AKP ភ្នំពេញ ថ្ងៃទី០២ ខែមករា ឆ្នាំ២០២៥-- សមាជិកសហគមន៍ រួមគ្នាជាមួយថ្នាក់ដឹកនាំនៃក្រុមប្រឹក្សាភិបាលសហគមន៍ទំនើបស្វាយចន្ទីទាំង៣នៅខេត្តកំពង់ធំ ធ្វើការសម្ភាសវគ្គចុងក្រោយ ដើម្បីជ្រើសរើសបេក្ខភាពសម្រាប់តំណែងនាយកប្រតិបត្តិគ្រប់គ្រងសហគមន៍កសិកម្មទំនើប ដែលជាក្បាលម៉ាស៊ីនដឹកនាំរបស់ខ្លួន។  នេះបើតាមការឱ្យដឹងពី ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ នៅថ្ងៃទី០២ ខែមករា ឆ្នាំ២០២៥។

ដោយវិសាលភាពនៃតម្រូវការការងារគ្រប់គ្រងសហគមន៍នៅមានទំហំតូចនៅឡើយ ទើបសហគមន៍ទាំង៣ បានសម្រេចចិត្តប្រើប្រាស់ប្រព័ន្ធគ្រប់គ្រងរួមគ្នាសម្រាប់ឆ្នាំទី១ជាបណ្តោះអាសន្នសិន ជាពិសេសសម្រាប់តួនាទីនាយកប្រតិបត្តិ និងគណនេយ្យ តែនឹងមានអ្នកបច្ចេកទេសប្រចាំការដាច់ដោយឡែកនៅតាមសហគមន៍រៀងៗខ្លួន។ សហគមន៍កសិកម្មទំនើបស្វាយចន្ទីទាំង៣ ក្នុងខេត្តកំពង់ធំ ត្រូវបានបង្កើតឡើង និងគាំទ្រដោយផ្ទាល់ពីក្រសួងកសិកម្ម មានសមាជិកសរុបចំនួន ១៥២ គ្រួសារ និងផ្ទៃដីផលិតកម្មស្វាយចន្ទីចំនួន ៦២៣ ហិកតា។

ការគាំទ្រដល់សហគមន៍ពីក្រសួងកសិកម្មរួមមាន សម្របសម្រួលទុនកម្ចីការប្រាក់ទាប៧៥ម៉ឺនដុល្លារ គាំទ្រខាងផ្នែកទីផ្សារ គ្រោងលក់ស្រស់៥០ភាគរយ ស្ងួត៥០ភាគរយ ផ្តល់ហេដ្ឋារចនាសម្ព័ន្ធគាំទ្រផលិតកម្ម គាំទ្រខាងផ្នែកបច្ចេកទេសដោយផ្ទាល់ពីក្រសួង ដើម្បីកាត់បន្ថយថ្លៃដើមធាតុចូល បង្កើនផលិតភាព និងធានាស្តង់ដាគុណភាពឆ្លើយតបទៅនឹងតម្រូវការទីផ្សារ៕

ដោយ ណយ នឿន