AKP ភ្នំពេញ ថ្ងៃទី០២ ខែមករា ឆ្នាំ២០២៥ -- យោង​តាម​របាយការណ៍​ចេញ​ផ្សាយ​​ដោយ​ការិយាល័យ​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស (OHCHR) បានឱ្យដឹងថា​ ការវាយប្រហាររបស់អ៊ីស្រាអែលលើមន្ទីរពេទ្យនៅតំបន់ហ្គាហ្សាបានរុញប្រព័ន្ធថែទាំសុខភាពក្នុងតំបន់ឱ្យ«ឈានទៅដល់ការដួលរលំទាំងស្រុង» ដែលបណ្តាលឱ្យមាន «ផលប៉ះពាល់មហន្តរាយ» លើការទទួលបានការព្យាបាល និងការថែទាំសុខភាពរបស់ប៉ាឡេស្ទីន។

យោង​តាម​ការ​លើក​ឡើង​របស់ ​លោក វូលកឺ តួក (Volker Turk)ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស បាននិយាយថា «នេះចាំបាច់ណាស់ដែលត្រូវតែមានការស៊ើបអង្កេតដោយឯករាជ្យ ហ្មត់ចត់និងតម្លាភាពនៃឧប្បត្តិហេតុទាំងអស់នេះ ហើយមានទំនួលខុសត្រូវពេញលេញចំពោះរាល់ការរំលោភលើច្បាប់មនុស្សធម៌ និងសិទ្ធិមនុស្សអន្តរជាតិដែលបានកើតឡើង»។

របាយការណ៍បាននិយាយថា ការវាយប្រហារដែលបានចងក្រងជាឯកសារនៅចន្លោះថ្ងៃទី១២ ខែតុលា ឆ្នាំ២០២៣ ដល់ថ្ងៃទី៣០ ខែមិថុនាឆ្នាំ២០២៤ បង្កឱ្យមានការព្រួយបារម្ភយ៉ាងខ្លាំងអំពីការអនុលោមតាមច្បាប់អន្តរជាតិរបស់អ៊ីស្រាអែល ដោយរបាយការណ៍បានបន្ថែមថា ការបំផ្លិចបំផ្លាញយ៉ាងទូលំទូលាយនៃហេដ្ឋារចនាសម្ព័ន្ធថែទាំសុខភាពនៅតំបន់ហ្គាហ្សា បណ្តាលឱ្យបាត់បង់ជីវិតយ៉ាងច្រើនក្នុងចំណោមអ្នកជំងឺបុគ្គលិកពេទ្យ និងជនស៊ីវិល ដែលធ្វើឲ្យវិបត្តិមនុស្សធម៌កាន់តែស៊ីជម្រៅ។

ក្នុងករណីភាគច្រើន អ៊ីស្រាអែលបានអះអាងថា ក្រុមប្រដាប់អាវុធប៉ាឡេស្ទីនបានប្រើប្រាស់មន្ទីរពេទ្យសម្រាប់គោលបំណងយោធា។ទោះជាយ៉ាងណាក៏ដោយ របាយការណ៍បានពណ៌នាពីការចោទប្រកាន់ទាំងនេះថា «មិនមានភាពច្បាស់លាស់ និងទូលំទូលាយ» ជាមួយនឹង   ភស្តុតាងមិនគ្រប់គ្រាន់។ ក្នុង​ករណី​ខ្លះ ការ​ចោទ​ប្រកាន់​នេះ​បាន​លេច​ឡើង«ផ្ទុយ​ពី​ព័ត៌មាន​ដែល​មាន​ជា​សាធារណៈ»។ លោក តួក បាននិយាយថា «ការការពារមន្ទីរពេទ្យក្នុងអំឡុងពេលសង្រ្គាមគឺជារឿងសំខាន់បំផុត ហើយត្រូវតែគោរពដោយភាគីទាំងអស់គ្រប់ពេលវេលា»៕

ដោយ៖ មូល មិនា (ប្រភព៖ ភីបផលដេលី)