងខេត្ត និងជាប្រធានស្តីទីគណៈកម្មាធិការសាខាកាកបាទក្រហមកម្ពុជាខេត្តកំពង់ធំ មន្រ្តីសាខា និងលោក សាយ គឹមឡមអភិបាលស្រុក និងជាប្រធានអនុសាខាកាកបាទក្រហមកម្ពុជាស្រុកស្ទោង និងក្រុមការងារបានចុះសួរសុខទុក្ខ និងនាំយកអំណោយរបស់សាខាកាកបាទក្រហមកម្ពុជាខេត្តកំពង់ធំ ទៅប្រគល់ជូនប្រជាពលរដ្ឋរងគ្រោះដោយភ្លើងឆេះផ្ទះចំនួន៣គ្រួសារដែលបណ្ដាលមកពីឆ្លងចរន្តអគ្គិសនីស្ថិតនៅភូមិបត់ត្រង់ ឃុំម្សាក្រងស្រុកស្ទោង ខេត្តកំពង់ធំ នាព្រឹកថ្ងៃទី០២ ខែមករា ឆ្នាំ២០២៥។

តាមរបាយការណ៍របស់លោក សាយ គឹមឡម បានឱ្យដឹងថាករណីភ្លើងឆេះផ្ទះអស់៣ខ្នង កាលពីថ្ងៃទី៣១ ខែធ្នូ ឆ្នាំ២០២៤ វេលាម៉ោង២១៖០០នាទីយប់ ម្ចាស់ផ្ទះ៖ ១. ឈ្មោះ ណូ ណាក់ ភេទប្រុស អាយុ៥២ឆ្នាំ បណ្តាលឱ្យខូតខាតផ្ទះ១ខ្នងទំហំ៦ម៉ែត្រគុណ៧ម៉ែត្រ និងសម្ភារមួយចំនួន។ ២. ឈ្មោះ ស៊ន ណន ភេទស្រី អាយុ៦៨ឆ្នាំ ឆេះផ្ទះ១ខ្នងទំហំ៧ម៉ែត្រគុណ៨ម៉ែត្រប្រក់ក្បឿង និងសម្ភារមួយចំនួនខូចខាតទាំងស្រុង។ ៣. ឈ្មោះ អេល អុល ភេទប្រុស អាយុ៤០ឆ្នាំ ឆេះផ្ទះ១ខ្នងទំហំ៦ម៉ែត្រគុណ៧ម៉ែត្រ ប្រក់សង្កសីខូចខាតសម្ភារមួយចំនួនទៀត។

ក្នុងឱកាសនោះ លោកស្រី លំ គន្ធារី បានពាំនាំការផ្តាំផ្ញើសួរសុខទុក្ខ និងក្តីអាណិតពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាកក្រហមកម្ពុជាជូនប្រជាពលរដ្ឋ៣គ្រួសារដែលរងគ្រោះដោយភ្លើងឆេះផ្ទះអស់ទាំងស្រុង។ ការចុះសួរសុខទុក្ខគឺជាការអនុវត្តអនុសាសន៍របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ក្នុងនាមជាអ្នកម្តាយមួយរូប ដែលផ្តោតលើការយកចិត្តទុកដាក់សមស្របទៅនឹងគោរមងាររបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការ អង្គការសហប្រជាជាតិ ដើម្បីសុខភាពស្ត្រី និងកុមារ ហើយទីណាមានទុក្ខលំបាក ទីនោះមានសាខាកាកបាទក្រហមកម្ពុជា ចុះជួយដល់មូលដ្ឋាន។

លោកស្រីប្រធានស្តីទីបានផ្ដាំផ្ញើដល់បងប្អូនទាំងអស់ពេលចេញដំណើរទៅណាមកណា ត្រូវតែប្រុងប្រយ័ត្ន និងបិទកុងតាក់ភ្លើង ភ្លើងចង្ក្រាន ភ្លើងធូបទៀនឱ្យបានត្រឹមត្រូវ ដើម្បីការពារគ្រោះថ្នាក់ដែលកើតឡើងជាយថាហេតុ សូមរក្សាសុខភាពឱ្យបានត្រឹមត្រូវ ព្រោះរដូវនេះជារដូវរងារធ្វើឱ្យប៉ះពាល់ដល់សុខភាព ហាត់ប្រាណឱ្យបានទៀងទាត់ និងរក្សាអនាម័យបីប្រការគឺ "ហូបស្អាត ផឹកស្អាត និងរស់នៅស្អាត"។

លោកស្រី លំ គន្ធារី បានប្រគល់អំណោយជូនប្រជាពលរដ្ឋទាំង៣គ្រួសារដែលរងគ្រោះដោយភ្លើងឆេះផ្ទះអស់ទាំងស្រុង ក្នុង១គ្រួសារទទួលបានអង្ករ មី ត្រីខ  ទឹកត្រី ទឹកស៊ីវ  មុង ភួយ សារុង ក្រមា ឆ្នាំង២ កន្ទេល១  តង់១ និងថវិកាមួយចំនួនផងដែរ។ អនុសាខាស្រុកស្ទោងបន្ថែមជូនសម្ភារមួយចំនួនទៀតរួមមាន៖ បាឡុង១ឈុត ប្រេងឆា ទឹកត្រី ទឹកស៊ីអីវ និងថវិកាមួយចំនួន៕

ដោយ ស៊ុម វណ្ណា